ប្រទេសចំនួន ២ នៅតំបន់អាស៊ីអាគ្នេយ៍ នោះគឺឥណ្ឌូណេស៊ី និងទីម័រលែសត៍ (ទីម័រខាងកើត) នឹងមានឱកាសពិសេសមួយសម្រាប់ថ្ងៃព្រហស្បតិ៍ ទី២០ ខែមេសា ឆ្នាំ២០២៣ ដើម្បីទស្សនាបាតុភូតសូរ្យគ្រាសដ៏កម្រនោះ Hybrid Solar Eclipse ឬ សូរ្យគ្រាសកូនកាត់ ហើយតំបន់ឆ្នេរភាគពាយ័ព្យអូស្ត្រាលី ក៏នឹងមើលឃើញសូរ្យគ្រាសបែបកម្រនេះដូចគ្នា។
សម្រាប់សូរ្យគ្រាសកម្រនៅទីម័រខាងកើត និងឥណ្ឌូណេស៊ីនៅថ្ងៃព្រហស្បតិ៍ ទី២០ ខែមេសា ឆ្នាំ២០២៣នោះ នឹងចាប់ផ្តើមនៅវេលាម៉ោង ១១៖៤៣នាទីព្រឹក, ពេញលេញនៅម៉ោង ១៖១៣នាទីរសៀល និងបញ្ចប់ទៅវិញទាំងស្រុងនៅម៉ោង ២៖៥៣នាទីរសៀល (គិតតាមម៉ោងនៅទីក្រុងឌីលី ប្រទេសទីម័រខាងកើត)។
ដោយឡែកនៅទីក្រុងភ្នំពេញយើងវិញ គឺភាគរយៈបន្តិចនៃសូរ្យគ្រាស ដែលជះមកលើយើងនោះនឹងចាប់ផ្តើមនៅវេលាម៉ោង ១០៖៤៥នាទីព្រឹក, ដល់កម្រិតអតិបរមានៅម៉ោង ១១៖១៩នាទីព្រឹក និងបញ្ចប់ទៅវិញនៅវេលាម៉ោង ១១៖៥៣នាទីថ្ងៃត្រង់ ថ្ងៃព្រហស្បតិ៍ ទី២០ ខែមេសា ឆ្នាំ២០២៣៕
