ទស្សនិកជនពេញចិត្តពាក្យសម្តីរបស់ ឱក សុគន្ធកញ្ញា និយាយពីការរស់នៅជាខ្លួនឯង

ពាក្យសម្តីរបស់តារាចម្រៀង ឱក សុគន្ធកញ្ញា លើកឡើងពីការរស់នៅជាខ្លួនឯងប្រកប ដោយភាពត្រឹមត្រូវកំពុងត្រូវបានទស្សនិកជនសរសើរជាច្រើនព្រមទាំងនិយាយថាមួយម៉ាត់ៗរបស់តាចម្រៀងរូបនេះពិតជាមានអត្ថន័យ។

កាលពីពេលថ្មីៗនេះនៅក្នុងកម្មវិធីប្រគំតន្រ្តីដើម្បីសប្បុរសធម៌បន្ទាប់ពីបកស្រាយបទចម្រៀងរួចតារាចម្រៀង ឱក សុគន្ធកញ្ញា ត្រូវបាន MC ក្នុងកម្មវិធីសរសើរថាតារាចម្រៀងរូបនេះទទួលបានការស្រលាញ់ចូលចិត្តមិនថាទាំងនៅលើឆាកឬក្រោយឆាកនោះទេ។ តារាចម្រៀងរូបនេះបាននិយាយទៅកាន់សាធារណជនដែរថានេះមិនមែនជាការរៀបចំអត្តចរិតអ្វីនោះទេ តែជារបត់នៃការផ្លាស់ប្តូរមិនមែនជាការប្រឹងសម្តែងដើម្បីឱ្យបានល្អ ឬប្រឹងសម្តែងធ្វើជាមនុស្សផ្សេងទៀត។

តារាចម្រៀង ឱក សុគន្ធកញ្ញា ថានោះជាការរស់នៅជាខ្លួនឯងហ៊ានបង្ហាញទៅកាន់ទស្សនិកជន ប្រសិនជាលាក់ទុកយូរខែឆ្នាំថ្ងៃណាមួយដែលមានការពិបាកចិត្តប្រាកដជាទាញយើងចុះទៅ។ អ្នកនាងបានពន្យល់ទៀតថា ការរស់នៅជាខ្លួនឯងមិនមែនការរស់នៅដោយមិនល្អនោះទេ ពីព្រោះមិនប្រាកដថាយើងកើតមកមានចរិតល្អស្រាប់នោះទេ ប៉ុន្តែយើងត្រូវលត់ដំចិត្តខ្លួនឯង។ តារាចម្រៀង ឱក សុគន្ធកញ្ញា ថានៅក្នុងចិត្តមនុស្សម្នាក់ៗតែងតែមានចិត្តចង់បាន លោភលន់ រឿងអាក្រក់ចូលមកដែរ ដូច្នេះត្រូវចេះបែងចែកល្អ អាក្រក់ សខ្មៅ។

ជាមួយគ្នានេះ អ្នកនាង ឱក សុគន្ធកញ្ញា បន្តជំរុញលើកទឹកចិត្តឱ្យអ្នកគាំទ្ររស់នៅជាខ្លួនឯង ហ៊ានចាប់ក្តីស្រមៃ ដែលជាក្តីស្រមៃមួយមិនប៉ះពាល់អ្នកដទៃ មិនបំពានអ្នកណា ជាអំពើសុចរិត។

គួរបញ្ជាក់ផងដែរ ឱក សុគន្ធកញ្ញា គឺជាតារាចម្រៀងដែលសាងភាពល្បីល្បាញមកជាច្រើនឆ្នាំក្នុងសង្គមសិល្បៈពុំសូវមានរឿងអាស្រូវមិនល្អនោះទេដែលអាចឈរជើងបានយ៉ាងរឹងមាំ អាចថាជាបុគ្គលគំរូម្នាក់នៅក្នុងអាជីពសិល្បៈ។ ងាកមកកាន់ជីវិតឯកជន តារាចម្រៀងរូបនេះតែងតែបង្ហាញពីភាពរីករាយ ចុះសម្រុងជាមួយនឹងគ្រួសារ ផ្តល់សេចក្តីស្រលាញ់មកកាន់កូនៗនិងស្វាមី៕