កូនក្រុមរបស់គ្រូបង្វឹកខ្មែរមួយជីវិត រួមមានបេក្ខជន G One , Young Savage និងបេក្ខនារី ស៊ិន វិច្ឆិកា បានធ្វើឱ្យទស្សនិកជនរួមទាំងគ្រូបង្វឹកផ្សេងទៀតបូកជាមួយ វណ្ណដា ក៏អួលដើមកស្រក់ទឹកភ្នែកជាមួយអារម្មណ៍ដិតដាមនៃស្នាមអតីតកាលនិងការបាត់បង់ភាពកក់ក្តៅក្នុងរង្វង់គ្រួសារតាមរយៈចម្រៀងរ៉េប។
ក្នុងវគ្គ Battle កម្មវិធី The Rapper Cambodia នាយប់ថ្ងៃទី១២ វិច្ឆិកា ជាពេលវេលាកូនក្រុមរបស់គ្រូបង្វឹកខ្មែរមួយជីវិត បញ្ចេញសមត្ថភាពនិងត្រូវប្រកួតប្រជែងគ្នាដើម្បីមានឱកាសទៅវគ្គក្រោយជាបន្តទៀត។ ក្នុងនោះដែរបេក្ខជន វ័រ ជីវន្ត ហៅ G One បេក្ខនារី ស៊ិន វិច្ឆិកា និងបេក្ខជន សែម វិប៊ុត ហៅ Young Savage កំពុងធ្វើឱ្យទស្សនិកជនមានការចាប់អារម្មណ៍យ៉ាងខ្លាំងព្រោះតែការរ៉បរបស់អ្នកទាំង៣ទៅលើប្រធានបទ រងា បានរៀបរាប់ពីប្រវត្តិដ៏កំសត់របស់ខ្លួនបាត់បង់ភាពកក់ក្តៅ និងបញ្ហាផ្សេងៗគ្នាក្នុងបទតែមួយ។
អត្ថន័យដ៏ចាក់ដោតរបស់កូនក្រុមរបស់ខ្មែរមួយជីវិតទាំងបីរូបនេះមុនដំបូងពួកគេខ្សឹកខ្សួលមិនអាចបកស្រាយបានភ្លាមៗនោះ តែបន្ទាប់ពីសម្រាកបន្តិចអ្នកទាំងបីបានបញ្ចេញឃ្លារ៉េបរៀងៗខ្លួនធ្វើឱ្យអ្នកក្នុងកម្មវិធីខ្សឹកខ្សួលតែម្តង។ Producer វណ្ណដា ក៏បានបង្ហាញចំណាប់អារម្មណ៍របស់ខ្លួនដែរថា បេក្ខភាពទាំង៣ដែលរ៉េទៅលើប្រធានបទ រងា នេះចាក់ដោតអារម្មណ៍លោកខ្លាំងណាស់។
វណ្ណដា បានទម្លាយពីរឿងរ៉ាវផ្ទាល់ខ្លួនដែលមិនដែលប្រាប់អ្នកណាសូម្បីតែគ្រួសារ ពេលលោកឡើងមកភ្នំពេញតាមចាប់ក្តីស្រមៃរបស់ខ្លួនជាមនុស្សដែលគ្មានផ្ទះសម្បែងស្នាក់អាស្រ័យសូម្បីតែលុយទុកទិញចំណីអាហារមានត្រឹមតែ២០០០រៀល។ វណ្ណដា បានរម្លឹកពីភាពកំសត់កម្រជាមួយនឹង សង្ហា កាលពីអតីតកាលដូចគ្នាដោយម្នាក់មាន២០០០ ម្នាក់មាន៣០០០ចូលលុយគ្នាទិញបាយញុំា។ លើសពីនេះអារម្មណ៍រឹងមាំរបស់ Producer ជូលី ត្រូវបានទម្លាយចេញនូវរឿងអតីតកាលរបស់ខ្លួនដែលកម្សត់កម្រធ្លាក់ដល់បាតមីមួយកញ្ចប់ធ្វើជាអាហារ៣បីពេលដូចគ្នា។
មិនត្រឹមតែ Coach , Producer អ្នកចូលរួមកម្មវិធីផ្ទាល់បង្ហាញអារម្មណ៍ខ្សឹកខ្សួលប៉ុណ្ណោះទេសូម្បីទស្សនិកជនតាមគេហដ្ឋានដែលទស្សនាតាមរយៈការ Live ទប់ទឹកភ្នែកសឹងមិនជាប់អាណិតទៅដល់ការលំបាករបស់បេក្ខជនផងដែរ៕
