មហាជនភ្ញាក់ផ្អើលក្រោយឃើញ កុយ អេនណា ធ្វើដំណើរថ្មើរជើងតែម្នាក់ឯង

ប្រិយមិត្តមួយចំនួនជ្រាបមកហើយថា កុយ អេនណា បានបង្កើតកម្មវិធីសប្បុរសធម៌ ធ្វើដំណើរដោយថ្មើរជើងពីភ្នំពេញទៅខេត្តសៀមរាប ដើម្បីរៃអង្គាសថវិកាជួយកុមារ និងជនពិការ ប៉ុន្តែអ្វីដែលទស្សនិកជនសឹងតែមិនចង់ជឿនោះគឺនាងធ្វើដំណើរតែម្នាក់ឯង។

យុទ្ធនាការ «ដើរដោយក្តីសង្ឃឹម ដើរដើម្បីទេសចរណ៍» របស់ កុយ អេនណា បានចាប់ផ្តើមហើយកាលពីថ្ងៃទី៤ ខែកញ្ញា ឆ្នាំ២០២៥ ប្រកបដោយស្នាមញញឹមនិងភាពកក់ក្តៅបើទោះបីជានឿយហត់អស់កម្លាំងបន្តិចក្តី។ ក្នុងដំណើរថ្មើរជើងនេះ កុយ អេនណា បានបង្ហាញសកម្មភាពមួយចំនួនទទួលបានការរាក់ទាក់ យកចិត្តទុកដាក់ពីបងប្អូននៅតាមផ្លូវដែលនាងឆ្លងកាត់ថែមទាំងផ្តល់ជាអាហានំនែកជូនមកកាន់ អេនណា ផងដែរ។

អ្វីដែលធ្វើឱ្យទស្សនិកជនមួយចំនួនមានការភ្ញាក់ចំពោះសកម្មភាពរបស់បវរកញ្ញារូបនេះគឺដោយសារតែនាងធ្វើដំណើរតែម្នាក់ឯង។ កុយ អេនណា បានបង្ហោះវីដេអូមួយបង្ហាញពីអ៊ំស្រីម្នាក់បង្ហាញការភ្ញាក់ផ្អើលដែលនាងធ្វើដំណើរទៅសៀមរាបដោយថ្មើរជើងហើយឃើញនាងតែម្នាក់ឯងទៀត។

នេះបានជំរុញឱ្យមនុស្សជាច្រើនមានការភ្ញាក់ផ្អើលពីព្រោះនឹកស្មានថានាងធ្វើដំណើរជាក្រុម។ ការលះបង់របស់ កុយ អេនណា ក៏ធ្វើឱ្យមនុស្សជាច្រើនកោតស្ងប់ស្ញែងផងដែរ ដើម្បីរៃអង្គាសថវិកាជួយកុមារ និងជនពិការ និងដើម្បីវិស័យទេសចរណ៍កម្ពុជា នាងលះបង់សម្រស់ ការនឿយហត់របស់ខ្លួនបែបនេះ។

គួរឱ្យដឹងថា មុននឹងចាប់ផ្តើមបង្កើតកម្មវិធីសប្បុរសធម៌ ធ្វើដំណើរដោយថ្មើរជើងពីភ្នំពេញទៅខេត្តសៀមរាប កុយ អេនណា ធ្លាប់មានបទពិសោធឡើងភ្នំឱរ៉ាល់ដែលមានកម្ពស់រហូតដល់១៨១៣ម៉ែត្រ។ ក្នុងដំណើរថ្មើរជើងលើកនេះ កុយ អេនណា នឹងទទួលបានបទពិសោធថ្មីមួយទៀតក្នុងឆាកជីវិតរបស់នាង៕