UNESCO ធានាតាមដានករណីប្រាសាទព្រះវិហារ និងជួយសម្រុះសម្រួលជម្លោះរវាងកម្ពុជា-ថៃ

វិវាទព្រំដែនខ្មែរ-ថៃ ឈានដល់របត់ថ្មីមួយទៀត ក្រោមក្រសែភ្នែករបស់អង្គការសហប្រជាជាតិ! អង្គការ UNESCO បានផ្ញើសារការទូតយ៉ាងច្បាស់លាស់ ជុំវិញការធានាតាមដានការពារប្រាសាទព្រះវិហារឱ្យបានម៉ឺងម៉ាត់បំផុត។ មិនតែប៉ុណ្ណោះ អគ្គនាយករង UNESCO ក៏បានសន្យាចូលរួមចំណែកយ៉ាងសកម្មក្នុងការសម្រុះសម្រួល បន្ធូរបន្ថយភាពតានតឹងផ្នែកយោធានិងនយោបាយរវាងប្រទេសជិតខាងទាំងពីរ តាមរយៈការតភ្ជាប់ខ្សែចងវប្បធម៌ឡើងវិញ។
 
​យោងតាមខ្លឹមសារផ្លូវការនៃជំនួបពិភាក្សាការងារដ៏មានសារៈសំខាន់ កាលពីរសៀលថ្ងៃទី២១ ខែកក្កដា ឆ្នាំ២០២៦ ​លោកស្រីរដ្ឋមន្ត្រីក្រសួងវប្បធម៌និងវិចិត្រសិល្បៈកម្ពុជា ភឿង សកុណា បានដឹកនាំប្រតិភូជួបសម្តែងការគួរសម និងជជែកការងារជាមួយ លោក Nayef Al-Fayez អគ្គនាយករងទទួលបន្ទុកវប្បធម៌នៃអង្គការ UNESCO។ ជំនួបលំដាប់អន្តរជាតិនេះ បានប្រព្រឹត្តទៅយ៉ាងរលូន នៅក្នុងអំឡុងពេលនៃសម័យប្រជុំគណៈកម្មការបេតិកភណ្ឌពិភពលោកលើកទី４８ ដែលកំពុងរៀបចំធ្វើឡើងនៅក្នុងទីក្រុងញូដេលី សហរដ្ឋឥណ្ឌា។
 
​នៅក្នុងឱកាសនោះ លោកស្រីរដ្ឋមន្ត្រីបានថ្លែងអំណរគុណយ៉ាងជ្រាលជ្រៅចំពោះ UNESCO និងអ្នកជំនាញការ ICOMOS ដែលបានចុះបំពេញបេសកកម្មសិក្សា និងវាយតម្លៃស្ថានភាពជាក់ស្តែងនៅប្រាសាទព្រះវិហារ កាលពីខែមីនា ឆ្នាំ២០២៦ កន្លងទៅ ព្រមទាំងបានកោតសរសើរចំពោះរបាយការណ៍បច្ចេកទេសដ៏មានលក្ខណៈសុក្រឹត និងត្រឹមត្រូវ។ ជាមួយគ្នានេះ កម្ពុជាបានបង្ហាញបំណងធ្វើជាម្ចាស់ផ្ទះរៀបចំកិច្ចប្រជុំគណៈកម្មាធិការអន្តររដ្ឋាភិបាលបេតិកភណ្ឌអរូបី នៅឆ្នាំណាមួយក្នុងកំឡុងអាណត្តិជាសជាជិក (ឆ្នាំ២០២៦-២០៣០) ដែលសំណើនេះទទួលបានការគាំទ្រ និងការសន្យាជួយជ្រោមជ្រែងយ៉ាងពេញទំហឹងពីភាគី UNESCO ផងដែរ។
​
ការប្រកាសជំហរគាំទ្រ និងការចូលខ្លួនមកជួយសម្រុះសម្រួលរបស់អង្គការ UNESCO នាពេលនេះ គឺជាជោគជ័យការទូតវប្បធម៌ដ៏ធំធេងមួយសម្រាប់ប្រទេសកម្ពុជា ក្នុងការការពារទ្រព្យសម្បត្តិបេតិកភណ្ឌជាតិនៅលើឆាកអន្តរជាតិ។ ជំនឿចិត្ត និងកិច្ចសហប្រតិបត្តិការដ៏ជិតស្និទ្ធជាមួយស្ថាប័នសហប្រជាជាតិមួយនេះ មិនត្រឹមតែធានាបាននូវការអភិរក្សប្រាសាទព្រះវិហារប្រកបដោយចីរភាពប៉ុណ្ណោះទេ ប៉ុន្តែវាក៏ជាសារព្រមានការទូតដ៏ទន់ភ្លន់មួយទៅកាន់ប្រទេសជិតខាង ឱ្យងាកមកគោរពតម្លៃវប្បធម៌សកល និងរក្សាសន្តិភាពតាមព្រំដែន ដោយជៀសវាងការប្រើប្រាស់កម្លាំងយោធាមកបំពានលើបេតិកភណ្ឌពិភពលោក៕