ថ្មីៗនេះ នៅលើបណ្តាញសង្គមមានការបង្ហោះនិងចែកចាយជាច្រើន ទាក់ទងនឹងផ្ទាំង LED យ័ន្ត ៨ ទិស មានអក្សរខ្មែរបុរាណយ៉ាងធំៗច្បាស់ៗ បានបង្ហាញវត្តមានក្នុងសង្វៀនប្រដាល់ដ៏ធំមួយនៅប្រទេសថៃ កំពុងក្លាយជាប្រធានបទក្តៅក្នុងចំណោមមហាជនខ្មែរ ធ្វើការវិភាគនិងវែកញែក។
កាលពីថ្ងៃទី ២១ ខែធ្នូ ឆ្នាំ២០២៤នេះ កម្មវីធីប្រកួតប្រដាល់ RWS-Rajadamnern World Series លើកទី៨០ ដែលបានប្រព្រឹត្តិទៅនៅឯកីឡាដ្ឋាន Rajadamnern Muay Thai Stadium ស្ថិតក្នុងទីក្រុងបាំងកក ប្រទេសថៃ។ វាត្រូវបានគេចាត់ទុកកសង្វៀនប្រដាល់ដ៏ធំមួយ ដែលមានការអញ្ជើញចូលរួមពីអ្នកប្រដាល់កំពូលៗ ទាំងថ្នាក់ជាតិ និងអន្តរជាតិ ព្រមជាមួយនឹងអ្នកទស្សនាយ៉ាងច្រើនកុះករ។
នៅលើសង្វៀនប្រកួត អ្វីដែលធ្វើឲ្យមហាជនចាប់អារម្មណ៍ខ្លាំងបំផុតនោះ គឺទៅលើផ្ទាំង LED ដ៏ធំមួយនៅខាងលើ ដែលត្រូវបានគេស្គាល់យ៉ាងច្បាស់ថាជា យន្ត ៨ ទិស រំលេចទៅដោយតួអក្សរខ្មែរបុរាណ បន្សល់ទុកមកពីជំនាន់បុព្វបុរសខ្មែរ។
ជាមួយគ្នានោះ មហាជនខ្មែរភាគច្រើនបានសម្តែងនូវការហួសចិត្ត និងវិភាគវែកញែកព្រោងព្រាត ដោយហេតុថាយ័ន្តនោះ បើទោះបីជាយន្តបុរាណ តែតួអក្សរភាគច្រើនមើលមួយភ្លែតក៏ដឹងថាជាអក្សរខ្មែរដែរ ខណៈនៅក្នុងតួអក្សរថៃគឺគ្មានអក្សរណាស្រដៀងអក្សរទាំងនេះសោះឡើយ។ គេហទំព័របុរាណាចារ្យក៏បានគូសបញ្ជាក់ដែរថា «រាប់រយឆ្នាំមកហើយ អក្សខ្មែរ នៅតែមានឥទ្ធិពលក្នុងសង្គមជាតិថៃ»។
យ៉ាងណា នេះមិនមែនជាលើកទី ១ ទេ ព្រោះថាវប្បធម៌ខ្មែរជាច្រើនរាប់ភ្លេច ក៏ត្រូវបានភាគីខាងថៃអះអាងថាជារបស់គេផងដែរ៕
