រដ្ឋមន្ត្រីក្រសួងគមនាគមន៍នឹងឡើងកាន់តំណែងជានាយករដ្ឋមន្ត្រីស្តីទីជំនួសលោកស្រី ផេថងថាន

ប្រទេសថៃ ៖ នៅថ្ងៃទី១ ខែកក្កដា ឆ្នាំ២០២៥ សារព័ត៌មានថៃ Khaosod រាយការណ៍ថា ក្រោយពីតុលាការធម្មនុញ្ញបានសម្រេចទទួលយកញត្តិសមាជិកព្រឹទ្ធសភា ហើយសម្រេចព្យួរតំណែងនាយករដ្ឋមន្ត្រីថៃ លោកស្រី ផេថងថាន ស៊ីណាវ៉ាត់ ដោយសំឡេង៧ ទល់២ ដោយសារការបែកធ្លាយកិច្ចសន្ទនារវាងលោកស្រីជាមួយសម្តេចតេជោ ហ៊ុន សែន ប្រធានព្រឹទ្ធសភាកម្ពុជា គឺលេខាធិការដ្ឋានគណៈរដ្ឋមន្ត្រីចាត់ឱ្យលោក ស៊ុរិយៈ ជឹងរុងរឿងកិច្ច ឧបនាយករដ្ឋមន្ត្រី និងរដ្ឋមន្ត្រីក្រសួងគមនាគមន៍ ឡើងកាន់តំណែងជានាយករដ្ឋមន្ត្រីស្តីទី បន្ទាប់ពីលោកស្រី ផេថងថាន ។

លោក Phumtham Wechayachai រដ្ឋមន្ត្រីក្រសួងមហាផ្ទៃឱ្យដឹងថា លោក ស៊ុរិយៈ ជឹងរុងរឿងកិច្ច នឹងស្បថកាន់តំណែង នាថ្ងៃទី៣ ខែកក្កដា ឆ្នាំ២០២៥ ហើយបំពេញតួនាទីជំនួសលោកស្រី ផេថងថាន ដែលលេខាធិការដ្ឋានគណៈរដ្ឋមន្ត្រីបានកំណត់រួចហើយ មិនថាអ្នកណាឡើងកាន់តំណែង ឬធ្លាក់ពីតំណែង គឺចាត់ទុកថា ត្រូវតែឈរលើគោលការណ៍ដែលប្រទេសថៃត្រូវដើរទៅមុខបន្តទៀត ពីព្រោះការងាររដ្ឋាភិបាលពុំអាចផ្អាកសូម្បីតែមួយថ្ងៃ ។ ហេតុនេះ លោក ស៊ុរិយៈ ជឹងរុងរឿងកិច្ច នឹងប្រញាប់បំពេញតួនាទីឆាប់ៗ ។

នាយករដ្ឋមន្ត្រីស្តីទីនឹងចូលធ្វើការភ្លាមៗ ហើយត្រូវតាំងចិត្តធ្វើការ ពីព្រោះមន្ត្រីរដ្ឋាភិបាលគ្រប់រូបជឿជាក់ថា នាយករដ្ឋមន្ត្រីស្តីទីនឹងអាចដោះស្រាយបញ្ហាផ្សេងៗបាន អ្វីៗគ្រប់យ៉ាងត្រូវបានកំណត់រួចហើយ ។ ករណីមានការប្តឹងផ្តល់ ឬមានរឿងក្តីកើតឡើងត្រូវតែចាត់វិធានការតាមផ្លូវច្បាប់ ដែលនឹងពុំប៉ះពាល់ដល់ភារកិច្ចឡើយ ។

គួរបញ្ជាក់ថា លោក ស៊ុរិយៈ ជឹងរុងរឿងកិច្ច បានចូលប្រឡូកក្នុងផ្នែកនយោបាយកាលពីឆ្នាំ១៩៩៨ មានតួនាទីជាអនុរដ្ឋមន្ត្រីក្រសួងឧស្សាហកម្ម ។ នៅឆ្នាំ២០០១លោកបានចូលរួមជាមួយគណបក្សថៃស្រឡាញ់ថៃ និងកាន់តំណែងជាលេខាបក្ស ប៉ុន្តែគណបក្សនេះត្រូវបានរំលាយ និងដកហូតសិទ្ធិនយោបាយរយៈពេល៥ឆ្នាំ ។ លោកក៏ចូលរួមជាមួយគណបក្សផ្លាំងប្រាឆារ៉ាត់ នៅឆ្នាំ២០១៨ មានតួនាទីជាមេដឹកនាំក្រុមសមមិត្ត ហើយលោកបានកាន់តំណែងជារដ្ឋមន្ត្រីក្រសួងគមនាគមន៍ នៅឆ្នាំ២០០១ ។

ពលរដ្ឋថៃសង្ឃឹមថា ការឡើងកាន់តំណែងជានាយករដ្ឋមន្ត្រីស្តីទីរបស់លោក ស៊ុរិយៈ ជឹងរុងរឿងកិច្ច នឹងអាចជួយដោះស្រាយបញ្ហាផ្សេងៗទាំងក្នុងប្រទេស និងក្រៅប្រទេស ដែលថៃកំពុងប្រឈម ដោយសារលោកមានបទពិសោធន៍ផ្នែកនយោបាយជាច្រើនឆ្នាំ ៕

---