ដកស្រង់ពីប្រព័ន្ធផ្សព្វផ្សាយចិនបានរាយការណ៍ថា Angelababy បានធ្វើការផ្សាយផ្ទាល់ដើម្បីលក់ផលិតផលសម្រាប់ Red Dragonfly ដែលជាម៉ាកស្បែកជើងដែលនាងគាំទ្រកាលពីថ្ងៃទី ២៩ ខែមិថុនា។ ទង្វើនេះបាននាំឱ្យមានការចំអក និងការរិះគន់ ដោយអ្នកខ្លះថានាងកំពុងមើលងាយខ្លួនឯង ខណៈពេលដែលអ្នកផ្សេងទៀតមានអារម្មណ៍ថានាងបាត់បង់ស្ថានភាពតារារបស់នាងក្នុងបញ្ជីA និងកំពុងធ្លាក់ចុះ។
លើសពីនេះទៅទៀត Angelababy បានសហការជាមួយ Xinba ដែលត្រូវបានគេស្គាល់ថាជា «Livestream King» នៅក្នុងប្រទេសចិនក្នុងអំឡុងពេលវគ្គផ្សាយផ្ទាល់។ Xinba ត្រូវបានគេធ្វើពហិកាដោយសារការអួតពីទ្រព្យសម្បត្តិរបស់ខ្លួន និងត្រូវបានផាកពិន័យសម្រាប់ការលក់ផលិតផលទឹកត្រចៀកកាំក្លែងក្លាយ។ ដូច្នេះការសហការនេះ ត្រូវបានមនុស្សជាច្រើនចាត់ទុកថាជាការសម្រេចចិត្តមិនល្អរបស់ Angelababy ។
អ្នកទស្សនាមួយចំនួនបានកត់សម្គាល់ថា filters ដែលប្រើក្នុងអំឡុងពេលផ្សាយផ្ទាល់បានធ្វើឱ្យមុខរបស់ Angelababy មើលទៅរឹង ដោយភ្នែក និងបបូរមាត់របស់នាងមើលទៅខុសពីធម្មជាតិ។
ថ្មីៗនេះ ទូរទស្សន៍ Zhejiang TV របស់ចិនបានចាក់ផ្សាយឡើងវិញនូវវគ្គនៃកម្មវិធី «Keep Running» ដែលមាន Angelababy ប៉ុន្តែមុខរបស់នាងត្រូវបានគេដាក់ព្រិលខណៈដែលសមាជិកតួផ្សេងទៀតត្រូវបានបង្ហាញជាធម្មតា។
លើសពីនេះ រឿងភាគទូរទស្សន៍ «Everlasting Longing» ដែលសម្តែងដោយនាងបានបញ្ចប់ការថត ប៉ុន្តែត្រូវបានអវត្តមានពីព្រឹត្តិការណ៍ផ្សព្វផ្សាយថ្មីៗដោយផលិតករ Tencent Video ។ ប្រការអស់ទាំងនេះហើយបង្ហាញថា តារាស្រីរូបនេះអាចប្រឈមនឹងការលំបាកក្នុងការវិលត្រលប់មកវិញក្នុងវិស័យសម្តែង។
Angelababy បានប្រឈមមុខនឹងការហាមប្រាមក្នុងការបង្ហោះលើគណនី Weibo របស់នាងពីខែវិច្ឆិកា ឆ្នាំ២០២៣ ដល់ខែមករា ឆ្នាំ២០២៤ សម្រាប់ «ការរំលោភលើច្បាប់និងបទប្បញ្ញត្តិវេទិកា» ដែលត្រូវបានចោទប្រកាន់ដោយសារតែការចូលរួមទស្សនាក្នុងការសម្តែងរបស់ Lisa សមាជិក BLACKPINK នៅទីក្រុងប៉ារីស។ នៅក្នុងប្រទេសចិន ការរាំស្រាតត្រូវបានចាត់ថ្នាក់ជា «សកម្មភាពទាក់ទងនឹងផ្លូវភេទ» ហើយអ្នកដែលនៅក្នុងឧស្សាហកម្មកម្សាន្តត្រូវបានហាមឃាត់មិនឱ្យរៀបចំ ចូលរួម ឬផ្សព្វផ្សាយសកម្មភាពបែបនេះ តាមច្បាប់របស់ប្រទេស។
Angelababy បច្ចុប្បន្នអាយុ ៣៥ ឆ្នាំ គឺជាតារាសម្តែង តារាបង្ហាញម៉ូត ស្ត្រីជំនួញ អ្នកវិនិយោគ និងជាតារាចម្រៀង។ នាងបានចាប់ផ្តើមអាជីពនៅក្នុងឧស្សាហកម្មកម្សាន្តក្នុងឆ្នាំ ២០០៧ហើយបានលេចមុខជាតារាសម្តែងដ៏លេចធ្លោម្នាក់របស់ប្រទេសចិន។ គណនី Weibo របស់នាងមានអ្នក Follow ជាង ១០៥លាននាក់ ដែលធ្វើអោយនាងក្លាយជាតារាដែលមានអ្នកតាមដានច្រើនជាងគេបំផុតនៅក្នុងប្រទេសចិន៕
