យោងតាម St Headline តារាចិន Liu Yifei ឬទស្សនិកជននិយមហៅថា សៀវ ឡុងនី ត្រូវបានគេរំពឹងថានឹងបង្ហាញខ្លួននៅក្នុងរឿងភាគទូរទស្សន៍ The Tale of Rose ដែលគ្រោងនឹងចាក់ផ្សាយនៅឆ្នាំនេះ។ ក្នុងរយៈពេលប៉ុន្មានឆ្នាំចុងក្រោយនេះ ស្នាដៃដែលនាងសម្តែងបានទទួលជោគជ័យ ទាំងគុណភាព និងបង្កើតនូវឥទ្ធិពលខ្ពស់ ជួយឱ្យនាងរក្សាតំណែងជាតារាកំពូលក្នុងវិស័យសិល្បៈចិន។
ប្រាក់កម្រៃផ្សាយពាណិជ្ជកម្មរបស់ Liu Yifei គឺស្ថិតក្នុងចំណោមតារាចិនដែលខ្ពស់បំផុតក្នុងចំណោមកិច្ចសន្យានីមួយៗដែលនាងទទួលបានប្រហែល ២៥ លានយន់ ប្រមាណ៣,៤ លានដុល្លារ។ Yifei គឺជាទូតសុឆន្ទៈសកលសម្រាប់ម៉ាកយីហោល្បីៗមួយចំនួនដូចជា LV, Bvlgari ជាដើម និងម៉ាកយីហោចិនប្រហែល១០ ។ ចាប់តាំងពីឆ្នាំ២០២៣មក នាងបានក្លាយជាទូតសុឆន្ទៈទេសចរណ៍របស់ទីក្រុង Abu Dhabi(អាប៊ូដាប៊ី) រាជធានីនៃប្រទេសអារ៉ាប់រួម។
យោងតាមប្រភពព័ត៌មានដូចជា Yahoo Finance, St Headline ទ្រព្យសម្បត្តិរបស់ Liu Yifei មានលើសពី ១.២៣ ពាន់លានយន់ ប្រមាណ១៧០លានដុល្លារ។ នាងមានផ្ទះវីឡាដ៏ធំនៅទីក្រុងប៉េកាំង ប្រទេសចិន និងវីឡាមួយនៅអាម៉េរិក។
យោងតាមសេចក្តីរាយការណ៍បានឱ្យដឹងថា តារាសម្តែងវ័យ៣៧ឆ្នាំរូបនេះមានភាពស្រស់ស្អាតរក្សាភាពទាក់ទាញរបស់នាងបន្ទាប់ពីជាង ២០ ឆ្នាំនៅក្នុងឧស្សាហកម្មកម្សាន្តដោយបានបន្សល់ស្នាដៃជាបន្តបន្ទាប់ដែលសមស្របតាមនិន្នាការទើបភាពល្បីល្បាញរបស់នាងមិនងាយស្រុះទោះបីតារាថ្មីដុះដូចផ្សិតក្តី។ 
កាលពីឆ្នាំមុន ភាពយន្ត Meet Yourself របស់ Liu Yifei បានជួយជំរុញវិស័យទេសចរណ៍នៅក្នុងខេត្តយូណាន ប្រទេសចិន។ អ្នកទេសចរជាច្រើនបានមកទីក្រុងនេះ និងឆែកឆេរនៅទីតាំងដែលនាងបង្ហាញខ្លួននៅក្នុងរឿង។ តារាចិនរូបនេះកើតនៅទីក្រុង Wuhan ប្រទេសចិន ហើយបានមករស់នៅអាម៉េរិកតាំងពីអាយុ ១០ ឆ្នាំ។ ៥ឆ្នាំក្រោយមក នាងបានត្រឡប់ទៅប្រទេសចិនវិញ ហើយបានសម្ដែងក្នុងរឿងដំបូងរបស់នាងមានចំណងជើងថា The Story of a Noble Family។ បន្ទាប់មកទៀត នាងបានសម្តែងក្នុងខ្សែភាពយន្តដែលចំណាយទុនច្រើននិងបានសាងភាពល្បីល្បាញដល់សព្វថ្ងៃ។
តារាស្រីរូបនេះ មានភាពតឹងតែងអំពីជីវិតផ្ទាល់ខ្លួនរបស់នាង ចាប់តាំងពី បែកគ្នាជាមួយតារាកូរ៉េ Song Seung heon ក្នុងឆ្នាំ២០១៧ មក នាងមិនបានបង្ហាញពីជីវិតស្នេហារបស់នាងជាសាធារណៈ ហើយក៏មិនមានពាក្យចចាមអារ៉ាមពាក់ព័ន្ធរឿងស្នេហាដែរ៕
