ទីបំផុត ទេព ពិសិដ្ឋ ចេញមុខបកស្រាយនិងទម្លាយរឿងឪពុកធ្លាប់ប្រើប្រាស់អំពើហិ.ង្សាក្នុងគ្រួសារ

បន្ទាប់ពីរងនូវការវែកញែកអំពីរឿងក្នុងរង្វង់គ្រួសារពីសាធារណជនទីបំផុតតារាចម្រៀង ទេព ពិសិដ្ឋ បានចេញមកបកស្រាយហើយដោយទម្លាយពីរឿងឪពុកធ្លាប់ប្រើអំពើហិង្សានៅក្នុងគ្រួសារ។ ទោះបីជាចេញមកលាតត្រដាងពីឪពុករបស់ខ្លួន ទេព ពិសិដ្ឋ នៅតែបញ្ជាក់ចុងក្រោយថារូបគេនៅតែស្រលាញ់ ដឹងគុណ នឹករលឹកឪពុកជានិច្ចមិនដែលស្អប់ម្តងណាឡើយ។

នៅរសៀលថ្ងៃទី២ ខែកុម្ភៈ តារាចម្រៀងកំពុងឡើងកូដ ទេព ពិសិដ្ឋ បានចេញមកបង្ហោះសំណេរដោយក្តីសោកសៅពីពាក្យក្នុងចិត្តទៅកាន់ឪពុករបស់ខ្លួនថា « ប៉ា ខ្ញុំមកភ្នំពេញមកធ្វើការប៉ាថាខ្ញុំរត់ចោលស្រុក? ប្រាក់ពានបានមកខ្ញុំដកទៅទិញសម្ភារៈធ្វើការព្រោះគ្មានអ្នកណាជួយ តែប៉ាភ្លេចហើយឬ? ផ្ទះថ្មីប៉ាធ្វើតាមពិតទៅគ្មានបន្ទប់ខ្ញុំទេ ម៉ាក់លួងប៉ារាប់ខែ ទើបប៉ាធ្វើឱ្យខ្ញុំមិនមែនមិនដឹង។ ប៉ាបានប្រាប់ប្អូនៗឱ្យឈប់ហៅឈ្មោះខ្ញុំ ខ្ញុំឈឺចាប់ ដេកយំរាល់យប់ ។ ប៉ាដឹងអត់ថាម៉ាក់មិនចង់ចាកចេញទេតែទ្រាំមើលប៉ាវៃកូនមិនបានទើបម៉ាក់ចាកចេញ ខ្ញុំមិនមែនមិនដឹងថាប៉ាដៃធ្ងន់ ប៉ះខ្ញុំមិនអីទេ តែប្អូនៗនៅតូចប៉ាក៏គួរណាតែលើកលែងប៉ាដែលមានពេលអង្គុយគិតពីរឿងនឹងអត់?»។

ម្ចាស់បទ «យប់ស្ងាត់» បានបញ្ជាក់ថារូបគេជាកូនដែលជ្រើសរើសនៅខាងប៉ាពេលគ្រួសារបែកបាក់គ្នាដំបូងតែក្នុងចិត្តឪពុករបស់ខ្លួនចងគំនុំមិនដោះលែងទើបបានជារឿងវែងឆ្ងាយហើយថារូបគេមិនសប្បាយនឹងទីក្រុងទេគ្រាន់តែការងារមើលទៅដូចសប្បាយ។

ទេព ពិសិដ្ឋ បន្តថា «ខ្ញុំជាកូនទៅលេងប៉ារហូតទោះប៉ាប្រាប់ម៉ាក់ថាកុំឱ្យអាឆ្កែនេះជាន់ផ្ទះអញទៀតក៏ដោយ បើនិយាយឱ្យស្រួលទៅ ឆាតក៏ខ្ញុំឆាតទៅប៉ា ខលក៏ខ្ញុំខលទៅប៉ាហើយក៏ជិះទៅលេងប៉ា ហើយក៏សុំឱបប៉ា ប៉ាភ្លេចលឿនម្ល៉េះ ប៉ាសួរតែអ្នកជិតខាងក៏គេដឹងដែរ។ ប៉ាដឹងអត់ខ្ញុំមិនដែលត្រូវការនឹងទាមទាលុយប៉ា ឬក៏ចង់បានលុយប៉ាម្ដងណាទេតែប៉ាទៅជាធ្វើបែបនេះ។ ខ្ញុំមិនដែរជឿទេ ។ គ្រប់ពេលដែរប៉ាជួបមុខខ្ញុំនៅក្រៅប៉ាហៅខ្ញុំកូនៗ ពេញៗម៉ាត់ ខ្ញុំសប្បាយចិត្តណាស់តែខ្ញុំចេញពីផ្ទះមិនបានប៉ុន្មានថ្ងៃផង ប៉ា Call ទៅម៉ាក់ហៅខ្ញុំអា៎ឆ្កែ»។

សំណេរដែលពោរពេញដោយសោកសៅ ទេព ពិសិដ្ឋ បានបង្ហាញពីម្តាយរបស់ខ្លួនមិនអាចទ្រាំនឹងឪពុក ទើបចាកចេញពីផ្ទះដោយមិនយកលុយតាមខ្លួនសូម្បី១រៀល ត្រូវចិញ្ចឹមកូនៗហើយត្រូវផ្ញើលុយឱ្យរូបគេទៀតពីព្រោះពេលនោះកំពុងដេញចាប់ក្ដីស្រមៃ។ តារាចម្រៀងរូបនេះថា «រឿងខ្លះប៉ាគិតតែម្នាក់ឯង ស្រមៃម្នាក់ឯងរហូតដល់ថ្នាក់គិតថាការស្រមើរស្រមៃមួយនឹងជាការពិត ខ្ញុំមិនដែលតបតព្រោះខ្ញុំស្រលាញ់ប៉ា តែខ្ញុំក៏មិនអាចឈរមើលប៉ាថាឱ្យម៉ាក់បែបហ្នឹងដែរ។ ប៉ាវៃពួកខ្ញុំដើម្បីឱ្យអស់ចិត្តខ្លួនឯង ប៉ាធ្វើចុះតែពួកខ្ញុំព្រមចាញ់ ព្រោះដើម្បីតែមនុស្សខ្លួនស្រលាញ់។ មកដល់ពេលនេះក៏កូននៅតែស្រលាញ់ប៉ា នឹករលឹកប៉ា នឹងដឹងគុណប៉ា មិនដែលស្អប់ប៉ាម្ដងណាទេ»។ ទេព ពិសិដ្ឋ បានសូមទោសសាធារណជននិងអ្នកគាំទ្រទាំងអស់ដែលធ្វើឱ្យមិនសប្បាយចិត្ត និងឃើញរឿងបែបនេះនៅក្នុងរង្វង់គ្រួសាររបស់ខ្លួន។

ក្រោយពីតារាចម្រៀងរូបនេះបានចេញមកបកស្រាយអ្នកនៅក្នុងរង្វង់គ្រួសារនិងអ្នកគាំទ្របានបង្ហាញការអាណិតនិងលើកទឹកចិត្តយ៉ាងច្រើនមកកាន់ ទេព ពិសិដ្ឋ៕