ក្នុងឱកាសចម្រើនព្រះជន្មព្រះនាងតូចនរោត្តម ជេនណា ១២ព្រះវស្សា អ្នកបង្កើតមាតិកាល្បីឈ្មោះ ឆម ស្រីផាច បានស្កាត់ពីបន្ទាយមានជ័យឡើងមករាជធានីភ្នំពេញដើម្បីចូលរួមអបអរខួបកំណើតទ្រង់។ ជាមួយគ្នានេះ ព្រះនាងតូច បានរំលេចព្រះកាយដ៏ស្រស់ស្អាតក្នុងឈុតច្នៃពីផ្កាឈូកប្រាំពីរទងដែលតំណាងនៅថ្ងៃព្រះពុទ្ធប្រសូត្រ។ លើសពីនេះព្រះនាងតូចក៏បានជូនពរប្រជារាស្រ្តខ្មែរជួបតែសេចក្តីសុខផងដែរ។.png)
នៅថ្ងៃទី១១ ខែមីនា ឆ្នាំ២០២៤ នៅលើបណ្តាញសង្គមព្រះនាងតូច នរោត្តម ជេនណា បានបង្ហោះរូបភាពដ៏ស្រស់ស្អាត៤សន្លឹកភ្ជាប់ជាមួយខ្លឹមសារថា «រីករាយថ្ងៃរំលឹកកំណើតខ្ញុំ គម្រប់១២ឆ្នាំនៃឆ្នាំ២០២៤។ ឆ្នាំនេះជាឆ្នាំដែលខ្ញុំទទួលបាននូវក្តីរំភើបជាមួយសេចក្តីស្រឡាញ់ដ៏ហូរហៀរ ដែលកើតពេញពីបេះដូងរបស់អ្នកទាំងឡាយដែលស្រឡាញ់រាប់អាន និងថែខ្ញុំទាំងអស់។ ពិសេសការគាំទ្រដ៏មហិមាពីសំណាក់ពុកម៉ែបងប្អូនមហាគ្រួសារខ្មែរទាំងក្នុងប្រទេស និងក្រៅប្រទេស»។
ព្រះនាង រៀបរាប់ទៀតថា «យ៉ាងណាមិញ ថ្ងៃនេះ ខ្ញុំសូមបង្ហាញឈុតសម្លៀកបំពាក់ច្នៃថ្មីសម្រាប់អបអរសាទរថ្ងៃរំលឹកកំណើតខ្ញុំ ហើយក៏ចាត់ទុកជាសោភ័ណរូបថ្មីជូនពុកម៉ែបងប្អូនជិតឆ្ងាយទាំងអស់ផងដែរ ជាមួយនឹងសេចក្តីស្រឡាញ់របស់ខ្ញុំផ្ញើជូនពុកម៉ែបងប្អូនជិតឆ្ងាយ។ ឈុតមួយនេះច្នៃឡើងពីផ្កាឈូកប្រាំពីរទង តំណាងនៅថ្ងៃព្រះពុទ្ធប្រសូត្រ ទ្រង់បានឈានជំហានយាងផ្កាឈូកក៏បានផុសឡើងតាមជំហានទ្រង់ ម្ដងមួយៗ ពេលទ្រង់ចំរើនព្រះជន្មព្រះអង្គបានត្រាស់ដឹងពីផ្លូវព្រះធម៌ ឯព្រះហស្តទ្រង់កាន់ផ្កាឈូកប្រោសព្រំដល់មនុស្សសត្វនៅលើផែនដី»។ ក្នុងឱកាសនេះ ព្រះនាងតូច ក៏បានជូនពរដល់ប្រជាជនខ្មែរឱ្យមានសុខភាពល្អ អាយុយឺនយូរ និងមានសុភមង្គលគ្រប់ក្រុមគ្រួសារផងដែរ ខណៈមហាជនបានចូលទៅជូនពរទ្រង់ក្នុងឱកាសចម្រើនព្រះជន្មព្រះនាងតូចដូចគ្នា។
ព្រះនាងតូច គឺជាសែរាជវង្សមួយអង្គដែលប្រឡូកអាជីពសិល្បៈតាំងពីទ្រង់មានព្រះជន្ម៦ព្រះវស្សា ព្រមទាំងមានឈ្មោះបោះសំឡេងយ៉ាងខ្លាំងមិនថាវិស័យកុន ចម្រៀងបុរាណ សម័យ ចង្វាក់ K-Pop គឺទ្រង់អាចធ្វើបានទាំងអស់ពោរពេញដោយទេពកោសល្យទាំងទ្រង់នៅវ័យក្មេង៕
