នៅយប់ថ្ងៃទី២០ ខែមេសា ឆ្នាំ២០២៣ សម្តេចតេជោ ហ៊ុន សែន នាយករដ្ឋមន្ត្រីនៃកម្ពុជា រួមជាមួយសម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន បានប្រកាសផ្តល់ជំនួយទឹកប្រាក់ចំនួន ៣ម៉ឺនដុល្លារ ទៅដល់តារាប្រុស បញ្ញា សិទ្ធ ដើម្បីយកទៅព្យាបាលម្តាយ។ ប្រសិនជាមានការខ្វះខាតទៀតអាចទាក់ទងទៅជំនួយការសម្តេចបាន។ បន្ទាប់ពីឃើញនូវទំហំទឹកចិត្តដែលមិនអាចកាត់ថ្លៃបានស្របពេលខ្លួនប្រកាសសុំជំនួយ បញ្ញា សិទ្ធ អរស្ទើរហោះថ្លែងអំណរគុណសម្តេចដែលបានជួយសង្គ្រោះម្តាយលោកប្រកបដោយអត្ថន័យជ្រាលជ្រៅ។
ដ្បិតជាតារាសម្តែង ចម្រៀង និង ពិធីករ ផង បញ្ញា សិទ្ធ ពុំសូវមានវត្តមានក្នុងអាជីពសិល្បៈក្នុងស្រុកឬរស់នៅស្រុកខ្មែរឡើយ ពោលតារាប្រុសរូបនេះរស់នៅក្រៅប្រទេសច្រើនជាង បន្ទាប់ពីលោកប្រកាសឈប់វិស័យសិល្បៈក្នុងស្រុកដោយសារតែក្តីអាក់អន់ចិត្តតារាជើងចាស់មិនត្រូវបានឱ្យតម្លៃស្មើនឹងតារា TikTok។ ទោះយ៉ាងណា ដ្បិតតែរស់នៅស្រុកគេច្រើនជាងស្រុកកំណើតប៉ុន្តែ បញ្ញា សិទ្ធ យូរៗម្តងក៏មកលេងស្រុកខ្មែរដែរ គ្រាន់តែលោកមិនបង្ហាញវត្តមានលើឆាកតន្រ្តីនានាឬបទសម្ភាសនោះទេ។
អ្វីដែលធ្វើឱ្យមហាជនភ្ញាក់ផ្អើលនោះ នៅថ្ងៃទី១៩ ខែមេសា ឆ្នាំ២០២៣ លោក បញ្ញា សិទ្ធ លែងមានភាពអៀនខ្មាសតទៀតបានបង្ហោះរូបម្តាយប្រកាសសុំជំនួយពីមហាជន និងអ្នកសិល្បៈតែម្តងក្រោយពីខ្លួនអស់លទ្ធភាពព្យាបាលម្តាយខណៈត្រូវការថវិកាដើម្បីវះកាត់នៅក្រៅស្រុក។
ក្រោយពីដំណឹងនេះសាយភាពពេញបណ្តាញសង្គមដែលតារាប្រុស បញ្ញា សិទ្ធ ត្រូវការជំនួយព្យាបាលម្តាយសម្តេចតេជោ នាយករដ្ឋមន្រ្តីនៃកម្ពុជា បានប្រកាសផ្តល់ជំនួយចំនួន៣ម៉ឺនដុល្លារ ព្រោះសម្តេចមើលឃើញថា បញ្ញា សិទ្ធ ជាកូនកតញ្ញូម្នាក់ដើម្បីជួយដល់ម្តាយបានបាត់មុខពីសិល្បៈប្រាក់ព្យាបាលជំងឺម្តាយ។ ក្នុងនោះ សម្តេច បានលើកឡើងទៀតថា ប្រសិនជាមានការខ្វះខាតការព្យាបាលទៀតអាចទាក់ទងទៅលោក សេង ទៀង តាមក្រោយទៀត។
ក្រោយពីសម្តេច ប្រកាសបែបនេះហើយ លោក បញ្ញា សិទ្ធ បានសរសេររៀបរាប់ថ្លែងអំណរគុណដោយក្តីរំភើបទៅកាន់សម្តេចថា «កូនចៅរំភើបណាស់ អរគុណលោកពុកជាទីគោរពរបស់កូនៗគ្រប់គ្នា សែនរំភើបណាស់ អំពើល្អ ទេវតាដើរដីគឺលោកពុកនិងអ្នកម្តាយជាទីគោរពរបស់កូនៗហ្នឹងហើយជាអ្នកជួយសង្រ្គោះម្តាយចៅ លោកពុក»៕
