តារាសម្តែង ហេង នរៈកក្កដា ដែលជាអតីតកីឡាករក្នុងក្រុមផ្ការីកគ្រប់រដូវក្រោយការដឹកនាំរបស់តារាកំប្លែង ពាក់មី បានបង្ហោះប្រយោគមួយឃ្លាពីមនុស្សមួយចំនួនតូចមើលស្រាលសមត្ថភាពខ្លួន ស្រាប់តែនាយ ពាក់មី តបទៅវិញដោយសង្ឃឹមថាប្រយោគរបស់ ហេង នរៈកក្កដា មិនមែនថាឱ្យខ្លួន។ នាយ ពាក់មី បានផ្តាំទៅ ហេង នរៈកក្កដា ទៀតថាធ្វើអ្វីធ្វើចុះសុំតែកុំឌឺដងខ្លួនបានហើយ។
ដូចមហាជនអ្នកតាមដានវិស័យកីឡាជ្រាបមកហើយថាក្រុមបាល់ទាត់ផ្ការីកគ្រប់រដូវ ដែលប្រកួតក្នុងគោលបំណងធំធ្វើសប្បុរសធម៌ ក្រោមការដឹកនាំរបស់លោក ចែម ចាន់រ៉ា ហៅតានាយ ពាក់មី បានបែកខ្ញែកគ្នាដោយតារាល្បីៗមួយចំនួនទៅបង្កើតក្រុមថ្មីមួយទៀតបន្ទាប់ពីបានទៅជួបជាមួយឧកញ៉ា ហេង ឡុង។ មកទល់ពេលនេះ តារាសម្តែង និងចម្រៀងល្បីៗមួយចំនួនបានទៅបង្កើតក្រុមថ្មីមួយទៀតមួយឈ្មោះថា Cambodia football super star ហើយមានតារាល្បីៗដូចជា ខេម គូម៉ា សេង មង្គល ហេង នរៈកក្កដា និង ដេន សាហ្វើជាដើម។
តារាកំប្លែងនាយ ពាក់មី ធ្លាប់បានចេញមុខបញ្ជាក់ម្តងហើយពីដើមចមដែលកីឡាកររបស់ខ្លួនចាកចេញពីក្រុមផ្ការីកគ្រប់រដូវ ប៉ុន្តែថ្មីៗស្រាប់តែកម្តៅនៃពាក្យសម្តី មេក្រុម ជានាយ ពាក់មី និងអតីតកីឡាករក្នុងក្រុមផ្ការីកគ្រប់រដូវ ហេង នរៈកក្កដា បានភាយឡើងនៅលើបណ្តាញសង្គម។
តារាសម្តែង ហេង នរៈកក្កដា បានបង្ហោះប្រយោគមួយថា «ខ្ញុំតែងតែផ្តល់នៅលទ្ធផលដែលខ្ញុំជោគជ័យ ជូនចំពោះមនុស្សមួយចំនួនតូចដែលមើលស្រាលនៅសមត្ថភាពខ្ញុំ ចេះឯងឱ្យក្រែងចេះគេ»។ ប្រយោគនេះដែរបានធ្វើឱ្យតារាកំប្លែងល្បីឈ្មោះប្រចាំប្រទេសនៅមិនសុខចេញមកបង្ហោះតបតទៅ ហេង នរៈកក្កដា ទាំងកណ្តាលអាធ្រាត្រឈានចូលថ្ងៃទី១១ ខែមករាថា «( កក្កដា ! សង្ឃឹមថាសំណេរនេះ ប្អូនមិនសំដៅលើបងចុះ ) បងចាំមិនភ្លេចទេ ប្អូនលេងក្រុមយើងសុខៗ ប្អូនទៅជួបបង ហេង ឡុង ដើម្បីបង្កើតក្រុមថ្មី ហើយយកកីឡាករក្រុមយើងទៅគ្មានប្រាប់បងមួយម៉ាត់ដែលជាបងជាអ្នកបង្កើត ផ្ការីកគ្រប់រដូវ »។
តារាកំប្លែងរូបនេះ បន្ថែមទៀតថា «យើងបានធ្វើរឿងល្អៗជាមួយគ្នាជាច្រើន មានការគាំទ្រពីបងប្អូនប្រជាពលរដ្ឋខ្មែរ បងខឹងណាស់ តែអរគុណបងហេងឡុង ដែលគាត់អាណិតបង គាត់ក៏រំសាយក្រុមនោះវិញ ហើយប្អូនក៏ទៅបង្កើតក្រមថ្មីរាល់ថ្ងៃនេះ តែប្អូនធ្វើអីធ្វើទៅសុំកុំឌឺដងបង បងសុំតែសុខទេ ជូនពរប្អូននិងក្រុមថ្មីបានជោគជ័យ»។
គួរបញ្ជាក់ផងដែរថា នៅរសៀលថ្ងៃទី២៩ ខែធ្នូ ឆ្នាំ២០២៣ ក្រុមបាល់ទាត់ផ្កាករីកគ្រប់រដូវបាននាំយកថវិកាចំនួន ៧ ៧៧៧ ដុល្លារអាម៉េរិកដែលឧបត្ថម្ភដោយភេសជ្ជៈមួយប្រភេទ ក្នុងព្រឹត្តិការណ៍ប្រកួតបាល់ទាត់មិត្តភាព រវាងក្រុមបាល់ទាត់ផ្ការីកគ្រប់រដូវ ជាមួយ ក្រុមបាល់ទាត់គុនខ្មែរ កាលពីពេលកន្លងមកនេះ មកជូនមូលនិធិគន្ធបុប្ផាកម្ពុជា ដើម្បីរួមគ្នាសង្រ្គោះជីវិតកុមារនៅកម្ពុជា។ហើយនេះជាលើកទី៣ហើយដែលក្រុមបាល់ទាត់ផ្ការីកគ្រប់រដូវ បានកៀរគរថវិកាពីការប្រកួតបាល់ទាត់មិត្តភាពនានា មកជូន មូលនិធិគន្ធបុប្ផាកម្ពុជា៕
