ជារឿយៗ វណ្ណដា បានចេញទៅកើបលុយក្រៅស្រុកជាច្រើនដងទោះបីជាមិនមានប្រភពទម្លាយពីតម្លៃខ្លួនពិតមែន ប៉ុន្តែអ្នកគាំទ្រប៉ាន់ស្មានថាតម្លៃខ្លួន វណ្ណដា មិនតិចនោះទេ។ជាក់ស្តែងទើបតែទៅកើបលុយនៅឯតៃវ៉ាន់ប៉ុន្មានខែមុនពេលនេះ វណ្ណដា និង វណ្ណថាន ត្រៀមដឹកដៃគ្នាម្តងទៀតទៅកើបលុយនៅឯប្រទេសថៃវិញម្តង។
តាមការឱ្យដឹងពីផលិតកម្មបារមីលើបណ្តាញសង្គមនាយប់ថ្ងៃទី១១ ធ្នូ បានឱ្យដឹងថា វណ្ណដា និង វណ្ណថាន នឹងមានវត្តមាននៅការប្រគំតន្ត្រី Wonderfruit នៅថ្ងៃទី ១៥ ខែ ធ្នូ ឆ្នាំ ២០២៣ ខាងមុខដោយបានត្រៀមខ្លួនជាស្រេចក្នុងការនាំយកតន្ត្រីខ្មែរ បទចម្រៀងល្បីៗយកទៅសម្តែង។ ភ្ជាប់ជាមួយគ្នានេះ វណ្ណដា ក៏បានបង្ហាញអារម្មណ៍រំភើបចិត្តយ៉ាងខ្លាំងព្រោះរូបគេនឹងបានជួបអ្នកគាំទ្រនៅក្រៅស្រុកជាថ្មីឆាប់ៗនេះ ខណៈលោក វណ្ណថាន ក៏បង្ហើបដំណឹងល្អនេះទៅអ្នកគាំទ្ររបស់ខ្លួនផងដែរ។
កាលពីខែតុលា តារារ៉េបដ៏ល្បីឈ្មោះរូបនេះត្រូវបានកម្មវិធី«Takao Rock» អញ្ជើញទៅសម្តែងនៅឯតៃវ៉ាន់ ដោយមានសិល្បករល្បីៗពីបណ្តាប្រទេសផ្សេងៗចូលរួមខណៈ វណ្ណដា ជា សិល្បករកម្ពុជាម្នាក់ដែលត្រូវបានអញ្ជើញចូលរួមកម្មវិធីខាងលើនេះ។ កាលពីថ្ងៃទី១៦ ខែកក្កដា វណ្ណដា ក៏បានទៅកើបលុយនៅឯប្រទេសជប៉ុនជាលើកដំបូងផងដែរនៅក្នុងក្លិបកម្សាន្តមួយព្រមទាំងទទួលបានស្វាគមន៍យ៉ាងកក់ក្តៅដោយមានទាំងបង្ហាញរូប វណ្ណដា នៅផ្ទាំង LED ដ៏ធំ និងមានការចូលរួមទស្សនាយ៉ាងច្រើនកុះករពីទស្សនិកជន។.png)
ដោយឡែកការចេញទៅសម្តែងនៅឯប្រទេសថៃ នាថ្ងៃទី១៥ ធ្នូ ខាងមុខនេះវាមិនមែនជាលើកទី១សម្រាប់ វណ្ណដា និង វណ្ណថាន នោះទេខណៈកន្លងមកជារឿយៗខាងកម្មវិធីនៅប្រទេសថៃគឺនឹកនាមកដល់តារាចម្រៀងទាំងពីររូបនេះ។
គូសបញ្ជាក់ថា វណ្ណដា និង វណ្ណថាន ធ្លាប់អង្រួនឆាក Rolling Loud Thailand កាលពីខែមេសា កន្លងមក ដែលជាការប្រគំតន្រ្តីដ៏ធំមានការចូលរួមពីសិល្បករ សិល្បការិនី ខាងចម្រៀងរ៉េបជាច្រើននាក់ ខណៈតម្លៃខ្លួន វណ្ណដា ត្រូវបានគេនិយាយថាជិតខ្ទង់លានដុល្លារឯណោះ។
ទន្ទឹមនឹងនេះផងដែរ ផលិតកម្មបារមីបានប្រកាសដែរថា តារាចម្រៀងរ៉េបល្បីឈ្មោះ ម៉ាន់ វណ្ណដា , វណ្ណថាន រួមទាំងកញ្ញា កៅ សុហ្វៀ នឹងធ្វើការសម្ដែងជាលើកដំបូងឯសហរដ្ឋអាម៉េរិកក្នុងកម្មវិធីមហោស្រពប្រគំតន្រ្ដី Sabaidee Fest នាខែមិថុនា ឆ្នាំ២០២៤ ខាងមុខនេះដូចគ្នា៕.png)
