ចាន់ សុបញ្ញា ម្ចាស់ពាន X Factor Cambodia ដែលធ្លាប់តែមានបទចម្រៀងបែបមនោសញ្ចេតនា ពេលនេះរូបគេបានផ្លាស់ប្តូររសជាតិថ្មីដោយបានចេញបទចម្រៀងរ៉េបវិញម្តង។ ការប្រឡូកលើវិស័យរ៉េបនេះ ចាន់ សុបញ្ញា ត្រូវបានអ្នកគាំទ្រស្ងើចសរសើរទឹកដមសំឡេងរបស់តារាចម្រៀងវ័យក្មេងរូបនេះដូចគ្នា។
នៅយប់ថ្ងៃទី១២ ខែមីនា ឆ្នាំ២០២៤ ផលិតកម្មរស្មីហង្សមាសបានទម្លាក់បទថ្មីរបស់ ចាន់ សុបញ្ញា មានចំណងជើងថា « I am Comeback» និពន្ធទំនុកច្រៀងដោយ OG Golden។ នេះ ជាមួយរសជាតិថ្មីរបស់ ចាន់ សុបញ្ញា ដែលច្រៀងរ៉េបឡើងឈ្ងុយ ធ្វើឱ្យអ្នកគាំទ្រភ្ញាក់ផ្អើលយ៉ាងខ្លាំងព្រោះធ្លាប់តែឃើញគេច្រៀងបែបស្លូតៗ និងចង្វាក់បែបប្រពៃណី។ អ្នកគាំទ្រ លើកឡើងស្រដៀងៗគ្នាថាមួយបទនេះ បញ្ញា រ៉េបបានល្អ ឡូយតែម្តង។.png)
ចាប់តាំងពីក្លាយជាម្ចាស់ពានទាំងវ័យក្មេង និងបានក្លាយជាតារាចម្រៀងកុងត្រា បទមនោសញ្ចេតនារបស់ ចាន់ សុបញ្ញា ដែលទទួលបានការគាំទ្រច្រើនជាងគេគឺបទ «ស្រលាញ់អ្នកណាក៏គេមានសង្សារ »មានការចូលស្តាប់ដល់ទៅ៤៦លានដងនៅលើឆាណែលយូធូប»។ ជាមួយគ្នានេះគេក៏នឹកឃើញដែរថា ទេព ពិសិដ្ឋ ក៏ជាម្ចាស់ពានវ័យក្មេងមួយរូបដែលប្តូររសជាតិនៃការច្រៀងដូចគ្នាពីការច្រៀងបទមនោសញ្ចេតនា មកជាច្រៀងរ៉េបវិញ ខណៈទទួលបានការគាំទ្រយ៉ាងខ្លាំងពីទស្សនិកជន។
គួរបញ្ជាក់ផងដែរថា កន្លងមកនេះមានការបង្ហើបថា ចាន់ សុបញ្ញា មានជំងឺទឹកនោមប្រៃរយៈពេល៣ឆ្នាំមកហើយដូច្នេះរបបអាហារហូបចុកត្រូវមានការប្រុងប្រយ័ត្នខ្ពស់។ តារាចម្រៀងវ័យក្មេងដែលជាម្ចាស់ពានកម្មវិធីលំដាប់ថ្នាក់ពិភពលោក X Factor Cambodia រូបនេះបាននិយាយថាឆ្នាំដំបូងដែលកើតជំងឺនេះមានភាពលំបាកខ្លាំង ពេលមិនតបប្រៃមានសភាពហើមដៃហើមជើង និងមុខផងដែរ។ ប៉ុន្តែនៅពេលហូបអាហារសាបមិនមានបញ្ហាហើមនោះទេហើយពេលនេះក៏ស្រួលខ្លួនមិនពិបាកដូចពេលដំបូងៗឡើយ៕
