ថ្មីៗនេះអ្នកលេងបណ្តាញសង្គមមានការចាប់អារម្មណ៍យ៉ាងខ្លាំងបន្ទាប់ពីមានការចែករំលែកនៅលើប្រព័ន្ធផ្សព្វផ្សាយពីរថយន្តក្រុងទេសចរណ៍ខេត្តសៀមរាប Big Bus Angkor ដ៏ធំនិងទំនើបមួយ។ រថយន្តក្រុងប្រភេទនេះទស្សនិកជនធ្លាប់តែឃើញនៅស្រុកគេប៉ុន្តែពេលនេះប្រជាពលរដ្ឋខ្មែរបានឃើញនៅខេត្តសៀមរាបលើកដំបូង ដែលនេះអាចធ្វើឱ្យមានការទាក់ទាញចិត្តទេសចរនិងចង់ទទួលបានបទពិសោធន៍ថ្មី។
នៅថ្ងៃទី២៥ ខែធ្នូ មានអ្នកលេងទិកតុកដែលស្ថិតនៅខេត្តសៀមរាបឬជាភ្ញៀវទេសចរបានចែករំលែកវីដេអូជាច្រើនអំពីរថយន្តក្រុងទេសចរណ៍ដ៏ស្រស់ស្អាតមួយឈ្មោះថា Big Bus Angkor ដែលច្នៃឡើងយ៉ាងស្រស់ស្អាត។ រថយន្តក្រុងប្រភេទនេះទស្សនិកជនធ្លាប់តែឃើញនៅស្រុកគេដែលមានភ្ញៀវទេសចរជិះដើម្បីទស្សនានៅតំបន់ទេសចរណ៍នានានៅក្នុងប្រទេសគេ។ 
ការបង្ហាញរូបរាងប្រភេទរថយន្តក្រុងទេសចរណ៍ធំនេះបានទាញចិត្តមនុស្សជាច្រើនឱ្យចាប់អារម្មណ៍វានិងចង់សាកល្បងជិះលំហែទស្សនានៅក្នុងក្រុងសៀមរាប។ តាមការបង្ហោះរបស់អ្នកលេងទិកតុកគឺបានបញ្ជាក់ថាក្រុមហ៊ុនទេសចរណ៍គឺអនុញ្ញាតឱ្យទេសចរជិះកម្សាន្តដោយឥតគិតថ្លៃចំនួន១ថ្ងៃប៉ុណ្ណោះគឺនៅថ្ងៃទី២៥ ធ្នូ ដែលជាថ្ងៃបុណ្យណូអែល ខណៈបន្ទាប់មកគឺតម្រូវឱ្យមានការទិញសំបុត្រ។
ក្រោយពីមានការចែកចាយវីដេអូ Big Bus Angkor មានរចនាទង់ជាតិខ្មែរនិងទង់ជាតិដទៃទៀតមានចំនួនពីរជាន់អាចបើកដំបូលបានធ្វើឱ្យមានការចាប់អារម្មណ៍យ៉ាងខ្លាំងនិងមនុស្សជាច្រើនមានបំណងចង់សាកល្បងភ្លក្សរសជាតិជិះទស្សនានៅក្នុងក្រុងសៀមរាបព្រោះធ្លាប់តែឃើញនៅស្រុកគេដែលទើបមានលើកដំបូងនៅស្រុកខ្មែរនៅខេត្តសៀមរាបដែលជាតំបន់ទេសចរណ៍ដ៏សំខាន់របស់ព្រះរាជាណាចក្រកម្ពុជា។ ជាមួយគ្នានេះអ្នកមួយចំនួនក៏កោតសរសើរចំពោះការ Update សមិទ្ធិផលថ្មីៗ ដើម្បីជាផ្នែកមួយជួយជំរុញវិស័យទេសចរណ៍ក្នុងស្រុកឱ្យកាន់តែរីកចម្រើននិងមានភាពងាយស្រួលឱ្យទេសចរជាប់ចិត្ត៕
