អ៊ីវ៉ា លើកឡើងបែបនេះក្រោយ Vinmart បញ្ចេញវីដេអូមួយនិយាយពីបញ្ហាសេដ្ឋកិច្ច

តារាចម្រៀង អ៊ីវ៉ា បានបង្ហោះនៅលើបណ្តាញសង្គម ដោយលើកឡើងពីការខិតខំប្រឹងប្រែងរបស់ម្ចាស់អាជីវកម្ម និងបុគ្គលិក ក្នុងបរិបទដែលស្ថានភាពអាជីវកម្ម និងសេដ្ឋកិច្ចបច្ចុប្បន្នមិនសូវមានភាពងាយស្រួល។

ការលើកឡើងរបស់តារាចម្រៀង អ៊ីវ៉ា ធ្វើឡើងបន្ទាប់ពី Vinmart បានចែករំលែកវីដេអូមួយ ដែលបង្ហាញពីម៉ាតចិនមួយកន្លែងនៅម្តុំព្រៃទា ដែលហាងនេះមានទំហំធំទូលាយ ប៉ុន្តែហាក់ដូចជាមិនសូវមានអតិថិជនចូលទិញទំនិញ។ Vinmart ក៏បានលើកឡើងថា ហាងនេះអាចនឹងបិទ ឬត្រូវបានសេងក្នុងរយៈពេលប្រមាណ ៣ ខែខាងមុខ។

ជាមួយគ្នានេះ Vinmart ក៏បាននិយាយអំពីអាជីវកម្មប្រភេទ Franchise Mart ដោយលើកឡើងថា ក្នុងអំឡុងពេលសេដ្ឋកិច្ចជួបការលំបាក ការវិនិយោគលើអាជីវកម្មប្រភេទនេះអាចមានហានិភ័យ ប្រសិនបើអ្នកវិនិយោគខ្វះចំណេះដឹង និងការយល់ដឹងអំពីអាជីវកម្ម។ ក្រោយឃើញការលើកឡើងរបស់ Vinmart អ៊ីវ៉ា ក៏បានចែករំលែកទស្សនៈផ្ទាល់ខ្លួន ដោយផ្តោតលើការខិតខំប្រឹងប្រែងរបស់ខ្លួនក្នុងនាមជាម្ចាស់អាជីវកម្ម និងការរក្សាការងារឱ្យបុគ្គលិក។

អ៊ីវ៉ា បានសរសេរថា «ការពិតបច្ចុប្បន្ននេះមិនស្រួលទេ ខ្ញុំតែងតែដាស់តឿនបុគ្គលិកខ្ញុំជារឿយៗ មានការងារធ្វើ ប្រាក់ខែសមរម្យហើយ ប្រឹងទៅ កុំខ្ជិលគេចវេស ព្រោះមេនេះប្រឹងណាស់ ដើម្បីបើកលុយឱ្យគ្រប់គ្នាជារៀងរាល់ខែ»។
តារាចម្រៀងរូបនេះក៏បានថ្លែងអំណរគុណដល់បុគ្គលិកដែលខិតខំបំពេញការងារ និងយល់ពីស្ថានភាពការងារ ដោយមិនធ្វើឱ្យនាងត្រូវចំណាយពេលពន្យល់ ឬដាស់តឿនជាច្រើនដង។

ការលើកឡើងរបស់ អ៊ីវ៉ា បង្ហាញពីទស្សនៈរបស់ខ្លួនចំពោះការគ្រប់គ្រងអាជីវកម្ម និងការទទួលខុសត្រូវរបស់ខ្លួនក្នុងនាមជាមេមួយរូបទោះបីស្ថានភាពអាជីវកម្មមិនសូវងាយស្រួលក៏ដោយនៅពេលនេះ។

ជាពិសេសសារ Vinmart ត្រូវបានមនុស្សជាច្រើនមើលឃើញថានាងមានបំណងចង់ដាស់តឿនទៅកាន់អ្នកដែលចង់ទិញ Franchise Mart មុននឹងវិនិយោគលើអាជីវកម្មនេះត្រូវគិតពិចារណាឱ្យបានច្បាស់លាស់។ ជាមួយគ្នានេះ នាងក៏បានអះអាងថាការដែលចេញវីដេអូបែបនេះមិនមែនខ្លាចគេដណើមភ្ញៀវទោះទេពីព្រោះនាងក៏មាន Franchise Mart លក់ ហើយមានម្តាយគឺអ្នកលក់បោះដុំស្រាប់ ប៉ុន្តែអ្វីដែលបង្ហាញគឺជាភាពស្មោះត្រង់ទៅកាន់អ្នកចង់បើកអាជីវកម្មលើម៉ាតនេះមិនមែនជារឿងងាយស្រួលឡើយ៕