មនុស្សនៅពីក្រោយដែលជួយ Zhao Lusi ងើបឡើងវិញបន្ទាប់រងនូវរឿងអាស្រូវខ្លាំងក្នុងអាជីព

ថ្មីៗនេះដំណើរកម្សាន្តរបស់តារាសម្តែងចិន Zhao Lusi បានបង្កឱ្យមានការពិភាក្សាជាច្រើន។ ទស្សនិកជនបានកត់សម្គាល់ឃើញថា ក្រុមហ៊ុនដែលបានដាក់ពាក្យសុំអាជ្ញាប័ណ្ណដំណើរកម្សាន្តក៏ដូចជាតំណាងផ្នែកច្បាប់របស់ក្រុមហ៊ុនដែលមានមូលដ្ឋាននៅទីក្រុងប៉េកាំង ដែល Zhao Lusi បានបង្កើតឡើងកាលពីឆ្នាំ២០២៥ គឺជាបុរសម្នាក់មាន Li Wei ។

លោក Li Wei គឺជាមនុស្សដែលបានរកឃើញ Zhao Lusi កាលពី ១០ ឆ្នាំមុននៅពេលដែលនាងគ្រាន់តែជាក្មេងស្រីម្នាក់ដែលផលិតវីដេអូកំប្លែងតាមអ៊ីនធឺណិត ហើយលោកក៏ជាអតីតនាយកប្រតិបត្តិនៃ Galaxy Cool Entertainment ដែលជាក្រុមហ៊ុនគ្រប់គ្រងចាស់របស់ Zhao Lusi ផងដែរ។

កាលពីខែសីហា ឆ្នាំ២០២៥ Zhao Lusi បានរិះគន់ជាសាធារណៈចំពោះអតីតភ្នាក់ងាររបស់នាង។ នៅពេលនោះ មានពាក្យចចាមអារ៉ាមថា នាងកំពុងប្រឈមមុខនឹងការពិន័យពីបទរំលោភកិច្ចសន្យារហូតដល់ ៤០០ លានយ័នប្រមាណ៥៩លានដុល្លារអាម៉េរិកដែលនាំឱ្យមនុស្សជាច្រើនជឿថានាងនឹងក្ស័យធន ហើយត្រូវចាកចេញពីឧស្សាហកម្មកម្សាន្ត។ ទោះជាយ៉ាងណាក៏ដោយក្រោយមកក្រុមហ៊ុនចាស់របស់នាងត្រូវបានទិញយកដោយ Hujing Entertainment ដែលជាផ្នែកមួយនៃ Alibaba ហើយ Zhao Lusi បានប្តូរទៅកិច្ចសន្យាកម្រិត S ថ្មីដែលមានលក្ខខណ្ឌផ្តល់សិទ្ធិឱ្យនាងឈប់សម្រាកប្រចាំឆ្នាំចំនួន ៣០ ថ្ងៃ។

អ្វីដែលគួរឱ្យភ្ញាក់ផ្អើលជាងនេះទៅទៀតនោះគឺថាលោក Li Wei សុខចិត្តបន្ទាបខ្លួន ហើយក្លាយជាអ្នកគ្រប់គ្រងផ្ទាល់ខ្លួនរបស់នាង។ ករណីបែបនេះកម្រមានណាស់នៅក្នុងឧស្សាហកម្មកម្សាន្តចិន។ នៅឆ្នាំ ២០១៦ ក្នុងអំឡុងពេលធ្វើដំណើរទៅកាន់ទីក្រុង Chengdu ដើម្បីស្វែងរកភ្ញៀវសម្រាប់កម្មវិធីមួយ លោក Li Wei បានជួបជាមួយ Zhao Lusi ដែលនៅពេលនោះមានតួនាទីតិចតួចប៉ុណ្ណោះនៅក្នុងកម្មវិធី។ Zhao Lusi ពេលនោះគ្មានអ្នកគ្រប់គ្រងអាជីព គ្មានធនធាន និងគ្មានប្រព័ន្ធគាំទ្រទេតែលោក Li Wei បានឃើញសក្តានុពលរបស់នាងភ្លាមៗបាននាំនាងមក Hengdian ហើយចាប់ផ្តើមរៀបចំផែនការអភិវឌ្ឍន៍អាជីពរបស់នាងតាំងពីដំបូង។ ស្នាដៃល្បីៗដូចជា «The Romance of Tiger and Rose» «The Long Ballad»សុទ្ធតែត្រូវបានបង្កើតឡើងក្នុងអំឡុងពេលនោះ។

