នៅថ្ងៃទី៩ ខែមិថុនា ឆ្នាំ២០២៦ សមត្ថកិច្ចថៃបានសហការជាមួយនាយកដ្ឋានបសុសត្វ, រដ្ឋបាលចំណីអាហារ-ឱសថ និងមន្ទីរសុខាភិបាលខេត្តប៉ាធុមថានី ចុះត្រួតពិនិត្យរោងចក្រកែច្នៃសាច់របស់ក្រុមហ៊ុន Techin Foods នៅឃុំបឹងថងឡាង ស្រុកឡាំលូកកា។ ការត្រួតពិនិត្យបានបង្ហាញថា រោងចក្រនេះលួ.ចផលិតសាច់ប៉ាតេ និងប្រហិតគ្មានអនាម័យ បិទស្លាកជាម៉ាកផ្សេងៗ ដើម្បីលក់ចែកចាយទូទាំងប្រទេស ដោយគ្មានអាជ្ញាប័ណ្ណត្រឹមត្រូវ។
ក្នុងការបង្ក្រាប សមត្ថកិច្ចបានរកឃើញផលិតផលសរុបប្រមាណ ១០,០០០ កញ្ចប់ ស្មើជាង ២០ ម៉ាក រួមមាន CFP, CHALAME និង Ros Loet។ ក៏មានការរឹបអូសសាច់សត្វ និងសម្ភារៈផ្សេងៗ ស្មើតម្លៃជាង ៧ លានបាត (ប្រមាណ ២១៣,២២៦ ដុល្លារ)។
តាមការត្រួតពិនិត្យ អាជ្ញាប័ណ្ណផលិតអាហាររបស់រោងចក្រនេះបានផុតសុពលភាពតាំងពីថ្ងៃទី៣១ ខែធ្នូ ឆ្នាំ២០២៥ ហើយមិនបានស្នើសុំបន្ត។ ការផលិតក៏ធ្វើឡើងក្នុងកន្លែងកខ្វក់ មិនស្របតាមស្តង់ដារអនាម័យ ដោយម្ចាស់រោងចក្រប្រឈមនឹងទោសផលិតអាហារខុសច្បាប់ បិទស្លាកមិនត្រឹមត្រូវ និងគ្មានអនាម័យ។ ផលិតផលទាំងអស់ត្រូវបានយកទៅត្រួតពិនិត្យរកសារធាតុគីមីប៉ះពាល់សុខភាព ប្រសិនបើរកឃើញ ការផ្តន្ទាទោសនឹងកាន់តែធ្ងន់ធ្ងរ។
ម្ចាស់រោងចក្របានសារភាពថា បានដំណើរការផលិតអាហារកែច្នៃអស់រយៈពេល ១០ ឆ្នាំ ផលិតសាច់ប៉ាតេ ប្រហិត និងអាហារវេចខ្ចប់ជាច្រើនប្រភេទ ដោយមានសមត្ថភាពផលិតរហូតដល់ ៣០ តោនក្នុងមួយខែ និងចំណូលជាមធ្យមប្រមាណ ៣ លានបាតក្នុងមួយខែ។
មន្ត្រីរដ្ឋបាលចំណីអាហារ និងឱសថបានដាស់តឿនឱ្យរោងចក្រផ្សេងៗផលិតអាហារតាមស្តង់ដារអនាម័យ ដើម្បីការពារសុខភាពអ្នកប្រើប្រាស់។ ពលរដ្ឋក៏ត្រូវពិនិត្យស្លាកសញ្ញាអាហារឱ្យបានច្បាស់មុនពេលទិញ ដើម្បីជៀសវាងផលិតផលគ្មានសុវត្ថិភាព៕
