ប្រទេសចិន ៖ សារព័ត៌មានបរទេសបានចុះផ្សាយ កាលពីថ្ងៃទី២៧ ខែកុម្ភៈ ឆ្នាំ២០២៤ ថា កាលពីដើមខែកុម្ភៈ ឆ្នាំ២០២៤ វិទ្យាស្ថានគ្រប់គ្រងអន្តរជាតិបានបង្ហាញពីសូចនាករនៃការផ្លាស់ប្តូររបស់ក្រុមហ៊ុនផ្សេងៗនៅប្រទេសចិន ។ ក្រុមហ៊ុនទាំងនេះបានផ្តល់ភាពសំខាន់ទៅលើផ្នែកបច្ចេកវិទ្យា, ឱសថ និងសម្លៀកបំពាក់ ហើយវិទ្យាស្ថានគ្រប់គ្រងអន្តរជាតិបញ្ជាក់ថា ចិននឹងក្លាយជាប្រទេសមហាអំណាចនៅលើពិភពលោក ផ្នែកវេជ្ជសាស្ត្រ និងបច្ចេកវិទ្យា ។
បើតាមរបាយការណ៍បង្ហាញថា បណ្តាក្រុមហ៊ុនបច្ចេកវិទ្យាអ៊ីនធើរណេតនៅតែបន្តគ្រប់គ្រងទីផ្សារបច្ចេកវិទ្យារបស់ប្រទេសចិន ក្នុងនោះមានដូចជា ៖ ក្រុមហ៊ុន Baidu, Alibaba, Tencent, JDcom និងក្រុមហ៊ុន NetEase សុទ្ធតែស្ថិតនៅក្នុងក្រុមហ៊ុនកំពូលចំនួន៥ ។
លោក Mark Greeven ជានាយកប្រតិបត្តិនៃវិទ្យាស្ថានគ្រប់គ្រងអន្តរជាតិប្រចាំប្រទេសចិនលើកឡើងថា ក្រុមហ៊ុនបច្ចេកវិទ្យានាំមុខគេចំនួន៣ រួមមាន ៖ ក្រុមហ៊ុន SMIC ផលិតបន្ទះឈីបដ៏ធំ, ក្រុមហ៊ុន Lenovo ផលិតកុំព្យូទ័រ និងក្រុមហ៊ុន Hikvision នាំមុខគេផ្នែកបច្ចេកវិទ្យាមានសុវត្ថិភាពនៅលើពិភពលោក គឺក្រុមហ៊ុនទាំងនេះនៅតែស្ថិតក្នុងក្រុមហ៊ុននាំមុខគេចំនួន១០ ។ រីឯបណ្តាក្រុមហ៊ុន Hidden Champions ផ្នែកបច្ចេកវិទ្យារបស់ប្រទេសចិន ក៏អាចក្លាយទៅជាគូប្រជែងលំដាប់ពិភពលោក នាថ្ងៃអនាគតផងដែរ ។
សូចនាករនេះបានសង្កត់ធ្ងន់ទៅលើការវាស់ស្ទង់រវាងបណ្តាក្រុមហ៊ុនអន្តរជាតិនៅក្រៅប្រទេស និងក្រុមហ៊ុនចិនផ្នែកឱសថ ហើយបច្ចុប្បន្ននេះ វាបាននាំមុខដោយបណ្តាក្រុមហ៊ុនល្បីៗ ដូចជា ៖ Pfizer, Roche, AstraZeneca និង Hengrui Pharmaceuticals ដែលជាក្រុមហ៊ុនបង្កើតថ្មីរបស់ប្រទេសចិន ។ ក្រៅពីនេះ ក្រុមហ៊ុនរថយន្ត BYD ព្រមទាំងក្រុមហ៊ុនថាមពលថ្មី និងថ្ម CATL នឹងឈរក្នុងលំដាប់ពិភពលោក ផងដែរ ។
លោក Mark Greeven នាយកប្រតិបត្តិនៃវិទ្យាស្ថានគ្រប់គ្រងអន្តរជាតិប្រចាំប្រទេសចិនបន្តទៀតថា ឆ្នាំ២០២៤ គឺជាឆ្នាំនៃកំណើនសេដ្ឋកិច្ចចិន ហើយបើមើលទៅលើការរីកចម្រើនក្នុងផ្នែកអចលនទ្រព្យ និងការនាំចេញរបស់ចិន ចាប់ពី៤% ទៅ៥% គឺវាបានក្លាយជាកត្តាជំរុញកំណើនសេដ្ឋកិច្ចប្រទេសចិនរហូតមក ៕
