ពេលទិញសម្លៀកបំពាក់ថ្មីមក តើគួរតែស្លៀកពាក់តែម្តង ឬបោកគក់ជាមុន?

ពេលទិញសម្លៀកបំពាក់ថ្មីពីហាងមក តើគួរតែស្លៀកពាក់តែម្តង ឬបោកគក់ជាមុនសិន? ជាទូទៅ មនុស្សភាគច្រើនតែងតែស្លៀកពាក់តែម្តង ពីព្រោះគ្មានស្នាមប្រឡាក់ ហើយក្លិនវិញក៏ក្រអូប ដែលខុសគ្នាពីសម្លៀកបំពាក់ជជុះ ត្រូវតែបោកគុកជាមុនដើម្បីការពារការចម្លងមេរោគសើស្បែក ។ ប៉ុន្តែបើតាមអ្នកជំនាញនានាព្រមានថា នេះជាការគិតខុស និងណែនាំឱ្យផ្លាស់ប្តូរទម្លាប់ជាបន្ទាន់ ។

សម្លៀកបំពាក់ថ្មីត្រូវបានរចនាម៉ូដដើម្បីតម្រូវចិត្តអតិថិជន ព្រមជាមួយក្លិនសម្លៀកបំពាក់ថ្មីៗដែលមិនធ្លាប់ប្រើប្រាស់ពីមុន រីឯសាច់ក្រណាត់ក៏ស្អាតដែរ មានសភាពថ្មី មិនហើរពណ៌ ។ មនុស្សភាគច្រើនបានស្លៀកពាក់តែម្តងដោយគ្មានភាពស្ទាក់ស្ទើរ ជាពិសេស ពេលប្រញាប់ទៅខាងក្រៅ ឬមានការណាត់ជួបសំខាន់ ប៉ុន្តែអ្នកជំនាញសើស្បែក និងអ្នកជំនាញឧស្សាហកម្មវាយនភណ្ឌ និយាយថា ការបោកគក់សម្លៀកបំពាក់ថ្មីមុនស្លៀកពាក់ គឺជាជម្រើសល្អជាង ទោះជាមិនសូវប្រឈមនឹងឆ្លងមេរោគពីសម្លៀកបំពាក់ថ្មី ប៉ុន្តែវាមានផលប៉ះពាល់ផ្សេងទៀត ។

លោកវេជ្ជបណ្ឌិត Jamie L. Miller និងជាសាស្ត្រាចារ្យផ្នែកសើស្បែកមកពី Vanderbilt Health សហរដ្ឋអាមេរិកថា សម្លៀកបំពាក់ថ្មី ឬកម្រាលពូកថ្មី ក៏អាចចម្លងមេរោគមករាងកាយដែរ ប៉ុន្តែវាតិចតួច ខណៈលោកវេជ្ជបណ្ឌិត David C. Gaston ក៏និយាយបែបនេះ ។ ការឆ្លងមេរោគតិចតួចពីសម្លៀកបំពាក់ថ្មី មិនមែនមានន័យថា វាមិនឆ្លងនោះទេ វិធីល្អដើម្បីការពារសុខភាពស្បែក គួរបោកគក់ជាមុនសិន ។

ហេតុអ្វីគួរបោកគក់សម្លៀកបំពាក់ថ្មីមុនពេលស្លៀកពាក់?

១-ថ្នាំជ្រលក់ក្រណាត់ ៖ ថ្នាំជ្រលក់ក្រណាត់អាចមិនស្អិតជាប់ជាមួយសម្លៀកបំពាក់បានល្អនោះទេ ថ្នាំជ្រលក់នេះនឹងចេញមកក្រៅប៉ះពាល់ស្បែករបស់យើង ឬប្រឡាក់សម្លៀកបំពាក់ផ្សេងទៀត ដែលបណ្តាលឱ្យមានបញ្ហាស្បែក ឬរមាស់ ពិបាកនឹងព្យាបាល ។

២-សារធាតុគីមី ៖ សារធាតុគីមីជាប់សម្លៀកបំពាក់ថ្មី ជាពិសេស សារធាតុផូលីអេសស្ទ័រ និងនីឡុង មានតួនាទីរក្សាពណ៌សម្លៀកបំពាក់ ជួយឱ្យសម្លៀកបំពាក់ទន់ ឬការពារស្នាមជ្រីវជ្រួញ ប៉ុន្តែសម្រាប់អ្នកងាយប្រតិកម្មស្បែក សារធាតុគីមីទាំងនេះនឹងបណ្តាលឱ្យរមាស់ ស្បែកឡើងក្រហម ស្បែកស្ងួត ឬរលាកស្បែក ដោយសារមិនបានបោកគក់ ។

៣-មេរោគ ៖ មូលហេតុមួយទៀតដែលអ្នកជំនាញណែនាំឱ្យបោកសម្លៀកបំពាក់ថ្មី គឺមេរោគ ពីព្រោះមុនពេលមកដល់ដៃយើង សម្លៀកបំពាក់ថ្មីត្រូវឆ្លងកាត់ការដឹកជញ្ជូនច្រើនដំណាក់កាល ចាប់ពីរោងចក្រ ឃ្លាំងស្តុកទំនិញ ទូរកុងទឺន័រ ហាងលក់សម្លៀកបំពាក់ និងឆ្លងកាត់ការប៉ះពាល់ ឬលរសម្លៀកបំពាក់ពីអតិថិជនជាច្រើននាក់ ។ ហេតុនេះ សម្លៀកបំពាក់ថ្មីអាចមានមេរោគ ធូលីកខ្វក់ ឬសត្វល្អិត ដែលតម្រូវឱ្យបោកជាមុនដើម្បីកម្ចាត់ភាពកខ្វក់ ។

ក្រៅពីនេះ សម្លៀកបំពាក់ថ្មីជាច្រើនបានដឹកជញ្ជូនតាមផ្លូវឆ្ងាយ និងដាក់ក្នុងទូរកុងទឹន័រជាច្រើនសប្តាហ៍ ឬច្រើនខែ ជាមួយអាកាសធាតុក្តៅខ្លាំង ។ នេះជាមូលហេតុធ្វើឱ្យមេរោគធំធាត់លើសម្លៀកបំពាក់ថ្មី និងពុំអាចមើលឃើញដោយភ្នែកទទេ ។

ហាងមួយចំនួនមិនអនុញ្ញាតឱ្យអតិថិជនលរសម្លៀកបំពាក់ថ្មី ពីព្រោះនាំមកនូវមេរោគតាមរយៈស្បែក ច្រមុះ ឬផ្លូវដង្ហើម ហើយមេរោគនឹងចម្លងទៅអតិថិជនផ្សេងទៀត ។ យើងគួរបោកសម្លៀកបំពាក់ថ្មីជានិច្ចមុនពេលស្លៀកពាក់ដើម្បីការពារផលប៉ះពាល់ស្បែក និងមានអនាម័យ ពីព្រោះការបោកអាចកម្ចាត់សារធាតុគីមី និងមេរោគ ដែលមនុស្សភាគច្រើនពុំបានគិតដល់បញ្ហានេះ ៕