នារីកូរ៉េ ចេញមកធ្វើជាសាក្សីក្រោយកម្ពុជារងការឈឺចាប់ពីការផ្សាយអវិជ្ជមានរបស់ប្រព័ន្ធផ្សព្វផ្សាយកូរ៉េ

ក្រោយពី ហ៊ូអ៊ីន ហ្វាង ចេញមកបញ្ជាក់ថាប្រទេសកម្ពុជាពុំអាក្រក់ដូចអ្វីដែលចុះផ្សាយរបស់ប្រព័ន្ធផ្សព្វផ្សាយកូរ៉េ ពេលនេះ នារីកូរ៉េ ដែលជាបុគ្គលមានឥទ្ធិពលមួយរូបនៅលើបណ្តាញសង្គមដែលរស់នៅជាង១៣ឆ្នាំបានបង្ហាញការសោកស្តាយយ៉ាងខ្លាំងចំពោះប្រទេសកូរ៉េដែលចុះព័ត៌មានអវិជ្ជមានពីកម្ពុជាដែលធ្វើឱ្យមានការយល់ច្រឡំ។

នាយប់ថ្ងៃទី១៥ ខែតុលា នារីកូរ៉េ ដែលជាអ្នកបង្កើតមាតិកា ពិធីការិនីក្នុងកម្មវិធីដែលមាន តារាកូរ៉េមកធ្វើការប្រគំតន្រ្តីនៅស្រុកខ្មែរ ដែលមានបទពិសោធរស់នៅលើទឹកដីនេះជាង១៣ឆ្នាំ បានបង្ហាញការសោកស្តាយយ៉ាងខ្លាំងចំពោះព័ត៌មានជាច្រើនពីប្រទេសកូរ៉េបានផ្សាយពីប្រទេសខ្មែរធ្វើឱ្យមានការយល់ច្រឡំចំពោះប្រទេសដែលមានបេះដូងដ៏បរិសុទ្ធ។ ក្នុងនាមជានាងរស់នៅស្រុកខ្មែរជាក់ស្តែង នារីកូរ៉េ បញ្ជាក់ថាខ្លួនមិនដែលជួបបញ្ហាដូចអ្វីដែលចុះផ្សាយក្នុងព័ត៌មានឡើយហើយក៏មិនដែលមានអារម្មណ៍ថាប្រទេសកម្ពុជាគ្មានសុវត្ថិភាពនោះទេ។

នារីកូរ៉េ ថានាងអាចធ្វើជាសាក្សីបាន ហើយអ្នកដែលធ្លាប់បានមកលេងឬរស់នៅពិតជាទទួលបាននូវស្នាមញញឹម ភាពស្មោះត្រង់ ភាពកក់ក្ដៅ និងក្ដីស្រឡាញ់របស់ប្រជាជនខ្មែរពិតមែន ហើយព័ត៌មានអវិជ្ជមានជាច្រើននៅពេលថ្មីៗនេះបានបង្កឱ្យមានការឈឺចាប់យ៉ាងខ្លាំងចំពោះជនជាតិខ្មែរដែលរស់នៅកូរ៉េនិងជនជាតិកូរ៉េដែលរស់នៅប្រទេសខ្មែរដោយភាពសុចរិត។

ជាមួយនឹងការចេញមុខធ្វើជាសាក្សីក្នុងការរស់នៅប្រទេសខ្មែរជាក់ស្តែងប្រកបដោយសុវត្ថិភាព នារីកូរ៉េ បានបួងសួងឱ្យស្ថានការណ៍នេះត្រូវបានដោះស្រាយឱ្យបានលឿនដើម្បីកុំឱ្យមានការខាតបង់ឬមានការយល់ច្រឡំច្រើនបន្ថែមទៀត។

គួរបញ្ជាក់ផងដែរថា មិនត្រឹមតែ ហ៊ូអ៊ីន ហ្វាង អតីតបេក្ខភាព The Voice Cambodia រដូវកាលទី៣ , នារីកូរ៉េ ប៉ុណ្ណោះទេដែលចេញវីដេអូបញ្ជាក់ពីស្ថានភាពជាក់ស្តែងដែលពួកគេរស់នៅប្រកបការងារសុចរិតមានសុវត្ថិភាព ខណៈដែលមានជនជាតិកូរ៉េជាច្រើននាក់ទៀតដែលមកធ្វើការនិងរស់នៅក្នុងប្រទេសកម្ពុជាគឺបានបង្ហាញស្រដៀងៗគ្នាថាកម្ពុជាពុំដូចអ្វីដែលប្រព័ន្ធផ្សព្វផ្សាយកូរ៉េចុះផ្សាយនោះទេ៕