នៅក្នុងប្រទេសកម្ពុជារបស់យើងនាពេលបច្ចុប្បន្ននេះគឺមានខេត្តសរុបចំនួន ២៥ ខេត្ត។ ខេត្តនីមួយៗគ្រប់គ្រងដោយអភិបាលមួយរូប ដែលត្រូវបានតែងតាំងដោយក្រសួងមហាផ្ទៃ និងត្រូវមានការយល់ព្រមពីនាយករដ្ឋមន្ត្រី។ ខេត្តដែលធំជាងគេនៅក្នុងប្រទេសនេះគឺខត្តមណ្ឌលគិរី ហើយតូចជាងគេគឺខេត្តកែប។ ទោះជាយ៉ាងណាប្រិយមិត្តមួយចំនួនប្រាកដជាមិនទាន់ដឹងច្បាស់ទេថា តើខេត្តណាដែលមានវ័យចំណាស់ជាងបំផុតក្នុងប្រទេសកម្ពុជាយើង? ដូច្នេះអត្ថបទនេះយើងនឹងណែនាំប្រិយមិត្តមកស្គាល់ខេត្តខ្មែរដែលមានវ័យចំណាស់ជាងគេបំផុត។
ខេត្តដែលមានវ័យចំណាស់ជាងគេបំផុតនៅក្នុងប្រទេសកម្ពុជាយើងគឺខេត្តតាកែវ។ ខេត្តនេះត្រូវបានគេចាត់ទុកថាជា «ដើមកំណើតនៃអរិយធ៌មខ្មែរ»ដោយសារតែធ្លាប់ជាតំបន់កណ្តាលនៃនគរចេនឡាបន្ទាប់ពីការធ្លាក់ចុះនៃនគរភ្នំ។ ខេត្តតាកែវ ស្ថិតនៅភាគនិរតីនៃព្រះរាជាណាចក្រកម្ពុជា ដោយខេត្តនេះមានក្រុងមួយ និងស្រុកចំនួនប្រាំបួន ដែលមានផ្ទៃដីសរុប ៣,៦៨០.១៥ គីឡូម៉ែត្កការ៉េ ក៏ដូចជាមានប្រជាជនរស់នៅប្រមាណ ៩០០,០០០ នាក់។ 
ខេត្តចំណាស់ជាងគេនេះមានព្រំប្រទល់ខាងលិចជាប់នឹងខេត្តកំពត ភាគពាយ័ព្យជាប់នឹងខេត្តកំពង់ស្ពឺ ខាងជើងនិងខាងកើតជាប់ខេត្តកណ្ដាល និងភាគខាងត្បូងជាប់ជាមួយព្រំដែនអន្ដរជាតិប្រទេសវៀតណាម។ តាកែវគឺជាខេត្តដែលមានប្រវត្តិសាស្រ្តជាច្រើនទាក់ទងនឹងសម័យអាណាចក្រភ្នំ និងសម័យចេនឡា ដោយមានប្រាសាទបុរាណជាច្រើនរហូតដល់ ៣៤ ប្រាសាទដែលបានកសាងឡើងមុនសម័យអង្គររវាងសតវត្សទី ៥ ដល់ទី ៨ ។
យោងតាមពាណិជ្ជករនៃប្រទេសចិនបានរៀបរាប់ថា រាជាណាចក្រខ្មែរកាលពីដើមមានទីតាំងស្ថិតនៅតាកែវ ដែលមានឈ្មោះថា «ហ្វ៊ូណន» ហើយពួកគេបាននិយាយទៀតថា នេះជាព្រះរាជាណាចក្រដែលមានកំពែងព័ទ្ធជុំវិញ។ ភស្ដុតាងនៃវត្ថុបុរាណនៅអង្គរបុរី បានបញ្ជាក់ថាទីនេះជាកន្លែងមូលដ្ឋាននៃព្រះរាជាណាចក្រខ្មែរយ៉ាងសំខាន់ចាប់តាំងពីដើមឆ្នាំ ៤០០ មុនគ្រិស្តសករាជ។
ខេត្តតាកែវមានប្រាសាទបុរាណចំនួន ៣៤ ដែលបុព្វបុរសខ្មែរយើងបានបន្សល់ទុក ហើយក៏ជាដួងព្រលឹងនៃប្រជាជនខ្មែរកាលជំនាន់នោះនិងប្រទេសកម្ពុជាយើងផងដែរ។ ហើយប្រាសាទល្បីៗដែលទាក់ទងនឹងប្រវត្តិសាស្ត្ររួមមាន៖ ប្រាសាទភ្នំដា, ប្រាសាទបាយ៉ង់កោរ, ប្រាសាទនាងខ្មៅ, ប្រាសាទភ្នំជីសូរ, ប្រាសាទភ្នំតាម៉ៅ, ប្រាសាទបាទី, ប្រាសាទថ្មដុះ, ប្រាសាទតាព្រហ្មទន្លេបាទី, ប្រាសាទយាយពៅ, និងប្រាសាទជប់ពល។ ខេត្តនេះក៏ជាកេរ្តិ៍ដំណែលវប្បធម៌ ប្រវត្តិសាស្ត្រ និងធម្មជាតិដ៏សម្បូរបែប វាត្រូវបានគេស្គាល់ថាជាលំយោលនៃអរិយធម៌ខ្មែរ៕
