ថ្មីៗនេះពិធីមង្គលការរបស់កូនកំលោះ សុខ សេរីឧត្តម និងកូនក្រមុំ លី សូវុនដារីតា បានធ្វើឱ្យទស្សនិកជនមានការចាប់អារម្មណ៍យ៉ាងខ្លាំងដោយសារតែកម្មវិធីទាំងមូលប្រព្រឹត្តទៅយ៉ាងសាមញ្ញប៉ុន្តែមិនធម្មតា។ នៅក្នុងពិធីមង្គលនេះគេក៏ឃើញវត្តមានតារាចម្រៀង វណ្ណថាន ចូលរួមក្នុងវង់តន្រ្តីផងដែរជាពិសេសទទួលបានការសរសើរពីសម្តេចពុកទៀតផង។
ជឿជាក់ថាទស្សនិកជនអាចនឹងបានឃើញភាគច្រើននៅពេលពិធីមង្គលការរបស់ត្រកូលអភិជនតែងតែប្រព្រឹត្តទៅយ៉ាងអធិកអធមអមដោយផ្កាស្រស់តុបតែងលម្អយ៉ាងស្រស់ស្អាតប៉ុន្តែថ្មីៗនេះពិធីមង្គលការបែបសាមញ្ញៗកំពុងតែអង្រួនបេះដូងទស្សនិកជនដូចគ្នា។ ក្នុងពិធីទាំងមូលគេឃើញការរៀបចំតុបតែងលម្អយ៉ាងសាមញ្ញបំផុតតាមបែបប្រពៃណីខ្មែរមិនឆើតឆាយឡើយ។
ងាកទៅកាន់កូនក្រមុំវិញការតុបតែងខ្លួនរៀបចំយ៉ាងធម្មជាតិបំផុតដែលស្ទើរតែមិនធ្លាប់ឃើញពីមុនឡើយ។ គួរឱ្យដឹងថា កូនកំលោះគឺជាកូនប្រុសរបស់ ឯកឧត្តម សុខ ចិន្ដាសោភា ឧបនាយករដ្ឋមន្ត្រី និងលោកជំទាវ ទន់ ឯកសូហ្វី ចំណែកឯកូនក្រមុំគឺជាកូនស្រីរបស់លោកឧកញ៉ាសៅ សេងហាក់ សហព័ន្ធខ្មែរកីឡាហាប់គីដូ និងលោកជំទាវរស់ តារ៉ា។
នៅក្នុងពិធីមង្គលនេះរំលេចទៅដោយសិល្បករ សិល្បការិនីជាច្រើនរូបហើយអ្វីដែលប្លែកជាងសព្វមួយដងគឺមានវត្តមានរបស់តារាចម្រៀង វណ្ណថាន។ មានចំណេះជំនាញពូកែខាងឧបករណ៍ភ្លេងខ្មែរជាច្រើនមុខ វណ្ណថាន បានបញ្ចេញស្នាដៃរបស់ខ្លួនដោយលេងឧបករណ៍ដូចជា ខ្លុយ ស្គរទឹក រនាត និងឃឹម ដោយរួមផ្សំជាមួយនឹងអ្នកប្រគំភ្លេងជាច្រើនទៀត។ ទេពកោសល្យរបស់តារាចម្រៀង វណ្ណថាន ក៏ទទួលបានការសរសើរពីថ្នាក់ដឹកនាំកំពូលផងដែរ។
គួរបញ្ជាក់ផងដែរថាតារាចម្រៀង វណ្ណថាន គឺចេះលេងឧបករណ៍ភ្លេងជិត៣០បានយ៉ាងស្ទាត់ជំនាញហើយទទួលបានការស្ញែងសរសើរយ៉ាងខ្លាំងទាំងអ្នកគាំទ្រក្នុងស្រុកនិងក្រៅស្រុក៕
