ថ្មីៗនេះ បន្ទាប់ពីមានការបង្ហោះចែកចាយនៅលើបណ្តាញសង្គម ដែលបង្ហាញឲ្យឃើញពីវត្តមានក្រដាសប្រាក់រៀលខ្មែរ មានដាក់លក់នៅលើអេបលក់ទំនិញដ៏ល្បី Coupang របស់ប្រទេសកូរ៉េ ខណៈលុយខ្មែរហាក់ទទួលបានហាងឆេងខ្ពស់ខ្លាំង ទើបបណ្តាលឲ្យមហាជនជាច្រើនមានការចាប់អារម្មណ៍ និងបញ្ចេញនូវមតិវែក.ញែកព្រោងព្រាត។
កាលពីថ្ងៃទី ១៧ ខែមិថុនា ឆ្នាំ២០២៤នេះ យោងតាមគណនីមួយដែលមានឈ្មោះថា Oun Chea បានធ្វើការដាក់បង្ហោះរូបថតប្រមាណ ២ សន្លឹកអមជាមួយនឹងខ្លឹមសារថា «ក្នុងនាមខ្ញុំជាខ្មែរម្នាក់ដែលនៅកូរ៉េពិតជារីករាយណាស់ លុយខ្មែរគេជឿថាជាលុយនាំលាភសំណាង។ លុយ ១០០ រៀលខ្មែរយើង មានលក់នៅតាមអេបលក់អីវ៉ាន់ដ៏ល្បីរបស់កូរ៉េ ១០០សន្លឹកតម្លៃ៣៥០០០វ៉ុន=២៥$=១០២៥០០រៀល, ក្រដាសលុយ៥ម៉ឺនរៀល លក់៥៤០០០វ៉ុន=៣២$=១៣០០០០រៀល, ក្រដាសប្រាក់១០ម៉ឺនរៀល លក់១០៨០០០វ៉ុន=៧៧ដុល្លារ=៣១៥៧០០រៀល (ជាកាដូរតំណាងអោយសំណាងល្អ)។
ទោះជាយ៉ាងណា បន្ទាប់ពីមានការដាក់បង្ហោះចែកចាយខាងលើរួចមក មហាជនខ្មែរជាច្រើនក៏បានចូលទៅបញ្ចេញមតិវែកញែក ដោយអ្នកខ្លះគឺបានលើកឡើងថា«ខ្ញុំស្រលាញ់ក្រដាស ១០០រៀលជាងគេ ហើយសន្សំទុកបានច្រើនណាស់ ជិតបានជាកូនភ្នំមួយហើយណា»។ អ្នកខ្លះទៀតថា«ក្រដាស១រយរៀល ខ្ញុំដាក់លើក្បាលដំណេកថ្វាយបង្គំរាល់ថ្ងៃ»។ អ្នកខ្លះថា«ខ្ញុំបានឃើញយប់មិញដែរ រីករាយណាស់»។
ជាមួយគ្នានេះ ក៏មានមតិមួយបានរិះគន់ថាបែបស្ថាបនាថា «គួរអោយអស់សំណើចណាស់ លុយខ្មែរ១០ម៉ឺនរៀលយកមកលក់ ១០៨០០០វ៉ុន ថ្លៃឬថោក? ហើយមកធ្វើជាប្រកាសមានមោទនភាពអោយអ្នកមិនគិតវែងឆ្ងាយជ្រួលជ្រើមទិញ ចុះបើស្រលាញ់លុយជាតិ ឬចង់ទុកអោយមានលុយជាតិក្នុងកាបូបម៉េចមិនផ្ញើរពីខ្មែរមកវិញ? បើខ្ញុំថាមិនខុសទេអ្នកលក់លុយនេះ១០០%គឺជាខ្មែរ ហើយបើលក់ថ្លៃកប់ពពកចឹងក៏គ្មានបរទេសណាគេទិញដែរ បើចង់អោយលុយខ្មែរមានតំលៃឬមានគេស្គាល់ច្រើនគួររកវិធីផ្សេងពីនេះមានវិធីច្រើនណាស់»៕
