អន្តរជាតិ៖ ប្រធានាធិបតីអាម៉េរិកលោក ចូ បៃដិន បាននិយាយកាលពីថ្ងៃព្រហស្បតិ៍ទី២៤កុម្ភៈថា ប្រទេសណាដែលគាំទ្រការវាយលុករបស់រុស្ស៊ីនៅអ៊ុយក្រែននឹងត្រូវ”ប្រឡាក់ប្រឡូកក្នុងការឈ្លានពាននេះដែរ” បន្ទាប់ពីប្រទេសចិនបានច្រានចោលការហៅទង្វើរបស់ទីក្រុងមូស្គូថាជាការឈ្លានពាន ហើយជំនួសមកវិញបានជំរុញឱ្យភាគីទាំងអស់អនុវត្តការអត់ធ្មត់។
កងកម្លាំងអ៊ុយក្រែនបានប្រយុទ្ធប្រឆាំងនឹងការឈ្លានពានរបស់រុស្ស៊ីនៅជ្រុងទាំងបី បន្ទាប់ពីទីក្រុងមូស្គូបានបើកការវាយប្រហារលើអ៊ុយក្រែនតាមផ្លូវគោក ផ្លូវសមុទ្រ និងផ្លូវអាកាសក្នុងការវាយប្រហារដ៏ធំបំផុតលើរដ្ឋអឺរ៉ុបមួយចាប់តាំងពីសង្គ្រាមលោកលើកទី២។
ថ្លែងទៅកាន់អ្នកសារព័ត៌មាននៅឯសេតវិមាន កន្លែងដែលលោកបានបង្ហាញពីការដាក់ទណ្ឌកម្មថ្មីដ៏តឹងតែងលើរុស្ស៊ីដែលសម្របសម្រួលជាមួយសម្ពន្ធមិត្ត លោកបៃដិនបាននិយាយថាសកម្មភាពរបស់ប្រធានាធិបតីរុស្ស៊ីលោកវ្ល៉ាឌីមៀរ ពូទីនតំណាងឱ្យពេលវេលាដ៏គ្រោះថ្នាក់សម្រាប់សេរីភាពនៅជុំវិញពិភពលោក។
លោកបៃដិនបាននិយាយដោយមិននិយាយចំៗឈ្មោះចិន យ៉ាងដូច្នេះថា “ពូទីននឹងក្លាយជាអ្នកគ្មានអ្នករាប់រកនៅលើឆាកអន្តរជាតិ។ ប្រទេសណាដែលបង្ហាញគាំទ្រការឈ្លានពានឥតអៀនខ្មាស់របស់រុស្ស៊ីប្រឆាំងនឹងអ៊ុយក្រែននឹងត្រូវប្រឡាក់ប្រឡូកក្នុងការឈ្លានពាននេះដែរ”។
នៅពេលសួរថាតើគាត់កំពុងជំរុញឱ្យចិនដាក់រុស្ស៊ីឱ្យនៅឯកោឬយ៉ាងណា លោកបៃដិននិយាយថា “ខ្ញុំមិនបានត្រៀមខ្លួនធ្វើអត្ថាធិប្បាយលើរឿងនេះនៅពេលនេះទេ”។
លោកបៃដិនបាននិយាយថា សកម្មភាពរបស់លោកពូទីន “បង្ហាញឱ្យឃើញចក្ខុវិស័យដ៏អាក្រក់សម្រាប់អនាគតនៃពិភពលោករបស់យើងកន្លែងដែលប្រទេសនានាអាចទទួលបានអ្វីៗដែលពួកគេចង់បានដោយប្រើកម្លាំង”។
អ្នកវិភាគភូមិសាស្ត្រនយោបាយមួយចំនួនបាននិយាយថា សកម្មភាពរបស់រុស្ស៊ីអាចជំរុញទឹកចិត្តឱ្យចិនវាយលើកោះតៃវ៉ាន់ ជាកោះដែលគ្រប់គ្រងតាមបែបប្រជាធិបតេយ្យ ដែលប៉េកាំងនិយាយថាជាផ្នែកមួយរបស់ចិន ហើយបានប្តេជ្ញាទាមទារយកវិញដោយប្រើកម្លាំងបើចាំបាច់។
រុស្ស៊ីបានវាយប្រហារអ៊ុយក្រែននៅបីសប្តាហ៍បន្ទាប់ពីលោកពូទីនបានជួបជាមួយមេដឹកនាំចិនលោក ស៊ី ជីនភីង មុនពេលការមកដល់នៃកីឡាអូឡាំពិករដូវរងានៅទីក្រុងប៉េកាំងដែលបានបញ្ចប់កាលពីថ្ងៃអាទិត្យ។ មេដឹកនាំទាំងពីរបានប្រកាសភាពជាដៃគូយុទ្ធសាស្ត្រក្នុងគោលបំណងទប់ទល់នឹងឥទ្ធិពលរបស់សហរដ្ឋអាម៉េរិក ហើយបាននិយាយថាពួកគេនឹងមិនមានផ្នែក “ហាមឃាត់”នៃកិច្ចសហប្រតិបត្តិការនោះទេ ៕