កម្ពុជាទាមទារឲ្យកងទ័ពជើងទឹកថៃដោះលែងប្រជានេសាទកម្ពុជាចំនួន៣នាក់ត្រឡប់វិញជាបន្ទាន់

ចូលក្នុងដែនអធិបតេយ្យកម្ពុជាហើយហ៊ានស្ទាក់ចាប់ពលរដ្ឋខ្មែរទៀត! រាជរដ្ឋាភិបាលកម្ពុជា បានធ្វើការតវ៉ាជាផ្លូវការប្រឆាំងចំពោះការចូលមកក្នុងដែនសមុទ្រកម្ពុជាដោយគ្មានការអនុញ្ញាតរបស់នាវាកងទ័ពជើងទឹកថៃ និងការរឹបអូសទូកនេសាទនិងការចាប់ប្រជាជនកម្ពុជាដោយខុសច្បាប់នៅក្នុងដែនសមុទ្រកម្ពុជា នាថ្ងៃទី២២ ខែកុម្ភៈ ឆ្នាំ២០២៦ ។

យោងតាមលិខិតរបស់ក្រសួងការបរទេស និងសហប្រតិបត្តិការអន្តរជាតិ បានឲ្យដឹងថា៖ រាជរដ្ឋាភិបាលកម្ពុជាបានធ្វើការតវ៉ាជាផ្លូវការចំពោះវត្តមានដោយគ្មានការអនុញ្ញាតរបស់នាវា កងទ័ពជើងទឹកថៃ និងការអនុវត្តនីតិថៃដោយល្មើសច្បាប់នៅក្នុងដែនសមុទ្រកម្ពុជាកាលពីព្រឹកថ្ងៃអាទិត្យ។ សកម្មភាពរបស់ទ័ពជើងទឹកថៃរួមមានទាំងការចាប់ខ្លួនពលរដ្ឋកម្ពុជាបីនាក់ ព្រមទាំងការរឹបអូសនាវានេសាទរបស់ពលរដ្ឋខ្មែរទាំងនេះ ត្រង់ទីតាំងស្ថិតនៅចម្ងាយប្រហែល ៧.២ ម៉ៃល៍សមុទ្រ ពី កោះយ៉រ ខេត្តកោះកុងនៃប្រទេសកម្ពុជា។

ក្រសួងការបរទេសបានបញ្ជាក់ថា សកម្មភាពទាំងនេះគឺជាការរំលោ.ភយ៉ាងច្បាស់លាស់លើ អធិបតេយ្យ និងដែនទឹករបស់កម្ពុជា ព្រមទាំងច្បាប់អន្តរជាតិ។

ជាមួយគ្នានេះដែរ កម្ពុជាក៏បានទាមទារឱ្យប្រទេសថៃ ដោះលែងពលរដ្ឋកម្ពុជា និងនាវានេសាទរបស់ពួកគេវិញជាបន្ទាន់ បញ្ឈប់នូវសកម្មភាពល្បាតដោយគ្មានការអនុញ្ញាត ក៏ដូចជាសកម្មភាពអនុវត្តច្បាប់នៅក្នុងដែនសមុទ្រ កម្ពុជា និងចាត់វិធានការសមស្របដើម្បីទប់ស្កាត់មិនឱ្យសកម្មភាពបែបនេះកើតជាថ្មីនាពេលអនាគត៕