លោកស្រី ប៊ុន ចាន់និមល អគ្គនាយិកាផលិតកម្មសាស្រ្តាហ្វៀម បាននិយាយប្តេជ្ញាចិត្ត៥ឆ្នាំតទៅមុននឹងធ្វើឱ្យកុនខ្មែរមានការទទួលស្គាល់ដូចកុនកូរ៉េ និង ហូលីវូដដែរ។ ការលើកឡើងរបស់លោកស្រីបន្ទាប់ពីខ្សែភាពយន្ត ម៉ែក្រឡាភ្លើង បានសម្ពោធថ្ងៃចាក់បញ្ចាំងនៅប្រទេសថៃរួចរាល់ហើយខណៈរឿងនេះកំពុងក្លាយជាប្រធានបទក្តៅគគុកនៅប្រទេសថៃ។
នៅថ្ងៃទី២៣ កុម្ភៈ ឆ្នាំ២០២៤ នេះលោកស្រី ប៊ុន ចាន់និមល បានLive នៅលើបណ្តាញសង្គមរបស់ខ្លួនរៀបរាប់អំពីស្ថានភាពភាពយន្ត ម៉ែក្រឡាភ្លើង ដែលនៅរោងកុនថៃដាក់ចំណងជើងថា «ម៉ែនុន»។ លោកស្រី និយាយថាភាពយន្តនេះមានការជជែកវែកញែកច្រើនកំពុងពេញនិយមនៅថៃដោយជនជាតិថៃមួយចំនួនបញ្ចេញមតិរិះគន់មិនសំចៃថាជាភាពយន្តចម្លងពីថៃជាដើម។
លោកស្រី ប៊ុន ចាន់និមល បាននិយាយថានៅពេលមានការសម្ភាសពីសារព័ត៌មានថៃដែលចាក់សម្ពោធកាលពីថ្ងៃទី២០ អ្នកនៅទីនោះនិយាយដោយបើកចិត្តទូលាយស្វាមគន៍ភាពយន្តខ្មែរលើកលែងតែអ្នកគិតអវិជ្ជមាននៅលើបណ្តាញសង្គមប៉ុណ្ណោះនៅតែនិយាយថារឿងនេះចម្លងទាំងមិនទាន់ទៅទស្សនា។ ការបញ្ចេញមតិអវិជ្ជមានពីមនុស្សមួយក្រុម លោកស្រី ថាមិនខុសពីអ្នកមួយចំនួនតូចនៅខ្មែរគិតអវិជ្ជមានលើរឿងនេះទាំងមតិភាគច្រើនទទួលស្គាល់ភាពយន្ត «ម៉ែក្រឡាភ្លើង»។
អគ្គនាយិកា រូបនេះ បាននិយាយទៀតថាមានជនជាតិថៃដែលបានទៅទស្សនាចាក់ក្នុងថ្ងៃសម្ពោធនេះបាននិយាយនៅលើបណ្តាញសង្គមសរសើរពីភាពយន្តមួយនេះព្រមទាំងលើកឡើងថា ម៉ែក្រឡាភ្លើង មិនបានចម្លងពីរឿងថៃ ម៉ែណាត និងលើកទឹកចិត្តឱ្យទៅមើលផ្ទាល់ ក្តីប៉ុន្តែអ្នកគិតអវិជ្ជមានទាំងនោះចូលទៅបញ្ចេញវាយប្រហារថែមទៀត។
ជាមួយគ្នានេះដែរ លោកស្រី ប៊ុន ចាន់និមល បានពន្យល់ពីមូលហេតុដែលភាពយន្ត ម៉ែក្រឡាភ្លើង បានផ្លាស់ប្តូរទៅជា ម៉ែនុន នៅរោងកុនថៃ ដោយសារតែពាក្យ ក្រឡាភ្លើង ថៃមិនមានទើបសម្រេចយកឈ្មោះតួស្រីក្នុងរឿងវិញឈ្មោះថា ម៉ែនួន តែដោយសារថៃពិបាកនិយាយពាក្យថា នួន ទោះប្តូរទៅជា នុន នេះឯង។
អគ្គនាយិកា សាស្រ្តាហ្វៀម លើកឡើងទៀតថា ដោយសារតែទទួលបានការគាំទ្រពីទស្សនិកជនជាតិខ្មែរ ទើបភាពយន្តមួយនេះអាចយកមកចាក់បញ្ចាំងនៅស្រុកគេបាន ខណៈលោកស្រីរំភើបចិត្តយ៉ាងខ្លាំងដែលភាពយន្តនេះទទួលបានការគាំទ្រឆាប់រហ័សពីទស្សនិកជននិងមានគម្រោងចាក់បញ្ចាំងរឿងនេះម្តងទៀតនៅក្នុងរោងកុនខ្មែរផងដែរ។
លោកស្រី បន្ថែមថា ការគាំទ្រក្នុងស្រុកគឺជាចលករសំខាន់នាំភាពយន្តខ្មែរឆ្ពោះទៅកាន់ពិភពលោកបើគ្មានការគាំទ្រក្នុងស្រុកទេ ភាពយន្តខ្មែរក៏មិនហ៊ានយកទៅចាក់បញ្ចាំងនៅក្រៅប្រទេសដូចគ្នា។ ជាមួយអារម្មណ៍រំភើបលាយជាមួយទឹកភ្នែក លោកស្រីប៊ុន ចាន់និមល និយាយថាតាំងពីបង្កើតភាពយន្តក្នុងឆ្នាំ២០១៥ ពេលនោះភាពយន្តខ្មែរមិនសូវមានអ្នកមើលនោះទេ ប៉ុន្តែបានមកដល់ចំណុចនេះជាមួយពាក្យស្លោកថា «ភាពយន្តខ្មែរឆ្ពោះទៅកាន់ពិភពលោក» ហើយក៏មិននឹកស្មានទទួលបានការគាំទ្រខ្លាំងយ៉ាងនេះ។
លោកស្រីថា ទោះបីជាពេលនេះមានអ្នកខម្មិនអវិជ្ជមានជាន់ពន្លិចផ្លូវចិត្តតិចតួចក៏ដោយប៉ុន្តែលោកស្រីប្រាប់ខ្លួនឯងថានឹងខិតខំធ្វើឱ្យល្អជាងនេះទៅទៀតទាល់តែអ្នកទាំងនោះលែងគិតអវិជ្ជមាន។
ការដើរមកឆ្ងាយដល់ចំណុចមួយដែលភាពយន្តរបស់ខ្លួនយកមកចាក់បញ្ចាំងស្រុកគេលោកស្រីប៊ុន ចាន់និមល ថាសាស្រ្តាហ្វៀមនឹងដើរឆ្ងាយជាងនេះទៅទៀតដោយលោកស្រីប្តេជ្ញាចិត្ត៥ឆ្នាំយ៉ាងតិចខាងមុខទៀតលោកស្រីនឹងធ្វើឱ្យភាពយន្តខ្មែរមានការទទួលស្គាល់ មានភាពល្បីល្បាញទូទាំងពិភពលោកដូចដែលកូរ៉េនិងហូលីវូដធ្វើបាន។
គួរបញ្ជាក់ថា ភាពយន្ត ម៉ែក្រឡាភ្លើង ឬ ម៉ែនុន នឹងចាក់បញ្ចាំងក្នុងរោងកុនថៃនាថ្ងៃទី២៩ ខែកុម្ភៈ នេះ៕
