តារាចម្រៀងរ៉េប ពូឃ្លាំង និងលោក ណុប បាយ៉ារិទ្ធ តារាចម្រៀងចាស់វស្សាប្រចាំផលិតរស្មីហង្សមាសបានចេញមកចែករំលែកអមមកជាមួយពាក្យពេចន៍លើកស្ទួយទម្រង់សិល្បៈល្ខោនបាសាក់ខ្មែរ ស្របពេលបច្ចុប្បន្នកូនខ្មែរមានចំនួនធំស្ទើរតែបំភ្លេចសិល្បៈមួយនេះទៅហើយ។
ទម្រង់សិល្បៈល្ខោនបាសាក់ខ្មែរ ពុំសូវមានទីផ្សារសម្បូរហូរហៀរដូចជាស្រាបៀរនោះទេ ហើយទទួលបានមកវិញកូនខ្មែរមួយភាគធំ ពុំសូវគាំទ្រទម្រង់សិល្បៈបុរាណមួយនេះឡើយ រហូតលោក អុល សំអាង ដែលជាប្រធានក្រុមល្ខោនបាសាក់រាជធានីភ្នំពេញវង់ទី១ ជារឿយៗ លោកតែងតែអំពាវនាវឱ្យប្រជាជនជួយគាំទ្រដើម្បីជ្រួតជ្រាបពីគុណតម្លៃវប្បធម៌ជាតិយើងជាងការគាំទ្ររូបភាពបែបបំពុលសង្គម កំប្លែងអសីលធម៌ជាច្រើននៅលើបណ្តាញសង្គម។
តាមការអំពាវនាវឱ្យជួយគាំទ្រទម្រង់សិល្បៈល្ខោនបាសាក់ខ្មែរពីលោក អុល សំអាង នេះដែរតារាចម្រៀងរ៉េប ពូឃ្លាំង ចេញមកជួយចែករំលែកលើបណ្តាញសង្គមដោយភ្ជាប់ជាមួយខ្លឹមសារថា «ព្រោះខ្លាចបាត់បង់ ទម្រង់សិល្បៈល្ខោនបាសាក់ខ្មែរ ទើបប្រឹងប្រែងផ្សព្វផ្សាយ ប្រកាស សុំឱ្យប្រជាជន ក្នុងនិងក្រៅជួយគាំពារ សិល្បៈ ប្រកបដោយគំរូ មិនសម្តែង បែបបំពុល កំប្លែងអសីលធម៌។ ការរួមគ្នាជួយផ្សព្វផ្សាយ អភិរក្សមរតកទម្រង់សិល្បៈល្ខោនបាសាក់ខ្មែរ ឱ្យជ្រួលជ្រាបដល់ស្រទាប់មហាជន ជ្រោតជ្រាបពីគុណតម្លៃវប្បធម៌ជាតិយើង គួរតែផុសចេញពីទឹកចិត្ត ស្មារតី មនសិកានៃពលរដ្ឋយើងម្នាក់ៗ ដើម្បីការពារថែរក្សា បណ្តុះបណ្តាល គាំពារទ្រទ្រង់ ពីមូលធនជន ឥស្សរជន នៃជាតិយើង កុំភ្លេចនាំគ្នា ជួយថែសិល្បៈដូនតា…..!!!!»។
ជាមួយគ្នានេះដែរ លោក ណុប បាយ៉ារិទ្ធ ដែលជាតារាចម្រៀងល្បីមួយរូបរួមទាំងជាគ្រូបង្វឹកកម្មវិធី The Voice Cambodia ក៏បានជួយចែករំលែកពីទម្រង់សិល្បៈល្ខោនបាសាក់ដោយភ្ជាប់ជាមួយចំណងខ្លីតែមានអត្ថន័យជ្រាលជ្រៅថា «កុំភ្លេចនាំគ្នា ជួយថែសិល្បៈដូនតា ជួយគ្នាផ្សព្វផ្សាយ គាំទ្រ លើកស្ទួយទាំងអស់គ្នាកុំឱ្យបាត់បង់ទើបស្តាយក្រោយណាបងប្អូន»។
គួរបញ្ជាក់ថា ល្ខោនបាសាក់មានដើមកំណើតនៅ ស្រុកបាសាក់ ខេត្តឃ្លាំង ទល់មុខខេត្តព្រះត្រពាំង កម្ពុជាក្រោម ដោយដំបូងអ្នកស្រុកហៅថា ល្ខោនទ្រើងឃ្លោង អ្នកខ្លះនិយមហៅ ល្ខោនទ្រើងឃ្លោកនេះថាជា “យូកេរ្តិ៍” វិញ។ ពាក្យយូរកេរ្តិ៍នេះជាពាក្យដ៏មានតម្លៃសម្រាប់បញ្ជាក់ថា ទម្រង់សិល្បៈនេះគឺជាមរតកតាំងពីយូរលង់មកហើយរបស់ជនជាតិខ្មែរ។ ឈ្មោះនេះ ត្រូវបងប្អូនខ្មែរកម្ពុជាក្រោមប្រើប្រាស់រហូតមកដល់សព្វថ្ងៃសម្រាប់សំគាល់ទម្រង់ល្ខោនមួយដែលខ្មែរនៅកម្ពុជាយើងសព្វថ្ងៃនិយមហៅថា ល្ខោនបាសាក់នេះឯង៕
