«អគារអតីតសាលាបដិវត្តន៍»ប្រឈមនឹងការបាក់រលំ ដែលជំរុញឲ្យពលរដ្ឋដែលរស់នៅទីនោះត្រូវរើចេញជាបន្ទាន់

(ភ្នំពេញ) ៖ សំណង់អគារអតីតសាលាបឋមសិក្សាបដិវត្តន៍ ស្ថិតនៅកណ្ដាលទីប្រជុំជនក្នុងសង្កាត់ផ្សារថ្មីទី៣ ខណ្ឌដូនពេញ នឹងក្លាយជាសំណង់អគារចំណាស់មួយទៀតនៅរាជធានីភ្នំពេញ ដែលរដ្ឋត្រូវវា.យកម្ទេ.ចចោលក្រោយពិនិត្យឃើញថាវាប្រឈមនឹងការបាក់រលំភ្លាមៗ ដោយទទូចឲ្យពលរដ្ឋដែលរស់នៅនិងអាស្រ័យផលលើអគារនោះធ្វើការចាកចេញជាបន្ទាន់។

យោងតាមសេចក្តីប្រកាសព័ត៌មានដែលចេញផ្សាយរបស់ក្រសួងរៀបចំដែនដី នគរូបនីយកម្ម និងសំណង់ នៅថ្ងៃទី៣០ ខែមករា ឆ្នាំ២០២៦ ក្រសួងរៀបចំដែនដី នគរូបនីយកម្ម និងសំណង់ អំពាវនាវឱ្យពលរដ្ឋដែលរស់នៅអគារអតីតសាលាបឋមសិក្សាបដិវត្តន៍ រកកន្លែងថ្មីដែលមានសុវត្ថិភាពរស់នៅជាបន្ទាន់ បន្ទាប់ពីពិនិត្យឃើញថាសំណង់អគារនេះ មានសភាពចាស់ទ្រុឌទ្រោមខូចគុណភាព អាចបង្កគ្រោះថ្នាក់ជាយថាហេតុ។

ក្រសួងបានឱ្យដឹងថា៖ «ការវិភាគបច្ចេកទេសឡើងវិញដោយអគ្គនាយកដ្ឋានសំណង់ និងមន្ទីរពិសោធន៍ជាតិសំណង់ បានរកឃើញថា គុណភាពសំណង់អគារនេះបានធ្លាក់ចុះខ្សោយយ៉ាងខ្លាំង។ ស្រទាប់បេតុងនិងសរសៃដែកភាគច្រើនបំផុតនៃធ្នឹម កម្រាលខណ្ឌ និងសសរ បានផ្ទាត់ចេញ និងស្នមច្រែះធ្ងន់ធ្ងរ ដែលធ្វើឱ្យបាត់បង់គុណភាពនិងលទ្ធភាពទ្រទ្រង់អគារទាំងមូល»។

ហេតុនេះ ក្រសួងរៀបចំដែនដី អះអាងថា អគាខាងលើអាចប្រឈមនឹងហានិភ័យនៃការបាក់រលំ ដែលអាចកើតមានឡើងជាយថាហេតុ និងចាត់ថ្នាក់អគារមួយនេះ ជាសំណង់ដែលមានសភាពគ្រោះថ្នាក់ ដែលអាចកើតមានឡើងភ្លាមៗ។ ដូច្នេះដើម្បីបង្ការនិងបញ្ចៀសគ្រោះថ្នាក់ទាំងអស់នេះ ក្រសួងរៀបចំដែនដីបានអំពាវនាវយ៉ាងដូច្នេះ៖ «ប្រជាពលរដ្ឋ ដែលកំពុងរស់នៅ ប្រើប្រាស់ អាស្រ័យផលក្នុងអគារនិងដីកម្មសិទ្ធរបស់អគារខាងលើនេះ ស្វែងរកទីកន្លែងស្នាក់នៅថ្មីដែលមានសុវត្ថិភាពជាបន្ទាន់»។

តាមការបញ្ជាក់នៅក្នុងសេចក្ដីប្រកាសរបស់ក្រសួង គឺនៅថ្ងៃទី២ ខែកុម្ភៈ ឆ្នាំ២០២៦ ក្រុមការងារនឹងចាប់ផ្តើមដំឡើងផ្ទាំងសេចក្តីប្រកាសព្រមាននៅទីតាំងអគារ ស្ថិតនៅផ្លូវលេខ១៤៤ កែងផ្លូវលេខ៤៩ សង្កាត់ផ្សារថ្មីទី៣ ខណ្ឌដូនពេញ។ ហើយក្នុងរយៈពេលមិនលើសពី ៣០ ថ្ងៃ ចាប់ពីថ្ងៃចេញសេចក្តីប្រកាសព័ត៌មាន ក្រសួងរៀបចំដែនដី នគរូបនីយកម្ម និងសំណង់ រួមជាមួយរដ្ឋបាលរាជធានីភ្នំពេញ នឹងមិនអនុញ្ញាតឲ្យមានការបន្តស្នាក់នៅ ឬប្រើប្រាស់អគារនេះទៀតឡើយ ហើយនឹងធ្វើការហ៊ុព័ទ្ធ និងហាមឃាត់ការចូលទៅក្នុងតំបន់សំណង់។

ហេតុដូចបានជម្រាបជូនដូចខាងលើ អាជ្ញាធរបានអំពាវនាវឱ្យប្រជាពលរដ្ឋ និងសាធារណជនចូលរួមសហការអនុវត្តវិធានការខាងលើ ដោយប្រុងប្រយ័ត្ន និងទទួលខុសត្រូវខ្ពស់ ដើម្បីធានាសុវត្ថិភាពជីវិត និងទ្រព្យសម្បត្តិ៕