នារីថៃម្នាក់ហ៊ានចេញមុខនិយាយចំៗអំពីបទពិសោធរស់នៅកម្ពុជារយៈពេល ១១ឆ្នាំ

ធ្លាប់តែខ្លាចថានឹងត្រូវប្រជាជនខ្មែរស្អ.ប់ និងរើសអើងដោយសារខ្លួនជាជនជាតិថៃ ប៉ុន្តែអ្វីៗខុសឆ្ងាយពីការគិត! នារីជនជនជាតិថៃម្នាក់បានចែករំលែកពីអារម្មណ៍ និងបទពិសោធពិតដែលនាងបានជួបប្រទះក្នុងការរស់នៅប្រទេសកម្ពុជាអស់រយៈពេល ១១ឆ្នាំ ប្រាប់ទៅកាន់ប្រជាជនថៃរបស់ខ្លួននិងមនុស្សទាំងអស់នៅជុំវិញពិភពលោកឲ្យដឹងហើយឈប់យល់ខុសលើកម្ពុជា។

យោងតាមវីដេអូឃ្លីបដែលបង្ហោះនៅលើផេករបស់នាងដែលមានឈ្មោះថា «Nacha in Cambodia» នារីជនជាតិថៃរូបនេះបានរៀបរាប់ថា៖ មុនពេលមកប្រទេសកម្ពុជានាងធ្លាប់គិតថា នៅទីនេះពិបាករស់នៅ មិនសូវមានកន្លែងល្អ កន្លែងស្អាត ប៉ុន្តែនៅពេលនាងបានមករស់នៅប្រទេសកម្ពុជាដោយផ្ទាល់ទើបដឹងថា នៅទីនេះបានផ្ដល់ឱកាសការងារល្អៗ បានជួបមនុស្សល្អៗ និងមានកន្លែងដើរលេងស្អាតៗជាច្រើន។

នាងបានចែករំលែកពីបទពិសោធរបស់នាងបន្ថែមទៀតថា កាលពីមុននាងមិនហ៊ានប្រាប់គេឡើយថាខ្លួនគឺជាជនជាតិថៃ ព្រោះនាងខ្លាចថានឹងមានគេរើសអើង ខ្លាចគេមិនទទួលស្វាគមន៍ និងខ្លាចត្រូវគេនិយាយមិនល្អដាក់ធ្វើបាបផ្លូវចិត្ត ប៉ុន្តែបន្ទាប់ពីបើកចិត្តហ៊ានប្រាប់គេថាខ្លួនគឺជាជនជាតិថៃ គ្រប់យ៉ាងគឺមិនអាក្រ.ក់ដូចអ្វីដែលនាងធ្លាប់គិតឡើយ។

តាមសម្ដីរបស់ Nacha បើទោះបីជាមានមនុស្សមួយចំនួនមិនទទួលយកនាងក្នុងនាមជាជនជាតិថៃ ប៉ុន្តែនាងយល់ថា ផលអវិជ្ជមាននេះគឺគ្រាន់តែជាចំណុចតូចមួយប៉ុណ្ណោះ បើធៀបទៅនឹងមនុស្សជាច្រើនផ្សេងទៀតដែលបើកចិត្តទូលាយចំពោះនាង។ Nacha បាននិយាយអរគុណប្រជាជនកម្ពុជាដោយស្មោះត្រង់ថា «អរគុណដែលធ្វើឲ្យកូនថៃម្នាក់នេះ មានអារម្មណ៍កក់ក្ដៅនៅកម្ពុជា»។ នៅក្នុងឃ្លីបវីដេអូមួយទៀតនាងក៏បានបញ្ជាក់ផងដែរថា អ្វីដែលដែលគ្រប់គ្នាបានឃើញពីសំបកក្រៅ មិនប្រាកដថាជាការពិតទាំងអស់ទេ។ សម្រាប់នាងកម្ពុជាគឺជា «ផ្ទះទី២» ដែលនាងស្រឡាញ់។

ទន្ទឹមនឹងការចែករំលែករបស់ Nacha ក៏មានបងប្អូនខ្មែរជាច្រើនបានចូលខម្មិនជាមួយពាក្យពេចន៍ល្អៗ ដោយលើកទឹកចិត្តនាង និងជនជាតិថៃដទៃដែលរស់នៅកម្ពុជាកុំមានការភ័យខ្លាច ឬព្រួយបារម្ភអ្វីប្រសិនបើពួកគេគ្រាន់តែជាមនុស្សស្លូតត្រង់ធម្មតាដែលមករស់នៅ និងធ្វើការរកស៊ីចិញ្ចឹមជីវិតនោះ។ ជនជាតិណាក៏មានល្អ និងអាក្រ.ក់ ដូច្នេះដរាបណាពួកគេមិនបានបង្កបញ្ហាអ្វី ពួកគេនឹងនៅតែទទួលបានការស្វាគមន៍ជានិច្ចពីប្រជាជនកម្ពុជា។

តាមរយៈវីដេអូរបស់ Nacha ដូចខាងលើនេះផងដែរ បងប្អូនខ្មែរជាច្រើនក៏បានសំណូមពរទៅកាន់ប្រជាជនថៃដែលរស់នៅប្រទេសថៃ ឲ្យផ្ដល់ការគោរពនិងឲ្យតម្លៃសម្រាប់ជនជាតិខ្មែរដែលកំពុងរស់នៅលើទឹកដីថៃវិញដូចគ្នា ព្រោះថាបញ្ហារវាងរដ្ឋាភិបាលនិងរដ្ឋាភិបាលពុំគួរត្រូវបានលើកឡើងជាហេតុផលក្នុងការប្រព្រឹត្តទង្វើរើសអើងជាតិសាសន៍ឡើយ៕