បញ្ហាមួយតែងតែកើតឡើងចំពោះនារីភាគច្រើន គឺចុកពោះខ្លាំងពេលមករដូវ រហូតប៉ះពាល់ដល់ការសម្រាក និងធ្វើការលែងកើត ខណៈអ្នកខ្លះបានសុំច្បាប់សម្រាកពីការងារពេលមករដូវម្តងៗ ។ សារព័ត៌មាន KBN សូមបង្ហាញនូវ៊វិធីកាត់បន្ថយការចុកពោះពេលមករដូវ និងវិធីសង្កេតអាការៈខុសធម្មតា ដើម្បីព្យាបាលទាន់ពេលវេលា ។
ជាទូទៅ នារីៗនឹងចុកពោះមុនពេលមករដូវ ចាប់ពី១ថ្ងៃ ទៅ២ថ្ងៃ ហើយនឹងចុកពោះខ្លាំងក្នុងថ្ងៃមករដូវដំបូង ។ ក្រៅពីនេះ ក៏មានអាការៈផ្សេងៗ ដូចជា ៖ ឈឺខ្នងផ្នែកខាងក្រោម, ក្អួតចង្អោរ, បើកញើស, ហើមពោះ និងឈឺក្បាល វិលមុខ ជាដើម ។.png)
ការចុកពោះខ្លាំងពេលមករដូវ ក្រៅពីធ្វើឱ្យនារីៗអស់កម្លាំងល្ហិតល្ហៃ ឬពុំចង់ធ្វើការងារហើយ ថែមទាំងធ្វើឱ្យពួកនាងពិបាកសម្រាកទៀតផង ។ បើមានអាការៈទាំងនេះ ចូរសាកល្បងអនុវត្តតាមវិធីចំនួន៥ ដូចខាងក្រោម ៖
១-ស្អំទឹកក្តៅលើពោះ ៖ នេះជាវីធីងាយស្រួលបំផុតដើម្បីបំបាត់ការចុកពោះ ដោយគ្រាន់តែស្អំទឹកក្តៅលើពោះដើម្បីឱ្យកំដៅជួយពង្រីកសរសៃឈាម និងធ្វើឱ្យសរសៃឈាមរត់ល្អ ។
២-ផឹកទឹកតែ ៖ ការស្រាវជ្រាវបញ្ជាក់ថា ស្លឹកតែជាច្រើនប្រភេទអាចជួយកាត់បន្ថយការឈឺចាប់បាន ឬអាចផឹកទឹកក្តៅឧណ្ឌៗលាយទឹកឃ្មុំ និងក្រូចឆ្មារ ឬខ្ញី ។ ប៉ុន្តែគួរផឹកក្នុងបរិមាណសមល្មម គឺមិនផឹកច្រើនពេក ពីព្រោះនឹងធ្វើឱ្យឈឺបត់ជើងតូចញឹកញាប់ ហើយចុកពោះកាន់តែខ្លាំង ។.png)
៣-បរិភោគបន្លែ និងចៀសវាងអាហារខ្លាញ់ ៖ ការបរិភោគអាហារសម្បូរខ្លាញ់នឹងធ្វើឱ្យពិបាករំលាយអាហារ និងកាន់តែមិនស្រួលខ្លួនខ្លាំងឡើង ។ បើពុំអាចចៀសវាងអាហារខ្លាញ់ គួរជ្រើសរើសប្រេងអូលីវមកចម្អិនអាហារ ហើយបរិភោគបន្លែ ផ្លែឈើ ដើម្បីបញ្ចុះកាកសំណល់ក្នុងខ្លួន ព្រមទាំងជួយឱ្យឈាមរត់ល្អ ។.png)
៤-ហាត់ប្រាណ ៖ ចូរហាត់ប្រាណយ៉ាងហោចណាស់ ចំនួន៣លើកក្នុង១សប្តាហ៍ ហើយក្នុង១លើក ចាប់ពី៤០នាទី ទៅ៦០នាទី ដើម្បីកាត់បន្ថយការចុកពោះ ។
៥-ធ្វើសមាធិ ឬហាត់ Yoga ៖ វិធីនេះក៏អាចជួយឱ្យបាត់ចុកពោះផងដែរ ពីព្រោះការធ្វើសមាធិនឹងអាចកាត់បន្ថយភាពតានតឹងផ្លូវចិត្ត រីឯការហាត់ Yoga នឹងធ្វើឱ្យសាច់ដុំរឹងមាំ និងបង្កើតភាពបត់បែនក្នុងរាងកាយ ។ .png)
ប៉ុន្តែបើយើងអនុវត្តតាមវិធីទាំងនេះហើយនៅតែពុំធូរស្រាល គួរទៅជួបគ្រូពេទ្យជាបន្ទាន់ដើម្បីរកមូលហេតុច្បាស់លាស់ ជាពិសេស អ្នកមានអាការៈដូចខាងក្រោម ៖
-ពេលមករដូវ ចុកពោះកាន់តែខ្លាំងឡើងពីមួយខែទៅមួយខែ
-លេបថ្នាំបំបាត់ការឈឺចាប់ហើយនៅតែមិនធូរស្រាល ហើយឈឺកាន់តែខ្លាំង
-ចុកពោះខ្លាំងរហូតពិបាកធ្វើការ
-អស់រដូវហើយនៅតែចុកពោះ
-មករដូវច្រើនជាងធម្មតា
-ចុកពោះខ្លាំងរហូតក្អួតចង្អោរ ឈឺក្បាល បែកញើស គ្រុនក្តៅ និងរាគរូស ៕