នៅពេលឈានដល់កម្រិតកំពូល ជាង ៧០% នៃប្រាក់ចំណូលរបស់ Galaxy Cool បានមកពី Zhao Lusi តែម្នាក់ឯង។ នាងត្រូវបានគេចាត់ទុកថាជាម៉ាស៊ីនរកលុយរបស់ក្រុមហ៊ុន។ នៅឆ្នាំ ២០២៣ អ្វីៗបានចាប់ផ្តើមផ្លាស់ប្តូរ។ លោក Li Wei បានដកខ្លួនចេញពីក្រុមប្រឹក្សាភិបាល Galaxy Cool លក់ភាគហ៊ុនទាំងអស់របស់លោកហើយបានប្រកាសថាលែងពាក់ព័ន្ធនឹងក្រុមហ៊ុនទៀតហើយ។ នៅឆ្នាំដដែលនោះ នៅពេលបន្តកិច្ចសន្យា ថ្នាក់គ្រប់គ្រងថ្មីបានផ្លាស់ប្តូរសមាមាត្រចែករំលែកប្រាក់ចំណេញពី ៥:៥ ទៅ ៧:៣ ដោយក្រុមហ៊ុនទទួលបាន ៧០% និង Zhao Lusi ទទួលបានត្រឹមតែ ៣០% ប៉ុណ្ណោះ។ សំណងសម្រាប់ការរំលោភលើកិច្ចសន្យាត្រូវបានគេរាយការណ៍ថាកំពុងត្រូវបានបង្កើនដល់ ៤០០ លានយ័ន ដោយរយៈពេលកិច្ចសន្យាត្រូវបានពង្រីកដល់ឆ្នាំ ២០៣០។
បន្ទាប់ពីលោក Wei Yuan បានកាន់កាប់ក្រុមហ៊ុន អត្ថប្រយោជន៍របស់ Zhao Lusi ត្រូវបានកាត់បន្ថយយ៉ាងខ្លាំង ហើយសូម្បីតែអ្នកគ្រប់គ្រងផ្ទាល់ខ្លួនរបស់នាងក៏ត្រូវបានកាត់បន្ថយផងដែរ។

នៅក្នុងខែធ្នូ ឆ្នាំ២០២៤ Zhao Lusi បានជួបប្រទះបញ្ហាសុខភាព ខណៈពេលកំពុងថតរឿង «Almost Lover»។ នាងត្រូវបានគេឃើញមកដល់ដើម្បីពិនិត្យសុខភាពដោយជិះរទេះរុញ ដោយមើលទៅហាក់ដូចជាទន់ខ្សោយ។ មិនយូរប៉ុន្មាន ក្រុមហ៊ុនគ្រប់គ្រងរបស់នាងបានប្រកាសថា Zhao Lusi នឹងផ្អាកសកម្មភាពរបស់នាងជាបណ្ដោះអាសន្ន។ តារាស្រីរូបនេះបានបង្ហាញថា នាងបានទទួលរងពីជំងឺធ្លាក់ទឹកចិត្ត ហើយសុខភាពរបស់នាងត្រូវបានប៉ះពាល់ដោយសារតែសម្ពាធការងារយូរ។

នៅក្នុងខែសីហា ឆ្នាំ២០២៥ Zhao Lusi បានបង្កឱ្យមានការភ្ញាក់ផ្អើលមួយ នៅពេលដែលនាងបាននិយាយចេញមក ដោយចោទប្រកាន់ Galaxy Cool ថាបាន «គាបសង្កត់» សិល្បករ ដកប្រាក់ពីស្ទូឌីយោផ្ទាល់ខ្លួនរបស់នាង និងបណ្តាលឱ្យនាងខាតបង់ផ្នែកហិរញ្ញវត្ថុ និងសុខភាព។ នៅពេលនោះ ពាក្យចចាមអារ៉ាមអំពីការទូទាត់សំណងចំនួន ៤០០ លានយ័ន បានរីករាលដាលពាសពេញគ្រប់ទីកន្លែង ដែលធ្វើឱ្យតារាសម្តែងរូបនេះត្រូវបានគេចំអក និងត្រូវបានគេព្យាករណ៍ថានឹងត្រូវចូលនិវត្តន៍។

នៅពេលនោះ លោក Li Wei បានចូលជួយ Zhao Lusi ក្នុងការធ្វើការជាមួយមេធាវី ដើម្បីបន្តដំណើរការបញ្ចប់កិច្ចសន្យា។ ក្រោយមក Hujing Entertainment បានទិញយក Galaxy Cool ដែលបានសម្រួលដល់ដំណើរការបញ្ចប់កិច្ចសន្យារបស់ Zhao Lusi។ យោងតាមប្រភពព័ត៌មាន សំណងចុងក្រោយចំនួន ៤០០ លានយ័ន ត្រូវបានកាត់បន្ថយមកត្រឹមប្រហែល ៥០ លានយ័នប្រមាណ៧.៣លានដុល្លាររួមជាមួយនឹងការប្រគល់សិទ្ធិកម្មសិទ្ធិមួយចំនួនទៅឱ្យស្នាដៃចាស់ៗ។ នេះក៏ជាការវិលត្រឡប់របស់ Zhao Lusi មកកាន់សកម្មភាពវិញ បន្ទាប់ពីបរាជ័យដ៏ធំបំផុតនៃអាជីពរបស់នាង៕