រឿងរ៉ាវចម្រូងចម្រាសរបស់ពិធីករប្រដាល់ MC Vutha ទៅកាន់តារាម៉ូដែល មុន្នីរស្មី បានធ្វើឱ្យបណ្តាញសង្គមផ្ទុះការវែកញែកមិនធម្មតាមិនត្រឹមតែនារីៗជាច្រើនចេញមុខនោះទេសូម្បីតែបុរសៗមួយចំនួនក៏ចេញមុខការពារសិទ្ធិនារីដូចគ្នា។ ជាក់ស្តែងពិធីករល្បីឈ្មោះប្រចាំប្រទេសលោក ជា វណ្ណារិទ្ធ ក៏បានលូកមាត់លើរឿងនេះនឹងថាសម្តីរបស់ MC Vutha ជាមនុស្សល្មោ.ភកាម ថោកទាប ធ្វើឱ្យប៉ះពាល់ដល់ MC ដែលល្អៗ។
កាលពីថ្ងៃទី៣ មីនា បន្ទាប់ពីមហាជនរិះគន់ចាស់ដៃ MC Vutha បានចេញវីដេអូសូមទោសទៅកាន់នារីលើកស្លាកទឹកប្រដាល់ប៉ុន្តែតារាម៉ូដែលនោះដែលមានឈ្មោះថា មុន្នីរស្មី មិនពេញចំពោះការសូមទោសរបស់លោកនោះទេព្រោះហាក់បីដូចជាមិនចេញពីចិត្តមិនទាន់គ្រប់គ្រាន់ក្នុងការនិយាយបៀតបៀនជាសាធារណៈមិនសំពះសូមទោសឡើយ និងនៅចាត់ទុកថាការនិយាយនោះគឺជាការនិយាយលេងសើចដដែលដោយមិន បានបញ្ជាក់ថា ឈប់ពោលពាក្យបៀតបៀនមនុស្សស្រី ស្ត្រី និងក្មេងស្រីទៀត។
បន្ទាប់ពីសាមីខ្លួនមិនព្រមទទួលយកពាក្យសូមទោសដែលនៅមានលក្ខណៈមិនគ្រប់គ្រាន់ MC Vutha បានចេញវីដេអូជាលើកទី២ដោយបានលើកដៃសូមទោស មុន្នីរស្មី ដោយសារតែការចេញវីដេអូលើកទី១លោករវល់ការងារ ខណៈទស្សនិកជនមួយចំនួនហាក់បង្ហាញអារម្មណ៍មិនពេញចិត្តដដែល។
ជុំវិញរឿងរ៉ាវដ៏ក្តៅគគុកនេះពិធីករល្បីឈ្មោះលោក ជា វណ្ណារិទ្ធ ក៏មិននៅស្ងៀមព្រោះវាអាចប៉ះពាល់ដល់ MC ដែលល្អៗ។ ពិធីកររូបនេះបានសរសេរនៅលើបណ្តាញសង្គមទាំងកណ្តាលយប់ថា «កុំឱ្យប៉ះពាល់ដល់ MC ល្អៗ បងសង្ឃឹមថាមានដំណោះស្រាយណាមួយ ដែលប្អូនអាចទទួលយកកិត្តិយសមកវិញបាន។ សម្តីរបស់គាត់មិនត្រឹមតែប៉ះពាល់ណាស់ដល់អារម្មណ៍ប្អូនស្រី ប៉ុណ្ណោះទេ ស្ត្រីទូទៅក៏ទទួលយកអត់បានដែរ»។ លោក ជា វណ្ណារិទ្ធ បានភ្ជាប់ជាមួយហាស់ថេកក្នុងសំណេរថា «ល្មោភកាម ថោកទាប»។
ការលើកឡើងរបស់លោក ជា វណ្ណារិទ្ធ បានធ្វើឱ្យអ្នកគាំទ្រជាច្រើនបញ្ចេញមតិយោបល់ ខណៈមានការលើកឡើងថាគួរមានវិធានការចំពោះ MC Vutha ។ អ្នកលេងបណ្តាញសង្គមបានបញ្ចេញមតិថា «គួរតែមានវិធានការណាមួយចំពោះគាត់ កុំទទួលពាក្យសូមទោស ព្រោះពាក្យសម្តីគាត់ធ្ងន់ណាស់ ថែមទាំង ហៅគេឱ្យចូលរួមថែមទៀតផង ប្អូនស្រីមិនដឹងគ្នាខ្មាស់គេនឹងឈឺចាប់យ៉ាងណាទេ ពេលដែលត្រូវគេ បៀតបៀនដោយពាក្យសម្តីនៅមុខមនុស្សជាច្រើនចឹងនោះ»។ ការបញ្ចេញមតិនេះ ពិធីករ ជា វណ្ណារិទ្ធ បានឆ្លើយតបថា «គាត់គួរតែទទួលកំហុសដោយ ការគោរពមិនមែនគ្រាន់តែសូមទោសតែមាត់ទេ បងយល់ណាស់»៕
