រឿងភាគរបស់ Yoo Yeon Seok ទទួលបានអត្រាអ្នកទស្សនាខ្ពស់

Yoo Yeon Seok បានវិលត្រឡប់មកវិញជាមួយនឹងរឿងភាគ «Phantom Lawyer» ជាប្រភេទបែបស្រមើស្រមៃ និងច្បាប់ ខណៈប្រជាប្រិយភាពនៃរឿងនេះកំពុងតែកើនឡើងយ៉ាងខ្លាំងសម្រាប់ការចាក់បញ្ចាំងនៅថ្ងៃចុងសប្តាហ៍។ លើសពីនេះទៅទៀត Yoo Yeon Seok បានបង្ហាញពីសមត្ថភាពសម្តែងរបស់ខ្លួនកាន់តែរីកចម្រើនធ្វើឱ្យទស្សនិកជនភ្ញាក់ផ្អើលបន្ទាប់ពីរាំបទ K-Pop នៅក្នុងរឿងនេះ។

យោងតាម Nielsen Korea រឿងភាគនេះទទួលបានចំណាត់ថ្នាក់ ១០% នៅថ្ងៃទី២៧ ខែមីនា ដែលជាអត្រាខ្ពស់បំផុតចាប់តាំងពីចាក់ផ្សាយមក ហើយក៏ជារឿងភាគខ្លីដែលមានអ្នកមើលច្រើនជាងគេប្រចាំសប្តាហ៍ផងដែរ ដោយឈរនៅលំដាប់កំពូលនៃពេលវេលារបស់វា។ «Phantom Lawyer» ក៏ជាកម្មវិធីដែលមានអ្នកទស្សនាច្រើនជាងគេក្នុងសប្តាហ៍នេះក្នុងចំណោមក្រុមអាយុពី ២០-៤៩ ឆ្នាំ ដោយមានអត្រាអ្នកទស្សនា ៣.៥%។

បន្ទាប់ពី៦ភាគមក រឿងនេះបានបង្ហាញពីភាពទាក់ទាញរបស់ខ្លួនទាក់ទងនឹងគ្រោងរឿង និងការសម្ដែង។ ក្រៅពីទិដ្ឋភាពផ្នែកច្បាប់ រឿងភាគនេះបញ្ចូលព័ត៌មានលម្អិតបែបកំប្លែងយ៉ាងប៉ិនប្រសប់ ដើម្បីបង្កើនតម្លៃកម្សាន្ត និងបង្កើតរឿងរ៉ាវដ៏កក់ក្តៅដែលពាក់ព័ន្ធនឹងវិញ្ញាណ។ ការពិភាក្សាអំពីរឿងថ្មីរបស់ Yoo Yeon Seok និង Esom កំពុងកើនឡើងនៅលើវេទិកាផ្សេងៗ មិនត្រឹមតែនៅក្នុងប្រទេសកូរ៉េខាងត្បូងប៉ុណ្ណោះទេ ប៉ុន្តែក៏មាននៅក្នុងប្រទេសអាស៊ីមួយចំនួនផងដែរ។

នៅក្នុងភាគ៣ Yoo Yeon Seok បានធ្វើឱ្យទស្សនិកជនភ្ញាក់ផ្អើលអមជាមួយនឹងសំណើចបន្ទាប់ពីលោកមានឈុតឆាករាំបទ «Love Dive» របស់ក្រុម IVE នៅក្នុងរឿងថ្មីនេះ។ បន្ទាប់ពីរឿងភាគបានចាក់ផ្សាយតារាសម្តែងរូបនេះក៏បានបង្ហោះវីដេអូរាំជាមួយនឹងក្រុមនេះផ្ទាល់ផងដែរ៕