បន្ទាប់ពីអាកាសធាតុក្តៅស្ងួតហួតហែងខ្លាំងបំផុតនៅកម្ពុជា ជាពិសេសចន្លោះខែមីនាដល់ខែមេសា សីតុណ្ហភាពកើនឡើងខ្ពស់រហូតដល់ខ្ទង់៤០អង្សាសេ។ ខណៈសេចក្តីប្រកាសព័ត៌មានចាប់ពីអំឡុងដើមខែឧសភានេះតទៅ នឹងចាប់ផ្តើមមានភ្លៀងធ្លាក់ជាបន្តបន្ទាប់។ 
អាកាសធាតុរបស់ប្រទេសកម្ពុជាត្រូវបានគ្របដណ្តប់ដោយខ្យល់មូសុង ដែលកំណត់បានជា២រដូវកាលធំៗគឺរដូវប្រាំងនិងរដូវវស្សា។ ចំពោះរដូវវស្សា ចាប់ពីខែឧសភាដល់ខែតុលា ខ្យល់បោកបក់ខ្លាំងនៃខ្យល់មូសុងនារតីនឹងនាំឲ្យមានភ្លៀងធ្លាក់ខ្លាំងនិងសំណើមខ្ពស់។ រដូវប្រាំង ខែវិច្ឆិកាដល់មេសា ខ្យល់មូសុងឦសាន នឹងធ្វើឲ្យអាកាសធាតុក្តៅស្ងួតហួតហែង ភ្លៀងធ្លាក់តិចនិងសំណើមទាប។
ការផ្លាស់ប្តូរអាកាសធាតុពីក្តៅមកត្រជាក់ ដែលបង្កឲ្យមានភ្លៀងធ្លាក់ជាបណ្តើរឡើងវិញនេះ និងជាការទន្ទឹងរងចាំរបស់មនុស្សគ្រប់ៗរូបកំពុងតែជិតចូលមកដល់។ យ៉ាងណាមិញ ការព្រួយបារម្ភមួយចំពោះការប៉ះពាល់ដោយផ្ទាល់នូវដំណក់ទឹកភ្លៀងដំបូង ទំនងជាមិនសូវជាល្អប៉ុន្មានទេ ក្រោមហេតុផលដូចក្រោមនេះ៖
១ ដំណក់ភ្លៀងដំបូងគឺជាការបំពុលបរិយាកាសកម្រិតខ្ពស់៖ ភ្លៀងដំបូងជាធម្មតាគឺនឹងប្រមូលផ្តុំនូវសារធាតុពុល និងសារធាតុគ្រោះថ្នាក់ផ្សេងៗទៀតនៅក្នុងបរិយាកាស។ ទោះជាយ៉ាងណា អ្នកគឺមិនគួរត្រូវទឹកភ្លៀងក្នុងអំឡុងពេលនោះទេ ព្រោះថាសារធាតុពុលដែលប្រមូលផ្តុំក្នុងស្រទាប់បរិយាកាសនឹងត្រូវបញ្ចេញចុះមកតាមរយៈទឹកភ្លៀង ដែលបណ្តាលឲ្យរាងកាយរបស់អ្នកទទួលបាននូវជំងឺផ្សេងៗជំនួសមកវិញ។
២ ភ្លៀងនឹងបង្កគ្រោះថ្នាក់នៅតាមដងផ្លូវ៖ អំឡុងពេលភ្លៀងនឹងធ្វើឲ្យផ្លូវរអិល ដោយមិនបានត្រៀមខ្លួន ព្រមជាមួយនឹងកង្វះនូវការប្រុងប្រយ័ត្ន ជាហេតុបង្កគ្រោះថ្នាក់យ៉ាងងាយដល់អ្នកកំពុងធ្វើដំណើរទាំងអស់នៅតាមដងផ្លូវ។ ជាការល្អ អ្នកគួរតែឈប់សម្រាកនៅកន្លែងណាដែលសមរម្យសិន ចាំបន្តដំណើរទៅមុខទៀត បន្ទាប់ពីរាំងភ្លៀង។
៣ ផលប៉ះពាល់នៃការផ្លាស់ប្តូរកម្រិតសីតុណ្ហភាពភ្លាមៗពីក្តៅមកត្រជាក់៖ ភាពខុសគ្នានៃសីតុណ្ហភាពនៃដំណក់ភ្លៀងដំបូង និងខែប្រាំងស្ងួតហួតហែងមុននោះ នឹងបង្ហកឲ្យមានផលប៉ះពាល់ខ្លាំង ជាពិសេសគឺអ្នកដែលទទឹកដោយទឹកភ្លៀង។ វានឹងប៉ះពាល់ដល់ប្រព័ន្ធការពាររាងកាយ ស្របពេលដែលអ្នកមិនទាន់ស៊ាំនឹងសីតុណ្ហភាព ក៏ដូចជាលក្ខខណ្ឌជាក់លាក់ណាមួយ ដែលនឹងបង្កជាជំងឺផ្សេងៗដូចជា បញ្ហាផ្លូវដង្ហើម ជំងឺអាឡែកស៊ី ឈឺក្បាល ឈឺសន្លាក់ជាដើម៕
