មកដឹងពីវិធីងាយៗដើម្បីការពារកូនតូចពីការបំពុ.លខ្យល់

សូមកុំមើលស្រាលបញ្ហានេះឲ្យសោះ! ក្នុងរយៈពេលប៉ុន្មានថ្ងៃនេះ កម្ពុជាក៏ដូចជាប្រទេសក្នុងតំបន់ ជាពិសេសនៅរាជធានីភ្នំពេញ មានករណីប្រែប្រួលគុណភាពខ្យល់ដែលអាចមានឥទ្ធិពលយ៉ាងខ្លាំង ដល់គុណភាពខ្យល់ និងសុខភាពរបស់ប្រជាជនគ្រប់វ័យ ។ មូលហេតុនេះហើយទើបការយល់ដឹងអំពីរបៀបការពារខ្លួនគឺជារឿងដែលចាំបាច់បំផុត បើទោះជាការបំពុលមិនទាន់ឈានដល់កម្រិតប្រកាសអាសន្នក៏ដោយ។

យោងតាមផេកផ្លូវការរបស់ UNICEF Cambodia នៅថ្ងៃទី១២ ខែកុម្ភៈនេះបានបង្ហាញថា ការបំពុលខ្យល់អាចបង្កគ្រោះថ្នាក់ខ្លាំង ជាពិសេសសម្រាប់កុមារតូចៗដែលមិនទាន់មានសមត្ថភាពការពារខ្លួនដោយខ្លួនឯង។ ដូច្នេះប្រសិនបើអ្នកមានអារម្មណ៍ថា គុណភាពខ្យល់មិនសូវល្អ នេះគឺជាវិធីសាស្ត្រសាមញ្ញៗមួយចំនួន ដែលអាចជួយការពារក្មេងតូចៗពីការបំពុលខ្យល់បានតាមរយៈ៖
១. អំឡុងពេលដែលមានការបំពុលខ្យល់ខ្ពស់ សូមឱ្យកុមារនៅក្នុងផ្ទះ និងកាត់បន្ថយការលេង ឬធ្វើសកម្មភាពដែលហត់នឿយខ្លាំងនៅខាងក្រៅ។
២. ប្រសិនបើចាំបាច់ត្រូវចេញក្រៅ សូមពាក់ម៉ាស់ឲ្យបានត្រឹមត្រូវ និងជិតល្អ។
៣. ពង្រឹងសុខភាពកូនរបស់អ្នក តាមរយៈរបបអាហារដែលមានសារធាតុចិញ្ចឹមសម្បូរទៅដោយ វីតាមីន។
៤. តាមដានគុណភាពខ្យល់ជាប្រចាំ តាមរយៈទំព័រហ្វេសប៊ុករបស់ក្រសួងបរិស្ថាន
ជាមួយនឹងការចែករំលែកពីវិធីសាមញ្ញៗដើម្បីការពារសុខភាពកុមារដូចខាងលើនេះ អង្គការ UNECEF បានគូសបញ្ជាក់ថា ការយកចិត្តទុកដាក់ប្រុងប្រយ័ត្ន នឹងជួយឱ្យសួតរបស់កូនតូចៗមានសុខភាពល្អ និងរឹងមាំ។

ដោយឡែកបើតាមការជូនដំណឹងរបស់ក្រសួងបរិស្ថាននៅរសៀលថ្ងៃព្រហស្បត្តិ៍នេះ គុណភាពខ្យល់នៅកម្ពុជា មានកំហាប់ភាល្អិតនិចល PM2.5 គិតជាមធ្យម តូចជាងកម្រិតស្តង់ដា ៥០មីក្រូក្រាម ក្នុងមួយម៉ែត្រគូបខ្យល់ (µg/m3) និងគិតជាសន្ទស្សន៍គុណភាពខ្យល់ (Air Quality Index) គឺ “ល្អ”។ ដូចនេះ កម្ពុជាមិនទាន់មានកម្រិតការបំពុលខ្យល់ ដល់កម្រិតប្រកាសអាសន្ន និងកំណត់ឱ្យមានវិធានការសុខភាពសាធារណៈនៅឡើយ។

សូមបញ្ចាក់ថា ប្រភពសំខាន់ៗនៃការកើតមានការប្រែប្រគុណភាពខ្យល់នោះ គឺមកពីការបង្កឡើងដោយការកើនឡើងនៃឧស្ម័នផ្សែងពីយានយន្ត សកម្មភាពឧស្សាហកម្ម ការដុតសំណល់កសិកម្ម គល់ជញ្ជ្រាំង ភ្លើងឆេះព្រៃ ការដុតសំរាម សំណល់រឹង ប្លាស្ទិកនៅតាមទីសាធារណៈ និងតាមលំនៅដ្ឋាន និងពីប្រភពផ្សេងៗទៀត ក្នុងលក្ខខណ្ឌអាកាសធាតុបែបនេះ បានធ្វើឱ្យសារធាតុ បំពុលដែលបានបញ្ចេញទាំងនេះ នៅវិលវល់ក្នុងស្រទាប់បរិយាកាសខាងក្រោម និងកើនឡើង បន្តិចម្តងៗ បង្កើតជាការបំពុលខ្យល់។ កត្តានេះកើតឡើងដោយសកម្មភាពរបស់មនុស្ស ដែលបានធ្វើឱ្យសារធាតុពុល ឬ សមាសធាតុផ្សេងៗ ប្រមូលផ្តុំ និងកើនឡើងបន្តិចៗ នៅស្រទាប់បរិយាកាសខាងក្រោម ហើយក៏បង្កើតបានជាអ័ព្ទដែលយើងមើលឃើញ៕