មិនដែលដឹងសោះថា ជន្លេន និងឈ្លើងមានអត្ថប្រយោជន៍អស្ចារ្យយ៉ាងនេះ!

ជន្លេន និងឈ្លើងគឺជាសត្វល្មូនមួយប្រភេទដែលមនុស្សភាគច្រើនតែងតែខ្លាចរអារ និងខ្ពើមរអើម ដោយសាររូបរាងរបស់វាមិនគួរឱ្យស្រឡាញ់ដូចសត្វដទៃ។ ជាការពិតណាស់មនុស្សភាគច្រើនគិតថា សត្វទាំងពីរនេះគឺគ្មានប្រយោជន៍នោះទេ ប៉ុន្តែបើយោងតាមការសិក្សាស្រាវជ្រាវពីសាកលវិទ្យាល័យ Oxford University Hospitals បានឱ្យដឹងថា សត្វទាំងនេះគឺមានប្រយោជន៍ខ្លាំងណាស់។

សត្វឈ្លើងត្រូវបានគេប្រើប្រាស់ជាឱសថព្យាបាលជំងឺផ្សេងៗតាំងពីសម័យអេហ្ស៊ីបបុរាណមកម្ល៉េះ ដោយសារវាមានផ្ទុកនូវសារធាតុប្រូតេអ៊ីនដ៏ពិសេសដែលមានសមត្ថភាពខ្ពស់ ក្នុងការការពារការកកឈាម។ មិនតែប៉ុណ្ណោះ វាក៏ជាឱសថសម្រាប់ប្រឆាំងនឹងអុកស៊ីតកម្ម ក៏ដូចជាជួយផ្សះមុខរបួសឱ្យឆាប់ជាសះស្បើយផងដែរ។ ក្រៅពីធ្វើជាឱសថ ឈ្លើងក៏ត្រូវបានគេប្រើជាចាំបាច់ក្នុងការកែសម្ផស្ស និងការវះកាត់ខ្នាតតូចមួយចំនួនទៀតផង។

នេះបើយោងតាមការសិក្សា ឈ្លើងបានដើរតួនាទីយ៉ាងសំខាន់ក្នុងវិស័យកែសម្ផស្ស ដោយសារក្រោយការវះកាត់ ដើម្បីឱ្យឆាប់សះមុខរបួស គេអាចដាក់ឈ្លើងទាំងនោះឱ្យទាមនៅកន្លែងសំខាន់ៗមួយចំនួនដូចជា ច្រមុះ ថ្ងាស សុដន់ ថ្ពាល់ ដើម្បីស្រូបនូវឈាមកខ្វក់ និងដើម្បីឱ្យវាបញ្ចេញនូវទឹកមាត់ជារនាំងជួយការពារការក្លាយនៃមុខរបួសផងដែរ។

ចំណែកឯជន្លេនវិញគឺគេយកធ្វើជាចំណីរបស់សត្វផ្សេងទៀត។ ក្រៅពីធ្វើជាចំណី សត្វជន្លេនក៏មានប្រយោជន៍សម្រាប់វិស័យកសិកម្មផងដែរ ព្រោះលាមករបស់វាមានជីរជាតិខ្លាំងណាស់សម្រាប់ដីដាំដំណាំផ្សេងៗ ម្យ៉ាងទៀតការវារចុះវារឡើងរបស់វានៅក្នុងដីក៏ធ្វើឱ្យដីសុះល្អផងដែរ។ ជន្លេន គឺជាសត្វមួយប្រភេទរស់នៅក្នុងដី កើតនៅក្នុងដី និងស៊ីដីជាអាហារ ដូច្នេះវាមានតួនាទីកែច្នៃសំណល់សរីរាង្គ និងជាអ្នកកែប្រែគុណភាពដី ធ្វើឱ្យមានលក្ខណៈល្អប្រសើរជាងមុន៕