ធម្មតាតែមិនធម្មតា! បទចម្រៀង វណ្ណដា នៅ Spotify មានអ្នកស្តាប់រហូតដល់១៧៥ប្រទេស

ស័ក្តិសមជាសិល្បករល្បីល្បាញពិតមែននៅក្នុងកម្មវិធីតន្រ្តី Spotifyបទចម្រៀងរបស់ តារារ៉េប វណ្ណដា មានការStreamរហូតដល់១៦លានដង ខណៈអ្នកស្តាប់មានរហូតដល់១៧៥ប្រទេសក្នុងចំណោម១៩៥ប្រទេសនៅទូទាំងពិភពលោក។ សមិទ្ធផលដ៏អស្ចារ្យនេះ វណ្ណដា ក៏ថ្លែងអំណរគុណយ៉ាងជ្រាលជ្រៅចំពោះអ្នកគាំទ្រខ្លួននឹងឆ្ពោះទៅមុខជាមួយគ្នាបន្តទៀតសម្រាប់ឆ្នាំ២០២៤។

Spotify ដែលជាកម្មវិធីផ្តល់នូវសេវាកម្មជាច្រើនដូចជា សេវាកម្ម Digital Music, Podcast និង Video Streaming ជាដើមហើយមានអ្នកប្រើប្រាស់រាប់លាននាក់នៅជុំវិញពិភពលោក។ ជាមួយគ្នានេះ តារាចម្រៀង វណ្ណដា បានបង្ហាញពីសមិទ្ធផលរបស់ខ្លួននៅក្នុងកម្មវិធីដោយបទចម្រៀងរបស់លោកមានការ Stream រហូតដល់ ១៦លាន អ្នកស្តាប់៨៩០.៧K សរុបជាម៉ោង៩៧៧K ហើយមានអ្នកស្តាប់រហូតដល់១៧៥ប្រទេស។

ជារួមអាចនិយាយថា វណ្ណដា ជាសិល្បករខ្មែរដែលមានការស្តាប់នៅក្នុងកម្មវិធីខាងលើនេះច្រើនជាងគេក្នុងចំណោមសិល្បករខ្មែរផ្សេងជាមួយការស្តាប់ប្រចាំខែចំនួន១៣០K។ បទរបស់ វណ្ណដា ដែលពេញនិយមនៅ Spotify មានការស្តាប់ច្រើនជាងគេរួមមានបទ Bong , Queen Bee , Run The Town , កំលោះស្រុកខ្មែរ និង Hanuman Night ។

គួរបញ្ជាក់ផងដែរថា អស់រយៈពេល៤ខែមកហើយតាំងពីទម្លាក់បទ មហិច្ឆិតា ដើម្បីអបអរឆាណែលយូធូបរបស់ខ្លួនមានចំនួន៤លាន subscribers វណ្ណដា នៅមិនទាន់ទម្លាក់បទថ្មីនៅឡើយទេ ខណៈអ្នកគាំទ្រជាច្រើនកំពុងទន្ទឹមរង់ចាំស្នាដៃថ្មីរបស់តារាចម្រៀងរូបនេះ៕