តារាសម្តែងចិន Angelababy បានទាក់ទាញចំណាប់អារម្មណ៍ទស្សនិកជនយ៉ាងខ្លាំងនៅពេលដែលនាងវិលត្រឡប់មកលើកម្រាលព្រំក្រហមវិញនៅក្នុងព្រឹត្តិការណ៍កម្សាន្តមួយ បន្ទាប់ពីសកម្មភាពរបស់នាងត្រូវបានរឹតត្បិតអស់រយៈពេល២ឆ្នាំដោយសារតែទៅមើល Lisa សមាជិក BLACKPINK ។
នៅល្ងាចថ្ងៃទី១៨ ខែធ្នូ តារាស្រីវ័យ៣៦ឆ្នាំរូបនេះបានចូលរួមព្រឹត្តិការណ៍មួយដែលរៀបចំដោយទស្សនាវដ្តី BB Art ជាមួយនឹងសិល្បករផ្សេងទៀត។ យោងតាមប្រព័ន្ធផ្សព្វផ្សាយ Sohu Angelababy បានក្លាយជាចំណុចកណ្តាលនៃការចាប់អារម្មណ៍ ដោយមានពាក្យគន្លឹះថា «Angelababy ត្រលប់មកលើកម្រាលព្រំក្រហមវិញបន្ទាប់ពីពីរឆ្នាំ» កំពុងពេញនិយមនៅលើ Weibo។
អ្នកគាំទ្ររាប់រយនាក់បានរង់ចាំនៅខាងក្រៅដើម្បីថតតារាស្រីរូបនេះនិងអបអរសាទរនាង។ អ្នកទស្សនារាប់ពាន់នាក់បានបញ្ចេញមតិថា តារារូបនេះមើលទៅអស្ចារ្យ ហើយសម្លៀកបំពាក់នេះធ្វើឱ្យរូបរាងរបស់នាងមើលទៅទាក់ទាញ។
Angelababy ធ្លាប់ជាតារាម្នាក់ក្នុងចំណោមតារាដែលសកម្មបំផុតនៅក្នុងវិស័យសិល្បៈចិន ដោយមានការបង្ហាញខ្លួនញឹកញាប់។ អាជីពរបស់នាងបានជាប់គាំងនៅចុងឆ្នាំ ២០២៣ បន្ទាប់ពីនាងបានបង្ហាញខ្លួននៅក្នុងកម្មវិធីរាំស្រាតរបស់តារាចម្រៀង Lisa នៅ Crazy Horse ក្នុងប្រទេសបារាំង។ អ្នកសរសេរប្លុកកម្សាន្តជាច្រើនបានអះអាងថា Angelababy បានរំលោភលើបទប្បញ្ញត្តិសម្រាប់អ្នកសំដែង រួមទាំងការហាមឃាត់សិល្បករដែលរៀបចំ ចូលរួម ឬផ្សព្វផ្សាយការសម្តែងដែលបង្ហាញអារម្មណ៍ផ្លូវភេទ ឬអាសអាភាស។ នៅក្នុងប្រទេសចិន រាំស្រាតត្រូវបានចាត់ថ្នាក់ជា «ការសម្តែងអាសអាភាស»។
ហេតុការណ៍នេះបាននាំឱ្យមនុស្សរាប់លាននាក់អំពាវនាវឱ្យធ្វើពហិការ Angelababy។ យោងតាមគេហទំព័រ 163.com Angelababy បានប្រឈមមុខនឹង ព្យុះដ៏ធំបំផុត នៃអាជីពរបស់នាងចាប់តាំងពីចូលប្រឡូកក្នុងវិស័យកម្សាន្តក្នុងឆ្នាំ ២០០៣។ ចាប់តាំងពីខែវិច្ឆិកា ឆ្នាំ ២០២៣ មក នាងត្រូវបានហាមឃាត់មិនឱ្យបង្ហោះ និងបញ្ចេញមតិនៅលើវេទិកាប្រព័ន្ធផ្សព្វផ្សាយសង្គម Weibo ពីបទ «រំលោភលើច្បាប់ និងបទប្បញ្ញត្តិវេទិកា»។ វេទិកាវីដេអូធំបំផុតរបស់ប្រទេសចិន Douyin ក៏បានរារាំងអ្នកប្រើប្រាស់ពីការតាមដានគណនីរបស់ Angelababy ផងដែរ។ នាងមានអ្នកគាំទ្រប្រហែល ១៤០ លាននាក់នៅទូទាំងវេទិកាទាំងនេះ។
នៅដើមឆ្នាំ ២០២៤ គណនីប្រព័ន្ធផ្សព្វផ្សាយសង្គមរបស់នាងបានវិលមករកភាពប្រក្រតីវិញ ប៉ុន្តែនាងមិនបានបង្ហាញខ្លួននៅក្នុងព្រឹត្តិការណ៍ភាពយន្តណាមួយនៅចិនទេ ហើយក៏មិនអវត្តមានពីកម្មវិធីទូរទស្សន៍ ឬព្រឹត្តិការណ៍ផ្សាយពាណិជ្ជកម្មដែរ។ តារាស្រីរូបនេះបានចូលរួមក្នុងកម្មវិធីកម្សាន្តមួយចំនួនតូចប៉ុណ្ណោះនៅហុងកុង។
នៅក្នុងខែមករា ឆ្នាំ២០២៥ រឿងភាគដែលសម្តែងដោយ Angelababy ត្រូវបានចេញផ្សាយ ដែលនាំឱ្យទស្សនិកជនជាច្រើនជឿថានេះជាសញ្ញាមួយដែលបង្ហាញថានាងកំពុងវិលត្រឡប់ទៅរកការងារសកម្មនៅក្នុងប្រទេសចិនបន្តិចម្តងៗ៕
