ខឹងខ្លាំងពេក កាកា អូស្រ្តាលី ចង់ជួលសារព័ត៌មានឱ្យទៅសួរនាំអ្នកជិតខាងមិនចេះយោគយល់

សោកនាដកម្មនារសៀលថ្ងៃទី១៧ មិថុនា បានធ្វើឱ្យឧបនាយករដ្ឋមន្រ្តី អ្នកក្នុងចង្កោមសិល្បៈ សាធារណជនទូទាំងបង្ហាញភាពសោកស្តាយយ៉ាងខ្លាំងក្នុងហេតុការណ៍ដ៏តក់ស្លុតនេះ។ ជាមួយគ្នានេះអ្នកបង្កើតមាតិកានៅក្រៅស្រុក កាកា អូស្តា្រលី ខឹងចិត្តយ៉ាងខ្លាំងចំពោះអ្នកជិតខាងដែលខ្វះការយោគយល់រឿងបន្តិចបន្តួចត្រូវផ្តាច់ជីវិតមនុស្សពីរនាក់។ កាកា អូស្រា្តលី ក៏ព្រលះដូចគ្នាទៅកាន់ឧកញ៉ារូបនោះ និងសរសើរទៅកាន់គូដណ្តឹង លីសុង ស៊ូពាំងគ្រាប់កាំភ្លើងមិនរត់ចោលគ្នា។

នៅលើបណ្តាញសង្គម កាកា អូស្ត្រាលី អ្នកបង្កើតមាតិកាដ៏មានប្រជាប្រិយភាពមួយរូបមានមូលដ្ឋាននៅក្រៅស្រុកបានសរសេរបញ្ចេញអារម្មណ៍របស់ខ្លួននារសៀលថ្ងៃទី១៨ មិថុនា ថា «ចង់សួរទៅដល់អាអ្នកជួលផ្ទះអ្នកជិតខាង ម៉ោងនេះថ្មើរនេះពួកឯងមានអារម្មណ៍យ៉ាងម៉េចដែរ..? លទ្ធផលដែលអ្នកឯងចង់បានគឺឃើញគេបែបហ្នឹងមែនទេ..? ជម្លោះតិចតួចប៉ុណ្ណឹងសោះតើសមទេដែលត្រូវប្រហារគ្នាសម្រេចឈាមឆក់យកអាយុជីវិតមនុស្សដល់តែពីរនាក់របួសប៉ុន្មាននាក់..? ក្រុមគ្រួសារគេសម្រែកស្រែកយំ … អ្នកឯងសប្បាយចិត្តទេ..? ស៊ីបាយឆ្ងាញ់ទេ..? »។

អ្នកបង្កើតមាតិកាដដែលលើកឡើងទៀតថា « ឋានៈដល់តែឧកញ៉ា..! មិនដឹងឧកញ៉ាស្អីទេ..!និយាយត្រង់! មើលទៅប្រហែលធ្លាប់ធ្វើអ៊ីចឹងច្រើនដងហើយក៏ថាបាន ព្រោះធ្វើទៅទាំងរឿងមិនសមជារឿងក៏ធ្វើបាន ធ្វើទាំងមិនញញើត។
គ្រាន់តែមើលវីដេអូកន្លែងកើតហេតុភ្លាមដូចមានអារម្មណ៍ថា ហេតុផលរឿងហ្នឹងវាតិចតួចពេករហូតដល់អាចធ្វើថ្នាក់ហ្នឹងបានឬក៏មានអីលើសហ្នឹង? សង្ឃឹមថាមិនចូលតាមទ្វារមុខចេញតាមទ្វារក្រោយចុះ»។

អ្នកនាង កាកា ថា «បើតាមចិត្តខ្ញុំចង់តែជួលសារព័ត៌មានឱ្យទៅសួរនាំអ្នកជិតខាងហ្នឹងមែនតើ . .។ សូមសរសើរទឹកចិត្តល្អស្មោះស្ម័គរបស់ប្អូនស្រី ទោះមានរឿងអ្វីក៏មិននឹកគិតរត់ចោលគ្នា គួរឱ្យអាណិតប្អូនទាំងពីរណាស់..!។ មានទាំងចំណេះជំនាញជំនួញរូបសម្បត្តិក៏ល្អស្រស់ស្អាតទាំងពីរ ឃើញរូបថតរបស់គាត់មានស្នាមញញឹមរង់ចាំតែថ្ងៃរៀបការ តែបែរទៅជាមានរឿងបែបនេះទៅវិញ ខ្ញុំមានតែពាក្យថាអាណិត . . ដោយសារតែមិនចេះមានការអត់ឱនរឿងបន្តិចបន្តួចធ្វើឱ្យគ្នាអស់អនាគតទាំងក្មេងទាំងគូបែបនេះ . . ។សូមចូលរួមរំលែកទុក្ខដល់គ្រួសាររបស់គាត់ទាំងពីរ សូមឱ្យច្បាប់មានយុត្តិធម៌សម្រាប់គាត់ ដើម្បីឱ្យវិញ្ញាណក្ខន្ធរបស់ពួកគាត់បានស្ងប់បានទៅកាន់សុខគតិភពផងចុះ»។

គួរបញ្ជាក់ថា នៅថ្ងៃទី១៨ មិថុនា ទាក់ទងករណីផ្ទុះកក្រើកខ្មាន់កាំភ្លើងចូលបាញ់ដល់ផ្ទះ សមាគមឧកញ៉ាកម្ពុជា បានបញ្ជាក់ថា ជនសង្ស័យឈ្មោះ ស្រី ស៊ីណា គ្រាន់តែមានគោរមងារ »ឧកញ៉ា» ប៉ុន្តែមិនមែនជាសមាជិកសមាគម ឧកញ៉ាកម្ពុជា នៅឡើយទេ ហើយបច្ចុប្បន្ននេះ សមាគមឧកញ៉ាកម្ពុជា ស្នើសុំបញ្ចប់គោរមងារឧកញ៉ាពីជនសង្ស័យ៕