បាត់មុខពីវិស័យសិល្បៈស្រាប់តែពេលនេះទទួលបានដំណឹងថាលោក ម៉េង ប៊ុនឡូ តួឯកប្រុសក្នុងខ្សែភាពយន្តខ្មែរដ៏ល្បីល្បាញ «ចៅពស់កេងកង» កំពុងជួបប្រទះបញ្ហាសុខភាពបែកសរសៃជើងខាងឆ្វេងនិងរលាកបំពង់កធ្ងន់ធ្ងរ។ នេះបើតាមការបញ្ជាក់របស់លោក សាវិន ហ្វីលីព។ តារាសម្តែងជើងចាស់រូបនេះបង្ហើបទៀតថាដំបូងឡើងលោក ម៉េង ប៊ុនឡូ មានជំងឺទឹកនោមផ្អែមល្ហែមកម្រិតធ្ងន់ដោយខំទៅរត់ហាត់ប្រាណប៉ុន្តែបណ្តាលឱ្យជួបស្ថានភាពនេះទៅវិញ។
នៅថ្ងៃទី១ ខែមេសា សាធារណជននិងអ្នកនៅក្នុងចង្កោមសិល្បៈបានបង្ហាញការភ្ញាក់ផ្អើល បន្ទាប់ពីឃើញការបង្ហោះរបស់លោក សាវិន ហ្វីលីព ទម្លាយពីស្ថានភាពជំងឺរបស់លោក ម៉េង ប៊ុនឡូ ខណៈដែលត្រូវការថវិកាសម្រាប់ការព្យាបាល។ លោកបានរៀបរាប់នៅលើហ្វេកប៊ុករបស់ខ្លួនថា «តារាសម្ដែង ម៉េង ប៊ុនទ្បូ ធ្លាក់ខ្លួនឈឺធ្ងន់ចូលពេទ្យចំថ្ងៃតែមួយជាមួយខ្ញុំតែម្ដង គាត់ទ្បើងកម្ដៅរហូតដល់៤០អង្សាបណ្ដាលពីជំងឺបែកសរសៃជើងខាងឆ្វេង(សរសៃវ៉ែនរត់ទៅបេះដូង) និងរលាកបំពង់កធ្ងន់ធ្ងរ។ លោកលាក់ទុកជំងឺបែកសរសៃជើងខាងឆ្វេងនេះយូរមកហើយដោយសារគ្មានលុយធ្វើការវះកាត់ព្យាបាល(ប្រហែល៣ពាន់$) ប៉ុណ្ណោះ »។
លោក សាវិន ហ្វីលីព បន្តទៀតថា វេជ្ជបណ្ឌិតធ្លាប់ព្រមានលោក ម៉េង ប៊ុនឡូ ថាបើលោកមិនព្រមធ្វើការព្យាបាលសរសៃជើងឆ្វេងនេះឱ្យទាន់ពេលទេអាចនឹងប្រឈមមុខនឹងជំងឺគាំងបេះដូងនៅថ្ងៃមុខ។ ធ្លាប់ជាតារាឯកប្រុសល្បីលំដាប់ប្រទេសតាមរយៈរឿង ចៅពស់កេងកង របស់ឯកឧត្តម ហ្វៃ សំអាង ប៉ុន្តែពេលនេះខ្សែជីវិតបច្ចុប្បន្នរបស់លោក ម៉េង ប៊ុនឡូ កំសត់ណាស់ ត្រូវមកដេកពេទ្យម្នាក់ឯងគ្មានអ្នកកំដរទេ ចំណែកជីវភាពរបស់លោកពេលនេះមិនប្រសើរទាល់តែសោះ។ លោក សាវិន ហ្វីលីព លាតត្រដាងទៀតថាលោក ម៉េង ប៊ុនឡូ ជាមនុស្សស្លូតបូតមិនដែលត្អូញត្អែម្ដងណាទេនិងព្យាយាមលាក់បាំងស្ថានភាពជីវិតក្រោយបាត់មុខឈឹងពីសិល្បៈ។
ជាមួយនឹងការលាតត្រដាងពីស្ថានភាពជំងឺរបស់អតីតតួឯកល្បីឈ្មោះរូបនេះតារាសម្តែង សាវិន ហ្វីលីព បានបញ្ជាក់នៅក្នុងសំណេរមួយទៀតថា «ដំបូង ម៉េង ប៊ុនទ្បូ មានជំងឺទឹកនោមផ្អែមធ្ងន់ធ្ងរហើយខំរត់ហាត់ប្រាណបញ្ចុះជាតិស្ករដែលជាហេតុធ្វើអោយបែកសរសៃជើងវែនខាងឆ្វេងភ្ជាប់ទៅបេះដូងតែម្ដង»។
ក្រោយពីរឿងនេះបានរីកសាយភាយនៅលើបណ្តាញសង្គមអ្នកនៅក្នុងចង្កោមសិល្បៈបានជួយថវិកាជាបន្តបន្ទាប់មកកាន់លោក ម៉េង ប៊ុនឡូ ក្នុងនោះក៏មានអ្នកគាំទ្រមួយចំនួនដូចគ្នា។ គួរឱ្យដឹងថា លោក សាវិន ហ្វីលីព គឺជាសិល្បករម្នាក់ដែលតែងតែជួយដល់អ្នកសិល្បៈ ដែលមានជីវភាពខ្វះខាតនិងត្រូវការជំនួយសម្រាប់ការព្យាបាលជំងឺដោយលោកបានបង្ហោះរឿងរ៉ាវនៅលើបណ្តាញសង្គម៕
