វៀតណាម៖ គិតត្រឹមឆ្នាំ ២០១៣-២០២៣ ប្រទេសវៀតណាមគឺមានអត្រាកំណើនសេដ្ឋកិច្ចលឿនបំផុតក្នុងលោក ដែលចំនួនមហាសេដ្ឋីមានទ្រព្យសម្បត្តិសុទ្ធចាប់ពី ១ លានដុល្លារអាមេរិកឡើងទៅ កើនឡើងរហូតដល់ ៩៨% ឯណោះ។
ទិន្នន័យនេះត្រូវបានដកស្រង់ចេញពីរបាយការណ៍ថ្មីៗដោយក្រុមហ៊ុនស៊ើបការណ៍ទ្រព្យសកម្មពិភពលោក New World Wealth របស់អាហ្វ្រិកខាងត្បូង និងក្រុមហ៊ុនប្រឹក្សាចំណាកស្រុកវិនិយោគ Henley & Partners របស់ប្រទេសស្វីស។ របាយការណ៍នេះធ្វើស្ថិតិចំនួនមនុស្សដែលមានទ្រព្យសម្បត្តិសុទ្ធ ១ លានដុល្លារ ឬច្រើនជាងនេះរវាងឆ្នាំ ២០១៣ និង ២០២៣។
ការស្រាវរបស់ New World Wealth បានធ្វើឡើងក្នុង ៩០ ប្រទេស និងទីក្រុងចំនួន ១៥០ ជុំវិញពិភពលោក ជាពិសេសផ្តោតលើអាស៊ី និងអាហ្វ្រិក ដែលជារឿយៗផ្តោតលើស្ថាបនិកក្រុមហ៊ុន និងបុគ្គលដែលកាន់តំណែងជាប្រធាន នាយកប្រតិបត្តិ និងមុខតំណែងគ្រប់គ្រង។ ក្រុមហ៊ុននេះបានចាប់ផ្តើមចេញផ្សាយរបាយការណ៍តាមកាលកំណត់ជារៀងរាល់ឆ្នាំចាប់ពីឆ្នាំ ២០២២ ដែលគ្របដណ្តប់លើប្រធានបទជាច្រើនដូចជាមហាសេដ្ឋី អចលនទ្រព្យ រូបិយប័ណ្ណគ្រីបតូ និងការធ្វើចំណាកស្រុកនៃអ្នកមានជាដើម។
យោងតាមរបាយការណ៍នេះ សហរដ្ឋអាមេរិកនៅតែនាំមុខគេលើពិភពលោកក្នុងចំនួនមហាសេដ្ឋី ដែលមានចំនួនជាង ៥.៤ លាននាក់ ប៉ុន្តែប្រទេសដែលមានសេដ្ឋកិច្ចកំពុងរីកចម្រើនដូចជាវៀតណាម ចិន និងឥណ្ឌាក៏បានឃើញកំណើនសេដ្ឋីលឿនបំផុតផងដែរ។ ចំនួនមហាសេដ្ឋីរបស់វៀតណាមបានកើនឡើងដល់ ១៩,៤០០ នាក់គិតត្រឹមដំណាច់ឆ្នាំកន្លងទៅ ស្មើនឹងការកើនឡើង ៩៨% ក្នុងរយៈពេលមួយទសវត្សរ៍កន្លងមក។ ក្នុងចំណោមនោះចំនួនអ្នកមានទ្រព្យសម្បត្តិជាង ១០០ លានដុល្លារ មានតែ ៥៨ នាក់ប៉ុណ្ណោះ ទោះជាយ៉ាងណាអត្រាកំណើនមហាសេដ្ឋីរបស់វៀតណាមនាពេលបច្ចុប្បន្ននេះគឺមានកម្រិតខ្ពស់ខ្លាំងណាស់។ 
New World Wealth និង Henley & Partners ជឿជាក់ថា ការរីកចម្រើនយ៉ាងឆាប់រហ័សនៃមហាសេដ្ឋីនៅក្នុងប្រទេសវៀតណាមគឺជាការឆ្លុះបញ្ចាំងពីភាពជោគជ័យផ្នែកសេដ្ឋកិច្ចនាពេលថ្មីៗនេះ និងបង្ហាញពីការបន្តនៃនិន្នាការកើនឡើងក្នុងការប្រមូលទ្រព្យសម្បត្តិ។ គួរបញ្ជាក់ដែរថា ក្នុងអំឡុងពេលរបាយការណ៍វាយតម្លៃ (២០១៣-២០២៣) សេដ្ឋកិច្ចរបស់ប្រទេសវៀតណាមបានកើនឡើងគួរជាទីចាប់អារម្មណ៍ លើកលែងតែរយៈពេលពីរឆ្នាំ ២០២០ និងឆ្នាំ ២០២១ ដែលត្រូវបានរងផលប៉ះពាល់ដោយការរីករាលដាលនៃ Covid-19 ។
ជាពិសេសនៅឆ្នាំ ២០២២ នៅពេលដែលជំងឺរាតត្បាតត្រូវបានយកឈ្នះ សេដ្ឋកិច្ចងើបឡើងវិញ GDP កើនឡើង ៨.០២% ដែលជាកម្រិតកំណត់ត្រាខ្ពស់ក្នុងរយៈពេលជាង ១០ ឆ្នាំមកនេះ។ ប្រាក់ចំណូលជាមធ្យមសម្រាប់មនុស្សម្នាក់ក្នុងរយៈពេល ១០ ឆ្នាំនៃរបាយការណ៍វាយតម្លៃក៏កើនឡើងជិត ២.២ ដង ពី ១,៩៦០ ដុល្លារក្នុងមនុស្សម្នាក់ក្នុងឆ្នាំ ២០១៣ ដល់ ៤,២៨៤ ដុល្លារក្នុងឆ្នាំ ២០២៣។ ដូច្នេះការកើនឡើងនៃផលិតផលក្នុងស្រុកសរុបសម្រាប់មនុស្សម្នាក់ឆ្លុះបញ្ចាំងពីភាពរឹងមាំនៃសេដ្ឋកិច្ចអន្តរជាតិ៕
