ស្ថិតក្នុងសំលៀកបំពាក់សហសម័យក្នុងទម្រង់បញ្ចេញភាពស៊ិចស៊ីល្វែងខាងលើតារាសម្តែង មាន សូនីតា ត្រូវរងនូវការរិះគន់យ៉ាងខ្លាំងពីអ្នកលេងបណ្តាញសង្គម។ រូបភាពនោះ មាន សូនីតា ធ្វើឡើងសម្រាប់អបអរថ្ងៃកំណើតរបស់នាងកាលពីខែកុម្ភៈ។ ទោះយ៉ាងណា វីដេអូរបស់តារាស្រីរូបនេះត្រូវបានមនុស្សជាច្រើនចាត់ទុកថាមិនសមរម្យ។
កាលពីថ្ងៃទី១០ ខែកុម្ភៈ ឆ្នាំ២០២៦ តារាស្រី មាន សូនីតា ឬហៅថា រាជនីក្រមា បានបង្ហោះរូបប៉ុន្មានសន្លឹកដើម្បីអបអរថ្ងៃកំណើតរបស់ខ្លួន។ តារាសម្តែងរូបនេះបានហៅខ្លួនឯងថាស្រ្តីរឹងមាំហើយបានឆ្លងមកឆ្នាំថ្មី ១ឆ្នាំទៀតហើយ។ លើសពីនេះទៅទៀត មាន សូនីតា បានបង្ហាញទៀតថា «អំណាច មិនមកពីតំណែង ប៉ុន្តែមកពីការសម្រេចចិត្តដែលមិនរួញរា!យើងជាស្តេចនៃជីវិតខ្លួនឯង ជ្រើសរើសផ្លូវដោយខ្លួនឯង រស់នៅតាមច្បាប់ដែលយើងបានបង្កើតធ្វើឱ្យគ្រប់ជំហានសុទ្ធតែមានអត្ថន័យ។ ចង់ឈ្នះត្រូវធ្វើជាស្តេចនៃជីវិតខ្លួនឯង»។
រូបភាពរបស់ មាន សូនីតា ដែលបង្ហោះពុំសូវរងប្រតិកម្មនោះទេប៉ុន្តែទទួលបានពាក្យជូនពរសម្រាប់ថ្ងៃណើតរបស់នាង។ យ៉ាងណាមិញ វីដេអូរបស់ មាន សូនីតា ដែលស្ថិតក្នុងសំលៀកបំពាក់សហសម័យដែលបង្ហោះដោយគណនីផ្សេងត្រូវបានទស្សនិកជនបញ្ចេញមតិរិះគន់យ៉ាងច្រើន។ អ្នកលេងបណ្តាញសង្គមមួយចំនួនរិះគន់តារាសម្តែងរូបនេះថាស្លៀកពាក់មិនសមរម្យស្ថិតក្នុងទម្រង់ស៊ិចស៊ីមិនសមភ្នែក ប៉ុន្តែមតិខ្លះទៀតក៏បានសរសើរពីសម្រស់របស់ មាន សូនីតា ដែលនៅតែមានភាពស្រស់ស្អាតទោះបីជាវ័យជាង៣០ឆ្នាំក៏ដោយ។
គួរបញ្ជាក់ផងដែរថា បច្ចុប្បន្ននេះ មាន សូនីតា ពុំទាន់មានខ្សែភាពយន្តថ្មីដើម្បីបំរើចក្ខុទស្សនិកជននៅឡើយដោយនាងងាកមកពង្រឹងអាជីពកម្មរបស់ខ្លួន និងក្លាយជា BA ផលិតផលជាដើម៕
