កូនស្រីរបស់តារារ៉េប វីន វិទូ និង ម៉ារៀម ធ្វើឱ្យវីដេអូល្បីក្លាយជា Trend លើបណ្តាញសង្គមម្តងទៀត

កូនស្រីដ៏គួរឱ្យស្រលាញ់របស់តារាចម្រៀងរ៉េប វីន វិទូ និងអ្នកបង្កើតមាតិកា ម៉ារៀម បានធ្វើឱ្យកក្រើកម្តងទៀតក្លាយទៅជា Trend នៅលើបណ្តាញសង្គម។ វីដេអូដើមរបស់នាងតូច រីម៉ា មានការទស្សនារហូតដល់ ៩លានដងឯណោះនៅលើហ្វេកប៊ុក។ នេះគឺជាភាពជោគជ័យដ៏ខ្លាំងក្លារបស់ រីម៉ា បន្ទាប់ពីច្រៀងបទ «ពងទា» លំនាំបទ «APT»។

គេចាំបានថាកាលពីបទ «APT» របស់ Rosé និង Bruno Mars ចេញដំបូងៗបានបង្កឱ្យមានរលកនៃការពិភាក្សានិងក្លាយទៅជា Trend ដ៏ល្បីមួយនៅវេទិកាប្រព័ន្ធផ្សព្វផ្សាយសង្គម។ ក្នុងពេលជាមួយគ្នានេះកាលពីដើមឆ្នាំ២០២៥ វីន វិទូ និង កូនស្រី បានធ្វើឱ្យទស្សនិកជនមានការចាប់អារម្មណ៍យ៉ាងឆាប់រហ័សបន្ទាប់ពីនាងតូច រីម៉ា ច្រៀងថា «ពងទា ពងទា»ដោយយកលំនាំបទ APT ចំណែកឯ វីន វិទូ ជាឪពុកធ្វើជាអ្នកធ្វើភ្លេង។ ក្រោយមកវីដេអូមួយនោះមានការទស្សនាយ៉ាងច្រើនរហូតដល់ វីន វិទូ និងគ្រួសារ Cover ចេញជាច្រើនខណៈដែលអំឡុងពេលនោះមានអ្នកលេងទិកតុកជាច្រើនបានលេងកម្សាន្តបទ ពងទា របស់ រីម៉ា។

អ្វីដែលកាន់តែពិសេសពាក់កណ្តាលឆ្នាំ២០២៦ នេះ រីម៉ា បានធ្វើឱ្យបណ្តាញសង្គមផ្ទុះកក្រើកម្តងទៀតតាមរយៈវីដេអូសាមញ្ញមួយជាមួយនឹងពាក្យសម្តីដ៏ខ្យូតរបស់គេ និងការសំពះ ជីដូន ដែលពុំទាន់ងាកមុខមក។ កាយវិការនិងពាក្យសម្តីធម្មតាៗរបស់ រីម៉ា បានធ្វើឱ្យល្បីយ៉ាងឆាប់រហ័សដោយវីដេអូនេះបានបង្ហោះនៅថ្ងៃទី១៩ ខែកក្កដា រហូតដល់ថ្ងៃទី២៥ ខែកក្កដា មានអ្នកទស្សនារហូតដល់៩លានដងនៅលើបណ្តាញសង្គមហ្វេកប៊ុក។
វីដេអូដែលមានការទស្សនាច្រើននេះក៏បានក្លាយទៅជា Trend នៅលើបណ្តាញសង្គមផងដែរដោយ វីន វិទូ និង ម៉ារៀម ជាភរិយា បានថតកាយវិការរបស់ រីម៉ា និងជីដូនឡើងវិញ។ ក្រឡេកទៅកាន់ផេកផ្សេងៗទៀតដែលគូររូបភាពនិងការផលិតជាវីដេអូតុក្កតាក៏អត់ទ្រាំមិនបានគូសរូបរបស់ រីម៉ា ផងដែរ។

គួរបញ្ជាក់ផងដែរថាបច្ចុប្បន្ននាងតូច រីម៉ា មានអាយុ ៦ឆ្នាំ ទទួលបានការមើលថែយ៉ាងកក់ក្តៅពីឪពុកម្តាយ។ មិនត្រឹមតែប៉ុណ្ណោះ រីម៉ា ក៏មានទស្សនិកជនចូលចិត្តជាច្រើនដោយសារតែភាពគួរឱ្យស្រលាញ់របស់គេ៕