គេសង្កេតឃើញថាយុវជននាពេលបច្ចុប្បន្នមានការកើនឡើងក្នុងការជក់បារីដើម រួមទាំងបារីអេឡិចត្រូនិចជាដើមដែលធ្វើឱ្យមានការព្រួយបារម្ភនិងមានផលប៉ះពាល់ទៅដល់សុខភាព។ ជាមួយគ្នានេះ ប៉ីប៉ី ឌី អ្នកមានឥទ្ធិពលលើបណ្តាញសង្គមបានសារភាពថាញៀនក្នុងការជក់បារីផ្តើមពីការចង់ដឹងចង់ស្គាល់ ខណៈបានប្តេជ្ញាចិត្តបោះបង់ឈប់ប៉ះពាល់ទៀត។
ប៉ីប៉ី ឌី កំពុងកាក់កបនឹងមុខជំនួញយ៉ាងខ្លាំងបានបើកហាងជាច្រើនកន្លែងនិងខិតខំពង្រឹងទីផ្សារជាប់ជានិច្ចដើម្បីឱ្យមុខរបរខ្លួនកាន់តែរីកចម្រើនព្រមទាំងរិះរកអ្វីដែលថ្មីៗជូនទៅកាន់អតិថិជនខ្លួន។ ទន្ទឹមនឹងភាពជោគជ័យ ប៉ីប៉ី ឌី បានចេញមកសារភាពចំពោះការញៀនជក់បារីរបស់ខ្លួន។
អ្នកជំនួញរូបនេះបានសរសេរនៅលើបណ្តាញសង្គមនាល្ងាចថ្ងៃទី៣ នេះថា «ខ្ញុំចាប់ផ្តើមចេះជក់បារីកាលពី២០១៦ ផ្តើមពីការចង់ដឹង ចង់ស្គាល់រួចក៏ញៀន ពីមួយដើម ឡើងដល់៣ទៅ៤កញ្ចប់ក្នុងមួយថ្ងៃតាមអារម្មណ៍ទោះដឹងថាមិនល្អសម្រាប់សុខភាព រហូតដល់២០២៣ ខ្ញុំចាប់ផ្តើម ប្តូរមកញៀន vape ជក់តាំងពីក្បាលមួយជក់២ថ្ងៃ រហូតដល់មួយថ្ងៃ៣ក្បាល ថ្ងៃនេះខ្ញុំសម្រេចបោះចោលនិងប្តេជ្ញានឹងខ្លួនឯង ឈប់ប៉ះពាល់ទៀតហើយ»។
ការប្តេជ្ញាចិត្តរបស់ ប៉ីប៉ី ឌី ឈប់ជក់បារីនេះបានធ្វើឱ្យមនុស្សជាច្រើនរួមទាំងអ្នកសិល្បៈផងសាទរចំពោះការតាំងចិត្តយ៉ាងមុតមាំរបស់ ប៉ីប៉ី ឌី និងគាំទ្រចំពោះរឿងព្រោះការជក់បារីបណ្តាលឱ្យប៉ះពាល់ដល់សុខភាពធ្ងន់ធ្ងរ។
តាមការស្ទង់មតិរបស់អង្គការសុខភាពពិភពលោកបានបង្ហាញថា កុមារដែលមានអាយុពី ១៣ ដល់ ១៥ឆ្នាំ នៅក្នុងប្រទេសភាគច្រើនបានប្រើប្រាស់ថ្នាំជក់ និងផលិតផលដែលមាន សារធាតុញៀន នីកូទីនផ្សេងទៀត។ អង្គការសុខភាពពិភពលោកបានប៉ាន់ប្រមាណថា កុមារយ៉ាងតិច ៣៧លាននាក់ ដែលមានអាយុពី ១៣ ដល់ ១៥ឆ្នាំ កំពុងប្រើប្រាស់ផលិតផលថ្នាំជក់ ក្នុងទម្រង់ណាមួយ ហើយប្រទេសជាច្រើនបានរកឃើញថាការជក់បារី អេឡិចត្រូនិកក្នុង ចំណោមមនុស្សវ័យជំទង់ស្ថិតក្នុងកម្រិតគួរឱ្យព្រួយបារម្ភ។ 
លើសពីនេះ ថ្នាំជក់សម្លាប់មនុស្សជាង ៨ លាននាក់ជារៀងរាល់ឆ្នាំ ដែលភាគច្រើននៅក្នុងប្រទេសដែលមានប្រាក់ចំណូលទាប និងមធ្យម ដែលមានប្រហែល ៨០% នៃអ្នកប្រើប្រាស់ថ្នាំជក់ ១,៣ ពាន់លាននាក់របស់ពិភពលោក៕
