តើគួរសម្រាកប៉ុន្មានម៉ោងក្នុង១ថ្ងៃ ទើបគ្រប់គ្រាន់ និងសមស្រប? ទិន្នន័យមួយបានចែកចាយក្នុងបណ្តាញសង្គមនិយាយថា ៖ «ការសម្រាកបានតិច និងច្រើនជ្រុលពេក នឹងនាំឱ្យកើតជំងឺបេះដូង និងសរសៃឈាម» ។ តើការលើកឡើងបែបនេះជាការពិតដែរឬទេ?
ខាងក្រោមនេះ ជាការបកស្រាយរបស់លោកវេជ្ជបណ្ឌិតថៃ ឈ្មោះ Somkiat Saengwattanaroj ធ្វើការផ្នែកជំងឺបេះដូង និងសរសៃឈាមនៅមន្ទីរពេទ្យ King Chulalongkorn Memorial Hospital ។
លោកវេជ្ជបណ្ឌិត Somkiat Saengwattanaroj លើកឡើងថា វាជាការពិត ពីព្រោះមានការស្រាវជ្រាវបញ្ជាក់ថា ការសម្រាកតិចជាង៦ម៉ោង និងសម្រាកលើស៩ម៉ោងនៅពេលយប់ គឺអាចបណ្តាលឱ្យស្លាប់ដោយសារជំងឺបេះដូង និងសរសៃឈាម ព្រមទាំងស្លាប់ដោយសារជំងឺផ្សេងទៀត ។
ការសម្រាកតិច គឺពាក់ព័ន្ធនឹងការរស់នៅប្រចាំថ្ងៃ ជាពិសេស ការបរិភោគអាហារមិនត្រឹមត្រូវតាមពេលវេលា, បរិភោគអាហារពេលយប់, មិនរំលាយអាហារ និងមានជាតិស្ករខ្ពស់ក្នុងឈាម ។ មនុស្សមួយចំនួនចូលសម្រាកពេលយប់ជ្រៅ, ភ្ញាក់ពីដំណេកយឺតយ៉ាវ ឬពុំបានបរិភោគអាហារពេលព្រឹក ដែលជាអាហារដ៏សំខាន់បំផុតសម្រាប់រាងកាយ ។ រីឯអាហារគួរចៀសវាង គឺអាហារពេលយប់ ឬមុនចូលសម្រាក ។ ដូច្នេះ ទង្វើទាំងនេះជាកត្តាហានិភ័យបណ្តាលឱ្យកើតជំងឺទឹកនោមផ្អែម, លើសឈាម និងខ្លាញ់ខ្ពស់ក្នុងឈាម ។
ចំណែកពេលវេលាសម្រាក គឺជាពេលថែទាំរាងកាយ ហើយបើពេលថែទាំរាងកាយតិចតួច ដោយសាររាងកាយខុសធម្មតា ឬមានជំងឺ វានឹងធ្វើឱ្យយើងឈឺកាន់តែខ្លាំងឡើង ។ ដូច្នេះ ឥរិយាបថទាំងនេះជាកត្តាធ្វើឱ្យកើតជំងឺបេះដូង និងសរសៃឈាម ។
រីឯការសម្រាកច្រើនជ្រុលពេក ដោយពុំបានកម្រើករាងកាយ និងពុំហាត់ប្រាណ ហើយមនុស្សខ្លះភ្ញាក់យឺតយ៉ាវ ដោយពុំបរិភោគអាហារពេលព្រឹក, ពេលថ្ងៃត្រង់ និងពេលល្ងាច ប៉ុន្តែពួកគេក្រោកមកបរិភោគអាហារពេលយប់ ហើយសម្រាកបន្តទៀត ក៏ប្រឈមនឹងការកើតជំងឺបេះដូង និងសរសៃឈាមដូចគ្នាដែរ ។
លោកវេជ្ជបណ្ឌិត Somkiat Saengwattanaroj ណែនាំថា ការសម្រាកសមស្រប គួរតែសម្រាកជាមធ្យមចាប់ពី៧ម៉ោង ទៅ៩ម៉ោងក្នុង១ថ្ងៃ ។ ក្រៅពីពេលវេលាសម្រាក គុណភាពការសម្រាកក៏សំខាន់ដែរ ហើយការសម្រាកបានល្អ គឺមិនសម្រាកហើយភ្ញាក់ពេលយប់, មិនស្រមុក និងគួរចូលសម្រាកមុនម៉ោង១២យប់ ។ ការអនុវត្តតាមវិធីនេះជាការថែទាំសុខភាព និងកាត់បន្ថយហានិភ័យពីជំងឺបេះដូង និងសរសៃឈាម ៕
