មិនមែនជាបងប្អូនដែលកើតចេញពីផ្ទៃតែមួយប៉ុន្តែអ្នកគាំទ្រសង្កេតឃើញថាទំនាក់ទំនងរវាង នី សូនិត្តា និង ហេង បូនីកា ស្និទ្ធស្នាលចង់លើសសាច់ញាតិទៅទៀត។ ថ្មីៗនេះ ឌី សូនិត្តា ក៏ទម្លាយពាក្យក្នុងចិត្តជាច្រើនចំពោះ នីកា ខណៈពិធីការិនីរូបនេះតបវិញថា សូនិត្តា ជាប្រភពនៃកម្លាំងចិត្តនិងភាពកក់ក្តៅរបស់ខ្លួន។
តារាសម្តែង ឌី សូនិត្តា បានបង្ហោះនៅលើបណ្តាញសង្គមរបស់ខ្លួនថា ដ្បិតថានាងនិង បូនីកា មិនកើតពោះម៉ែតែមួយមែនពិតតែចរិតដូចឆ្លុះកញ្ចក់ អាចធ្វើរឿងជាច្រើនជាមួយគ្នាដោយមិនលាក់បាំង។ មានពេលខ្លះអ្នកទាំងពីរនាំគ្នាយំឱបគ្នា ដោយគ្រាន់តែយំហើយមិននិយាយអ្វីទាំងអស់តែហាក់យល់ពីគ្នាដោយបេះដូងនិងអារម្មណ៍។ ឌី សូនិត្តា និយាយដាក់ ហេង បូនីកា ថាខ្លួនសប្បាយចិត្តដែល នីកា ចាប់ផ្តើមយល់ច្រើន វិវត្តន៍ខ្លួនបានយ៉ាងឆាប់រហ័ស ចាប់ផ្តើមមានភាពកត្តញូគុណ មានថាមពលវិជ្ជមាន មានសច្ចធម៌ មានគុណតម្លៃចិត្តនិងកាយ។
អ្នកនាង ឌី សូនិត្តា ដែលជាស្រ្តីរឹងមាំមួយរូបបានបន្ថែមទៀតថាអនាគត បូនីកា នឹងជួបមនុស្សប្រុសដែលល្អបុណ្យស្មើនឹងនាងជាមិនខាន។ លើសពីនេះ ឌី សូនិត្តា ថា នីកា ជាប្អូនស្រីដ៏ល្អរបស់ខ្លួនដែលបានចូលមកក្នុងជីវិតរបស់ខ្លួន។ កម្រនឹងបញ្ចេញអារម្មណ៍បែបនេះបង្ហាញឱ្យទស្សនិកជនបានដឹង ហេង បូនីកា បានពោលពាក្យទៅកាន់ ឌី សូនិត្តា ថា«អរគុណបងស្រីដែលតែងតែជាកម្លាំងចិត្ត នឹងជាភាពកក់ក្តៅសម្រាប់ប្អូនរហូតមក»។
ឌី សូនិត្តា បច្ចុប្បន្នកំពុងសកម្មនឹងមុខជំនួញផ្ទាល់ខ្លួនដោយផ្តល់ចំណីចក្ខុជូនអ្នកគាំទ្រតាមរយៈវីដេអូកំប្លែងខ្លីៗបង្ហោះនៅលើបណ្តាញសង្គម។ ងាកមកកាន់ បូនីកា វិញកំពុងមមាញឹកការងារជាពិធីការិនី និងថតវីដេអូកំប្លែងខ្លីៗជាមួយនឹងតារាចម្រៀង ស៊ូ ស៊ីរីកា និង អ៊ូ ទេពច័ន្ទណារឹទ្ធ៕
