បវរកញ្ញា អ៊ិន លក្ខិណា Miss world Cambodia 2026 បានបង្ហាញអារម្មណ៍រំភើប និងសេចក្តីរីករាយបន្ទាប់ពីទទួលបានការលើកសរសើរនិងការថ្លែងអំណរគុណពី សម្តេចតេជោ ហ៊ុន សែន ពាក់ព័ន្ធនឹងការចូលរួមរបស់នាងក្នុងការងារសង្គម និងសកម្មភាពសប្បុរសធម៌ទាំងក្នុងវិស័យរដ្ឋ និងឯកជន។
តាមរយៈសារបង្ហោះនៅលើបណ្តាញសង្គមនាថ្ងៃទី២៧ ខែកញ្ញា អ៊ិន លក្ខិណា បានសម្តែងការគោរពនិងអំណរគុណចំពោះ សម្តេចតេជោ ហ៊ុន សែន ព្រមទាំងថ្នាក់ដឹកនាំដែលបានផ្តល់ការលើកទឹកចិត្តដល់ការងារសង្គមរបស់នាងនិងក្រុមការងារ។ នាងបានលើកឡើងថា ខ្លួននិងក្រុមការងារ រួមទាំងសប្បុរសជន មានក្តីរំភើបយ៉ាងខ្លាំងបន្ទាប់ពីបានស្តាប់ប្រសាសន៍របស់សម្តេចតេជោ ហ៊ុន សែន ពាក់ព័ន្ធនឹងការងារដែលពួកគេបានចូលរួមកន្លងមក។
អ៊ិន លក្ខិណា ក៏បានបញ្ជាក់ថាខ្លួននិងក្រុមការងារមានគម្រោងបន្តចូលរួមក្នុងសកម្មភាពសង្គម និងការអភិវឌ្ឍសហគមន៍ ជាពិសេសការចូលរួមជួយប្រជាពលរដ្ឋដែលរងផលប៉ះពាល់ និងការផ្សព្វផ្សាយវប្បធម៌ និងវិស័យទេសចរណ៍កម្ពុជាទៅកាន់អន្តរជាតិ។ បវរកញ្ញារូបនេះក៏បានថ្លែងអំណរគុណដល់លោកឧកញ៉ា ចិន សំណាង និងក្រុមការងារព្រមទាំងសប្បុរសជន ដែលបានចូលរួមគាំទ្រសកម្មភាពសង្គមជាមួយនាង។ ជាមួយគ្នានេះ អ៊ិន លក្ខិណា ក៏បានថ្លែងអំណរគុណដល់ លោកជំទាវ ញ៉ែម មរកត រដ្ឋលេខាធិការនៃក្រសួងកិច្ចការនារី ដែលបានដឹកនាំ និងជួយសម្របសម្រួលឱ្យនាងបានចូលរួមក្នុងសកម្មភាពការងារសង្គមនានាផងដែរ។
TOP40 Miss world 2026 បានសន្យាយ៉ាងដូច្នេះថា «ចៅនិងក្រុមការងារ រួមជាមួយសប្បុរសជន នឹងខិតខំប្រឹងប្រែងដើម្បីចូលរួមអភិវឌ្ឍន៍ភូមិរស់នៅរបស់ជនភៀសសឹក និងផ្សព្វផ្សាយវប្បធម៌ ទេសចរណ៍ទៅកាន់ពិភពលោក ក្រោមការដឹកនាំដ៍ខ្ពង់ខ្ពស់ប្រកបដោយភាពឈ្លាសវៃនិងគតិបណ្ឌិតរបស់សម្តេចតាប្រមុខរដ្ឋស្តីទី សម្តេចធិបតីនាយករដ្ឋមន្ត្រី និងសម្តេចយាយកិត្តិបណ្ឌិត ប៊ុន រ៉ានី ហ៊ុនសែន និងលោកជំទាវបណ្ឌិត ជាទីគោរពដ៏ខ្ពង់ខ្ពស់បំផុត។ សូមសម្តេចទាំង៣ មេត្តាទទួលនូវការគោរព ស្រឡាញ់ ដឹងគុណ ដ៍ខ្ពង់ខ្ពស់បំផុត អំពីចៅ លោកឧកញ៉ា និងក្រុមការងារ»៕
