អន្តរជាតិ៖ ប្រមុខចារកម្មយោធាអ៊ុយក្រែន បានអះអាងឱ្យដឹងថា លោក វ្ល៉ាឌីមៀ ពូទីន (Vladimir Putin) បានធ្លាក់ខ្លួនឈឺជាដំណាក់កាលដោយជំងឺមហារីក ហើយនឹងស្លាប់ក្នុងពេលឆាប់ៗនេះ។ នេះបើយោងតាមការចុះផ្សាយរបស់សារព័ត៌មាន Dailymail ។
លោក ឃីរីឡូ ប៊ូដាណាល់ (Kyrylo Budanov) ដែលជានាយកផ្នែកស៊ើបការណ៍សំខាន់នៃក្រសួងការពារជាតិអ៊ុយក្រែនបានពិភាក្សាអំពីសង្រ្គាមដែលកំពុងបន្តនិងមេដឹកនាំរុស្ស៊ីនៅក្នុងបទសម្ភាសន៍ជាមួយ ABC News កាលពីថ្ងៃពុធ ទី០៤ ខែមករា ឆ្នាំ២០២៣ ដោយលោកបានរំពឹងថា នឹងមានការផ្ទេរអំណាចទៅឱ្យទៅក្រុមអាណានិគមរុស្ស៊ីមួយផ្សេងទៀតបន្ទាប់ពីលោកពូទីន ត្រូវបានស្លាប់។
ការរំពឹងទុកអំពីសុខភាពលោកពូទីន បានបន្តជាច្រើនឆ្នាំមកហើយ មេដឹកនាំរុស្សីវ័យ ៧០ឆ្នាំរូបនេះ ត្រូវបានពាក្យចចាមអារ៉ាមថា កំពុងទទួលរងនូវជំងឺមហារីក ជំងឺផាកឃីនសុន និងជំងឺជាច្រើនផ្សេងទៀត។ ដោយលោក Budanov បាននិយាយថា “យើងគិតថាវាជាជំងឺមហារីក” ខណៈលោកបានបន្ថែមទៀតថាព័ត៌មានមួយនេះ «យើងទទួលបានពីប្រភពមនុស្សដែលជិតស្និទ្ធនឹងលោកពូទីន»។
ប៉ុស្តិ៍ Telegram General SVR ដែលអះអាងថា មានប្រភពខាងក្នុងមួយចំនួននៅក្នុងវិមានក្រឹមឡាំង បាននិយាយថា ថ្មីៗនេះវេជ្ជបណ្ឌិតរបស់លោកពូទីនបានកត់សម្គាល់ពី “ការចុះខ្សោយយ៉ាងខ្លាំងនៅក្នុងសុខភាពរបស់គាត់” ហើយបានផ្តល់អនុសាសន៍ថា គាត់ចាកចេញពីការបង្ហាញខ្លួនជាសាធារណៈណាមួយ ដូច្នេះគាត់អាចសម្រាកបាន។
បណ្តាញ Telegram ក៏បានរាយការណ៍ដែរថា ពេលនេះលោកពូទីន មានការចុះខ្សោយកម្លាំងខ្លាំងងាយនឹងវិលមុខ និងឈឺក្បាលជាញឹកញាប់ ហើយជួនកាលក៏បានសន្លប់បាត់ស្មារតីផងដែរ។ របាយការណ៍អំពីសុខភាពមិនល្អរបស់លោកពូទីនត្រូវបានគាំទ្រដោយការលុបចោលការធ្វើដំណើរដែលបានគ្រោងទុក និងការចូលរួមជាសាធារណៈមួយចំនួន។
កាលពីសប្តាហ៍មុនគឺនៅថ្ងៃទី២៨ ខែធ្នូលោកពូទីនបានដកខ្លួនចេញពីការធ្វើដំណើរដែលបានគ្រោងទុកទៅកាន់ ភូសស្កូ (Pskov) ដែលជាទីក្រុងនៅជិតព្រំដែនអេស្តូនី។ ការលុបចោលនេះត្រូវបានស្តីបន្ទោសជាផ្លូវការចំពោះលក្ខខណ្ឌនៃការហោះហើរមិនអំណោយផល ប៉ុន្តែការព្យាករណ៍អាកាសធាតុបានបង្ហាញថា អាកាសធាតុគ្មានអ្វីប្រក្រតីទេ គឺអំណោយផលបានល្អណាស់។
ជាមួយគ្នានេះដែរ ដំណើរទស្សនកិច្ចទៅកាន់រោងចក្ររថក្រោះដ៏ធំបំផុតរបស់រុស្ស៊ីនៅ នីស្នី ថាកូល (Nizhny Tagil) នៅលើភ្នំ អ៊ុយរ៉ាល់ (Ural) ក៏ត្រូវបានផ្អាកផងដែរ។ សូម្បីតែការបង្ហាញខ្លួនធម្មតានៅក្នុងកិច្ចប្រជុំចុងឆ្នាំនៃរដ្ឋមន្ត្រីរដ្ឋាភិបាលរបស់លោកក៏ត្រូវបានលុបចោល។
លោកពូទីន ក៏បានបដិសេធមិនបន្តធ្វើសន្និសីទកាសែតនៅខែធ្នូ ដែលជាធម្មតាយើងឃើញប្រធានាធិបតីនិយាយរហូតដល់បួនម៉ោង និងឆ្លើយសំណួរពីអ្នកកាសែត និងអ្នកទស្សនា។ សូម្បីតែការប្រកួតវាយកូនគោលលើទឹកកកចុងឆ្នាំរបស់ពូទីនក៏ត្រូវបានលុបចោលដែរ ៕
