ពូលូវៃគឺជាកោះដ៏ស្រស់ស្អាតបំផុតមួយនៃឆ្នេរសមុទ្រកម្ពុជា ប៉ុន្តែហាក់រំលងភ្នែកភ្ញៀវទេសចរ។ កោះនេះស្ថិតនៅក្នុងខេត្តព្រះសីហនុ ដែលបងប្អូនប្រជាពលរដ្ឋខ្មែរប្រមាណ ៩៥% ស្គាល់តែឈ្មោះ ប៉ុន្តែមិនងាយបានស្គាល់ទីតាំងជាក់ស្ដែងនោះទេ។ កោះពូលូវ៉ៃជាដែនដីភាគខាងត្បូងចុងក្រោយបង្អស់របស់កម្ពុជា មុនចូលដល់ដែនទឹកសេដ្ឋកិច្ចផ្តាច់មុខ បន្ទាប់មកដែនទឹកសមុទ្រអន្តរជាតិ។ នៅលើដែនកោះនេះ មានកងការពារកោះឆ្នេរនិងសន្តិសុខលម្ហសមុទ្រ ឈរជើងប្រចាំការពារដែនកោះដ៏ស្រស់ស្អាតនេះផងដែរ។
កោះពូលូវៃមានផ្ទៃដីសរុបទំហំ ៣,៩ គីឡូម៉ែត្រការ៉េ ជាបណ្តុំប្រជុំកោះ ដែលមានកោះចំនួន ២ និងថ្មប៉ប្រះទឹក ឬអាចហៅថាជាកូនកោះតូចមួយ មានបណ្តោយលាតសន្ធឹង ៥ គីឡូម៉ែត្រ ទទឹងប្រហែល ១,៥ គីឡូម៉ែត្រ ស្ថិតនៅចម្ងាយប្រមាណ ១១០ គីឡូម៉ែត្រពីដីគោកនៃខេត្តព្រះសីហនុ ហើយក៏ជាប្រជុំកោះឆ្ងាយជាងគេបំផុតនៃដែនសមុទ្រកម្ពុជាផងដែរ។ កាលពីអតីតកាល តំបន់កោះនេះគឺជាដែនជម្លោះសមុទ្រ រវាងប្រទេសកម្ពុជា ថៃ និងវៀតណាម ប៉ុន្តែបច្ចុប្បន្នកោះពូលូវៃគឺជាតំបន់អភិរក្សជីវចម្រុះ និងជាទិសដៅតំបន់ មុជទឹកសមុទ្រថ្លាឈ្វេង សម្បូរដោយជីវចម្រុះ និងតំបន់មើលផ្កាថ្មស្រស់ស្អាតបំផុត ប្រចាំប្រទេសកម្ពុជា។
កោះពូលូវៃគឺជាតំបន់ប្រជុំកោះដ៏ស្រស់ស្អាតបំផុតមួយក្នុងប្រទេសកម្ពុជាយើង ដោយសារមានទឹកសមុទ្រខៀវថ្លាឈ្វេង និងបណ្តុំអេកូឡូស៊ីនៅបាតសមុទ្រ ជាពិសេសគឺមានផ្កាថ្មដ៏ស្រស់ស្អាតល្អឥតខ្ចោះ ដែលធ្វើឱ្យដែនសមុទ្រកម្ពុជាមានភាពទាក់ទាញ ជាពិសេសនោះគឺអ្នកនិយមការមុជទឹកមើលជីវៈចម្រុះនៅបាតសមុទ្រ។
ហេតុនេះដើម្បីធ្វើដំណើរទៅកាន់កោះនេះបាន ភ្ញៀវទេសចរត្រូវចំណាយពេលរៀងយូរបន្តិចតាមរយៈទូកឬអូប័រ។ នៅពេលដល់ទីនោះ ភ្ញៀវទេសចរ អាចសម្រាកបោះតង់ ឬជិះទូកស្ទូចត្រី អមជាមួយនឹងទឹកដ៏ថ្លាឈ្វង់ មើលឃើញដល់បាតថែមទៀតផង។ ថ្វីបើកោះនេះ មិនសូវមានភ្ញៀវទេសចរទៅកម្សាន្ត ក៏ប៉ុន្តែកោះនេះបានទាក់ចិត្តភ្ញៀវទេចរជាច្រើន ដែលនិយមមុជទឹកមើលបាតសមុទ្រ ព្រោះថាកោះនេះមានជីវចម្រុះធម្មជាតិ និងផ្កាថ្មជាច្រើនដ៏ស្រស់ស្អាតនៅក្រោមបាទសមុទ្រ។ ដូច្នេះភ្ញៀវទេសចរអាចមកទស្សនាទេសភាពដ៏អស្ចារ្យនៃកោះពូលូវៃ ដែលជាដែនដីភាគខាងត្បូងចុងក្រោយបង្អស់របស់កម្ពុជាយើង៕
